Dag 42 van 365- Leviticus 11-12 en Matteüs 26:1-30

₁MASRA taigi Moses nanga Aaron taki: ₂“Taigi den sma fu Israel taki: ‘Fu ala den meti na grontapu disi na den wan di un kan nyan: ₃Un kan nyan ala meti di fes'futu priti na tu. Den fes'futu no mus priti afu nomo èn den mus de meti di e nyan, dan baka dati den en kaw a nyanyan fu a di fu tu leisi. ₄Meti di e kaw den nyanyan fu a di fu tu leisi, ma di fes'futu no priti na tu, un no sa nyan. Meti di fes'futu priti na tu, ma di no e kaw den nyanyan fu a di fu tu leisi, un no sa nyan tu. Un no sa nyan a kameel, bika a e kaw a nyanyan fu a di fu tu leisi, ma en fes'futu no priti. Dat' meki un mus si en leki wan meti di no krin ini Gado ai. ₅A klipdas srefi e kaw a nyanyan fu a di fu tu leisi, ma en fes'futu no priti. Un mus si en leki wan meti di no krin ini Gado ai. ₆A hei srefi e kaw a nyanyan fu a di fu tu leisi, ma en fes'futu no priti. Un mus si en leki wan meti di no krin ini Gado ai. ₇A agu fes'futu priti trutru. A no priti afu nomo. Ma a no e kaw en nyanyan fu a di fu tu leisi. Un mus si en leki wan meti di no krin ini Gado ai. ₈Un no sa nyan den meti disi èn un no sa fasi a dedeskin fu den. Un mus si den leki meti di no krin ini Gado ai.

₉Fu ala den meti di e libi ini watra, disi na den wan di un kan nyan: un kan nyan ala sani di e libi na ini watra, ini den se nanga ini den liba di abi vin nanga buba. ₁₀Ma ala den sani di e libi ini den se nanga ini den liba, pikinwan nanga den bigiwan, di no abi vin nanga buba, sa de wan groskin sani gi unu. ₁₁Den mus de wan groskin sani gi unu. Un no sa nyan a meti fu den èn un mus fisti gi a dedeskin fu den. ₁₂Ala sani di e libi na ini watra di no abi vin nanga buba, sa de wan groskin sani gi unu.

₁₃Fu den fowru di e frei na loktu, disi na den wan gi san un mus fisti. Un no sa nyan den. Den mus de wan groskin sani gi unu: den difrenti sortu aka, ₁₄den difrenti sortu tingifowru, ₁₅nanga den difrenti sortu blaka fowru di den e kari raaf. ₁₆Moro fara a struisfowru, den difrenti sortu owrukuku, a meeuw, den difrenti sortu sperwer ₁₇a aalscholver, ₁₈a pelikaan, ₁₉a ooievaar, den difrenti sortu sabaku, a hop nanga a fremusu.

₂₀Ala den pikinpikin sani di abi frei nanga fo futu sa den wan groskin sani gi unu. ₂₁Ma fu den pikinpikin sani di abi fo futu nanga frei, un kan nyan den disi: den wan di no abi futu wawan ma di abi bowtu tu nanga san den e dyompo. ₂₂Dati na: ala den difrenti sortu sprenka, den bigiwan, den pikinwan, nanga den kot'koti. ₂₃Ma ala pikinpikin sani di abi frei nanga fo futu sa de wan groskin sani gi unu.

₂₄Efu wan sma fasi a dedeskin fu wan meti di no krin ini Gado ai, sowan sma no sa krin moro ini Gado ai tu te leki neti tapu. ₂₅Ala sma di fasi a dedeskin fu den, sa wasi en krosi èn a sma dati no sa krin ini Gado ai te leki neti tapu. ₂₆Ala meti di fes'futu priti afu nomo èn di no e kaw den nyanyan fu a di fu tu leisi, un mus si leki meti di no krin ini Gado ai. Ala sma di fasi den no sa krin ini Gado ai tu te leki neti tapu. ₂₇Ala meti nanga fo futu di te den e waka den e poti den heri futu plata na gron, un sa si leki meti di no krin ini Gado ai. Ala sma di fasi a dedeskin fu den no sa krin ini Gado ai tu te leki neti tapu. ₂₈Ala sma di fasi a dedeskin fu den, sa wasi en krosi èn a sma dati no sa krin ini Gado ai te leki neti tapu. Un mus si den meti disi leki meti di no krin ini Gado ai.

₂₉Fu den meti di en kroipi na gron, disi na den wan di un mus si leki meti di no krin ini Gado ai: a mol, a moismoisi nanga ala den difrenti sortu todo. ₃₀Moro fara a kamrawenke, a sapakara, a lagadisa, a pakro, nanga a agama. ₃₁Fu ala den meti di e kroipi na gron den disi na den wan di un mus si leki meti di no krin ini Gado ai. Ala sma di fasi a dedeskin fu den no sa krin ini Gado ai te leki neti tapu. ₃₂Efu a dedeskin fu wan fu den meti disi fadon tapu wan sani, a sani dati no krin moro ini Gado ai tu. Un sa poti a sani fu udu, a krosi, a saka noso a meti buba tapu san a dede meti fadon, ini watra. Den no sa krin ini Gado ai te leki neti tapu. Baka dati a sa krin ini Gado ai baka. ₃₃Efu sowan meti fadon ini wan kroiki, dan a kroiki nanga ala sani di de na ini no krin moro ini Gado ai. Un mus naki a kroiki broko. ₃₄Ala nyansani di wasi nanga watra di ben de ini a kroiki no sa krin moro ini Gado ai. A sani fu dringi di ben de ini a kroiki, no sa krin moro ini Gado ai. ₃₅Ala sani tapu san a dedeskin fu sowan meti fadon, no sa krin moro ini Gado ai. Un sa naki a onfu nanga a pan broko. Un mus si den leki sani di no krin moro ini Gado ai èn un mus tan si den so. ₃₆Ma efu a dedeskin fu sowan meti fadon ini wan watrabron noso wan watrabaki, a watra dati e tan krin ini Gado ai. Ma a sma di fasi a dede meti, no sa krin ini Gado ai. ₃₇Efu a dedeskin fu sowan meti fadon tapu siri di wan sma bo sai, a siri dati e tan krin ini Gado ai. ₃₈Ma efu a siri ben de ini watra, dan a dedeskin fu sowan meti fadon na tapu, a siri dati no sa krin moro ini Gado ai.

₃₉Efu wan sma fasi a dedeskin fu wan meti di libisma kan nyan, a sma dati no krin ini Gado ai te leki neti tapu. ₄₀A sma di nyan fu a dedeskin sa wasi en krosi èn a no sa krin ini Gado ai te leki neti tapu. A sma di opo a dedeskin fu sowan meti sa wasi en krosi tu èn a sma no sa krin ini Gado ai te leki neti tapu.

₄₁Ala meti di e kroipi na gron sa de wan groskin sani. Un no sa nyan den. ₄₂Efu na tapu den bere den e kroipi, efu den e waka tapu fo futu noso efu den abi moro leki fo futu, un no sa nyan den. Un mus si den leki meti di no krin ini Gado ai. ₄₃Sorgu taki unsrefi no tron wan groskin sani fu doti unsrefi ini Gado ai nanga wan fu den meti disi. ₄₄Bika Mi na MASRA, un Gado. Un mus santa, bika Mi santa. Un no doti unsrefi nanga den meti disi di e kroipi na gron. ₄₅Bika Mi na MASRA, di puru unu na ini Egiptekondre fu kan de un Gado. Un mus santa, bika Mi santa.’ ”

₄₆Disi na a wèt na san den ben mus hori densrefi gi den meti di sma man kweki, gi den fowru di e frei na loktu, gi ala libi sani di e libi na ini watra nanga gi ala libi sani di e kroipi na gron, ₄₇fu prati den sani di krin ini Gado ai fu den sani di no krin ini Gado ai èn fu prati den meti di sma kan nyan fu den meti di sma no kan nyan.

₁MASRA taigi Moses taki: ₂“Taigi den Israelitisma taki: ‘Efu wan uma kisi wan manpikin, dan seibi dei langa a no sa krin ini Gado ai, neleki te a abi en munsiki. ₃Tapu a di fu aiti dei den sa besnei a boi. ₄A mama sa teri ete dritenti-na-dri dei, te leki a brudu tapu. Dan fosi a krin trutru. A no sa fasi no wan santa sani. A no sa go tu na a santa presi, te leki a kon krin baka ini Gado ai. ₅Efu na wan umapikin a kisi, dan na tu wiki langa a no sa krin ini Gado ai, neleki te a abi en munsiki. A sa teri ete siksitenti-na-siksi dei, te leki a brudu tapu. Dan fosi a krin trutru ini Gado ai.

₆Te a uma kon krin, baka di a kisi a manpikin noso a umapikin, a sa tyari wan skapu fu wan yari fu bron leki ofrandi. A sa tyari wan yongu doifi noso wan ston doifi tu leki ofrandi fu kisi pardon fu sondu. A sa tyari den go gi a priester na mofodoro fu a tenti pe yu kan miti nanga Gado. ₇A priester sa tyari den leki ofrandi na MASRA fesi, fu meki a kon bun baka nanga Gado. Dan uma sa krin baka ini Gado ai.

Disi na a wèt te wan uma kisi wan pikin. ₈Efu a no gudu so fu tyari wan skapu, dan a sa tyari tu stondoifi noso tu yongu doifi kon. Wan sa bron leki wan ofrandi, a trawan na wan ofrandi fu kisi pardon fu sondu. A priester sa meki a kon bun baka nanga Gado, dan a sa krin baka ini Gado ai.’ ”

₁Di Yesus kba taki ala den sani disi, A taigi den man di ben e teki leri fu En taki: ₂“Un sabi taki tra tamara wi o nyan Paska. Dan den o gi a Manpikin fu Libisma abra na ini anu fu trawan fu den spikri En na wan kroisi.”

₃A srefi yuru dati, den prenspari priester nanga den fesiman fu a folku ben kon makandra ini a oso fu a granpriester Kayafas. ₄Drape den kruderi makandra fa den ben o man kisi Yesus nanga wan triki fu den kan kiri En. ₅Ma den taki: “Un no mus grabu En tapu den dei fu a fesa, noso a folku o meki dyugudyugu.”

₆Yesus ben de na Betania, na a oso fu wan man di den ben kari Gwasi Simon. ₇Di A ben e nyan, wan uma kon na En nanga wan albast batra di ben furu nanga wan bun diri oli. Dan a kanti a oli tapu a ede fu Yesus. ₈Di den man di ben e teki leri fu En si san a uma du, den mandi. Den taki: “Sanede a fermorsu a oli? ₉Un ben kan seri en gi furu moni èn prati a moni gi pôtisma.” ₁₀Ma Yesus ben sabi san den taki, dat' meki A taigi den taki: “Sanede un e krutu a uma disi? Na wan bun sani a du gi Mi. ₁₁Pôtisma de ala ten nanga unu, ma Mi no o de ala ten nanga unu. ₁₂Di a kanti a oli tapu Mi skin, a meki Mi skin klari fu beri. ₁₃Fu tru Mi e taigi un taki: Ala sei fu grontapu pe sma sa ferteri a bun nyunsu disi, den sma o memre a uma fu a sani san a du gi Mi.”

₁₄Dan wan fu den twarfu man, di ben nen Yudas Iskariot, go na den prenspari priester. ₁₅A aksi den taki: “Omeni un o pai mi efu mi gi Yesus abra na ini un anu?” Dan den gi en dritenti solfrumoni. ₁₆Sensi a ten dati, Yudas bigin luru wan bun okasi fu gi Yesus abra na den.

₁₇Tapu a fosi dei fu a fesa pe den e nyan brede san meki sondro dyesi, den man di ben e teki leri fu Yesus kon aksi En taki: “Pe Yu wani fu wi meki sani klari fu Yu kan nyan a Paska-nyanyan?” ₁₈Yesus piki den taki: “Un go na sowan sowan sma ini a foto, dan un taigi en taki: ‘A Meister seni taigi yu taki a ten fu En de krosbei. Na yu oso A o kon nyan Paska nanga den man di e teki leri fu En.’ ” ₁₉Den man du san Yesus taigi den, èn den meki a Paska-nyanyan klari.

₂₀Di neti tapu, Yesus nanga den twarfu man fu En teki presi sei a tafra. ₂₁Dan di den e nyan, Yesus taigi den taki: “Fu tru Mi e taigi un taki: Wan fu unu o seri Mi.” ₂₂Den man sari sote, èn wan fru wan den aksi En taki: “Masra, na mi?” ₂₃Yesus piki den taki: “A wan di dopu en brede ini a srefi komki nanga Mi, na en o seri Mi. ₂₄Bika a Manpikin fu Libisma sa dede leki fa a ben skrifi fu En kba na fesi. Ma a man di seri En mus luku bun! A ben o moro bun gi en efu noiti en m'ma ben meki en.” ₂₅Yudas, a man di seri Yesus, aksi En taki: “Meister, na mi?” Yesus piki en taki: “Na leki fa yu taki.”

₂₆Di den ben e nyan, Yesus teki wan brede, A blesi en, dan A broko en. Baka dati A gi den man di ben e teki leri fu En, dan A taki: “Un teki, dan un nyan. Disi na Mi skin.” ₂₇Dan Yesus teki wan kan nanga win, A taki Gado tangi fu en, dan A gi den man di ben e teki leri fu En. A taki: “Un alamala dringi fu a win. ₂₈Bika disi na Mi brudu san o stampu a ferbontu di Gado meki. A o lon fu meki furu sma kisi pardon fu den sondu. ₂₉Mi e taigi un taki: Mi no o dringi win moro, te leki Mi o dringi nyun win nanga unu na heimel pe Mi P'pa e rigeri.” ₃₀Baka di den singi fu gi Gado grani, den go na a Oleifbergi.