Dag 47 van 365- Leviticus 19 -20 en Matteüs 27:51-66

₁MASRA taigi Moses taki: ₂“Yu mus taigi a heri folku fu Israel taki: ‘Un mus santa bika Mi, MASRA, un Gado, santa.

₃Lespeki un mama nanga un papa èn memre fu un hori a sabatdei leki fa Mi komanderi unu. Mi na MASRA, un Gado.

₄Un no sa bemui nanga kruktu gado èn un no sa meki gowtu noso solfru popki fu den gado. Mi na MASRA, un Gado.

₅Te un o tyari wan freide-ofrandi gi MASRA, un mus tyari en sowan fasi, taki A abi prisiri nanga en. ₆Un sa nyan en tapu a dei di un tyari en leki ofrandi, nanga a tra dei fu en. Ma san tan kon miti a di fu dri dei, un sa bron nanga faya. ₇Efu un nyan en tapu a di fu dri dei, Gado no sa abi prisiri nanga a ofrandi dati. A sa de wan groskin sani. ₈A sma di nyan en fiti fu kisi strafu fu di a afrontu wan santa sani fu MASRA. Sowan sma un mus yagi fu têgo kmoto na mindri fu den Israelitisma.

₉Te un o koti nyanyan ini un gron, un no sa koti kon te na a lantyi fu a gron. Un no sa drai go baka tu fu piki san didon na gron. ₁₀Te un o piki droifi ini un droifidyari, un no sa drai go baka tu fu piki den droifi di fadon na gron. Un sa libi den dati gi den pôtiwan nanga gi den doroseisma. Mi na MASRA, un Gado.

₁₁Un no sa fufuru. Un no sa lei èn un no sa bedrigi wan trawan. ₁₂Te un o meki wan sweri un no mus kari Mi nen, efu un sabi taki a sani no tru. Tapu sowan fasi un e afrontu a nen fu un Gado. Mi na MASRA.

₁₃Un no sa puru wan sani tapu wan bedrigi fasi noso nanga tranga na wan trawan anu. Un no sa hori a moni fu wan wrokoman di yu yuru, te a tamara fu en. ₁₄Un no sa fluku wan dofuman èn un no sa poti wan sani na pasi gi wan breniman fu a fadon. Un sa lespeki Mi. Mi na Gado.

₁₅Te un e koti krutu un mus taki den sani leki fa den de. Un no sa gi wan sma leti fu di a de wan pôtisma. Un no sa teki a sei tu fu a guduwan fu a kisi leti. Un sa taki den sani leki fa den de. ₁₆Sma fu un eigi folku no mus sabi unu leki sma di e taki sani sondro fu prakseri bun. Yu no sa meki taki wan trawan kan lasi en libi fu di yu e takitaki sani. Mi na MASRA.

₁₇No hori wan trawan na ati. Efu yu mus warskow wan trawan fu wan sani, yu mus kari en dan yu warskow en. Tapu so wan fasi yu no e sondu fu en ede. ₁₈Yu no sa pai ogri nanga ogri èn yu no sa hori wan sma fu yu eigi folku na ati tu. Yu sa lobi wan trawan leki fa yu lobi yusrefi. Mi na MASRA.

₁₉Un mus tan du den sani fu Mi di un mus tan du. Fu den meti di un e kweki un no sa meki tu difrenti sortu meki pikinwan. Un no sa sai tu sortu sani na ini wan gron. Un no sa weri wan sani di meki nanga tu sortu krosi.

₂₀Efu wan man sribi nanga wan umasrafu di wan tra man ben o bai, dan den sa strafu a man nanga a uma awinsi a tra man no ben pai ete fu a umasrafu èn awinsi a uma no ben poti fri ete. Den no sa kiri den fu di a umasrafu no ben poti fri ete. ₂₁Leki paiman a man sa tyari wan man skapu kon leki ofrandi fu kisi pardon fu sondu. A sa tyari en go na mofodoro fu a tenti pe yu kan miti nanga Gado. ₂₂Nanga a ofrandi fu a man skapu di a man tyari kon leki paiman, a priester sa meki a man kon bun baka nanga Gado, dan a man sa kisi pardon fu a sondu di a du.

₂₃Te un doro ini a kondre èn un prani ala sortu froktu bon, un no sa fasi den froktu. Dri yari langa un no sa fasi den èn un no sa nyan den. ₂₄Ini a di fu fo yari un sa poti ala froktu aparti leki wan ofrandi fu prijse MASRA. ₂₅Ini a di fu feifi yari un kan nyan fu den froktu dan den bon sa gi moro furu froktu. Mi na MASRA, un Gado.

₂₆Un no sa nyan noti di abi brudu ete. Un no sa koti luku gi sma noso du tofruwroko. ₂₇Un no sa piri un sei ede èn un no sa koti a lantyi fu un barba puru ₂₈te wan sma fu un dede. Un no sa tyerfi un skin noso koti marki ini un skin tu. Mi na MASRA.

₂₉Un no sa broko den pikin fu un saka fu meki den tron motyo. Efu un du dati a heri kondre o huru èn furu nanga a syen sani dati. ₃₀Un sa hori a sabatdei leki fa Mi komanderi unu. Un mus lespeki a santa presi fu Mi. Mi na MASRA.

₃₁Un no sa go suku yepi na yeye fu dedewan noso na yeye di e taigi sma sani di de fu kon. Un no mus go suku den èn un mus no doti unsrefi nanga den. Mi na MASRA, un Gado.

₃₂Opo gi owrusma èn lespeki den. Lespeki yu Gado tu. Mi na MASRA.

₃₃Un no sa libi takru nanga wan doroseisma di e libi ini a kondre fu unu. ₃₄Un sa libi nanga wan doroseisma neleki en na wan sma fu Israel. Yu sa lobi en leki fa yu lobi yusrefi, bika unsrefi ben de doroseisma ini Egipte. Mi na MASRA, un Gado.

₃₅Un sa taki den sani leki fa den de te un e koti krutu. No bedrigi wan trawan tu te un mus marki wan sani, wegi wan sani noso kanti wan sani ini wan markikan. ₃₆Den wegi fu unu sa de soifri wegi èn den markikan mus de soifri sani. Mi na MASRA, di puru unu na ini Egipte. ₃₇Un sa du ala den sani fu Mi di un mus tan du èn un sa hori unsrefi finifini na ala den sani fu Mi. Mi na MASRA.’ ”

₁MASRA taigi Moses taki: ₂“Taigi den sma fu Israel taki: ‘Den sa kiri ibri Israelitisma noso ibri doroseisma di e libi na ini Israel, di tyari wan pikin fu en leki ofrandi gi Molok. A folku sa fringi ston na en tapu te leki a dede. ₃Misrefi sa drai Mi baka gi sowan sma. Mi sa yagi en fu têgo kmoto na mindri fu den Israelitisma fu di a tyari wan pikin fu en leki ofrandi gi Molok. Tapu a fasi dati a e doti a santa presi fu Mi èn a e afrontu Mi santa nen. ₄Efu a folku e tapu en ai gi a sani disi èn den no kiri a man, ma den libi en fu tyari wan pikin fu en leki ofrandi gi Molok, ₅dan Mi sa drai Mi baka gi a man disi nanga en heri famiri. Mi sa yagi en fu têgo kmoto na mindri fu den Israelitisma makandra nanga ala den sma di e waka na en baka. Bika den e huru gi Mi nanga a dini di den e dini Molok. ₆Mi sa drai Mi baka gi iniwan sma èn Mi sa yagi en fu têgo kmoto na mindri fu den Israelitisma, efu a huru gi Mi fu go suku yepi na den yeye fu dedewan noso na yeye di e taigi sma sani di de fu kon. ₇Un mus sorgu taki un santa èn un mus tan santa, bika Mi na MASRA, un Gado.

₈Un sa hori unu finifini na den sani di un mus tan du. Mi na MASRA, na Mi poti un aparti.

₉Un sa kiri a sma di fluku en papa noso en mama. Na ensrefi suku en dede efu a fluku en papa noso en mama. ₁₀Un sa kiri a man di go na bedi nanga wan tra man frow. Un sa kiri en nanga a frow nanga san a go na bedi. ₁₁Efu wan man go na bedi nanga a frow fu en papa, a e gi en papa syen nanga dati. Un sa kiri den ala tu. Na densrefi suku den dede. ₁₂Efu wan man go na bedi nanga a frow fu en manpikin, un sa kiri den ala tu. Na wan trutru hogri sani den du. Na densrefi suku den dede. ₁₃Efu wan man go na bedi nanga wan tra man, leki fa yu e go na bedi nanga wan uma, un sa kiri den ala tu. Na wan groskin sani den du. Na densrefi suku den dede. ₁₄Na wan trutru syen sani efu wan man go na bedi nanga wan uma èn nanga a mama fu a uma dati. Un sa bron den ala dri fu puru a syen dati na un mindri. ₁₅Un sa kiri a man di go na bedi nanga wan meti. Un sa kiri a meti tu. ₁₆Wan uma no sa go na wan meti tu fu go nanga a meti na bedi. Un sa kiri a uma nanga a meti dati. Den no sa tan na libi. Na densrefi suku den dede. ₁₇Na wan syen sani efu wan man teki en eigi sisa noso en afu sisa fu libi, dan a go na bedi nanga en. Den sa yagi den fu têgo kmoto na mindri fu den Israelitisma, leti na ala sma fesi. A man fiti fu kisi strafu fu di a go na bedi nanga en eigi sisa. ₁₈Efu wan man sribi nanga wan uma di abi en munsiki, un mus yagi a man nanga a uma dati fu têgo kmoto na mindri fu den Israelitisma. Bika a man opo a krosi fu a uma, meki a presi fu pe a uma e brudu de fu si èn a uma ben wani dati tu. ₁₉Yu no sa go na bedi nanga a sisa fu yu mama noso nanga a sisa fu yu papa. Bika nanga dati yu e gi yu famiri syen. Den fiti fu kisi strafu. ₂₀A man di go na bedi nanga en tanta e gi en omu syen. Den fiti fu tyari a strafu fu den sondu. Den no sa kisi pikin. ₂₁Na wan trutru syen sani efu wan man teki wan frow libi nanga san en brada ben e libi fosi. A e gi en brada syen nanga dati. Den no sa kisi pikin.

₂₂Ma un mus du ala den sani di un mus tan du èn un mus tan hori unsrefi finifini na ala den sani fu Mi. Efu un no du dati, a kondre pe Mi e tyari un go fu libi, sa spiti un puru. ₂₃Un no sa du den sani di a folku ben e du di Mi sa yagi puru na un fesi. Bika na fu di den ben e du ala den sani disi meki Mi no wani si den srefsrefi moro.’ ₂₄Ma un Mi taigi taki: ‘Un sa teki a kondre abra èn Mi sa gi en na unu, wan kondre pe merki nanga oni de bogobogo.

Mi na MASRA, un Gado. Na Mi poti un aparti fu den tra folku.’ ₂₅Un mus prati meti di bun fu nyan nanga meti di no bun fu nyan, èn fowru di bun fu nyan nanga fowru di no bun fu nyan. Un mus du disi fu un no tron wan groskin sani, fu di un nyan wan meti, wan fowru noso wan sani di e kroipi na gron, di no krin ini Mi ai. ₂₆Un mus sorgu taki un santa, bika Mi, MASRA, santa. Na Mi poti un aparti fu den tra folku, fu un kan de fu Mi. ₂₇Un sa kiri a man noso a uma di e meki a yeye fu dedewan taki noso di abi wan yeye di e taigi sma sani di de fu kon. Un sa fringi ston na den tapu kiri den. Na densrefi suku den dede.”

₅₁A srefi momenti dati a garden ini a santa presi priti langalanga na mindri fu loktu kon te na gron. A gron seki èn den bergiston priti. ₅₂Grebi opo tu, èn furu sma fu Gado di ben dede kba, kon na libi baka. ₅₃Den kmopo ini den grebi, èn baka di Yesus kon na libi baka den go ini a santa foto Yerusalem pe den sori densrefi na furu sma. ₅₄Den srudati di ben hori wakti na Yesus, nanga a kapten fu den, firi fa a gron seki. Èn di den si den sani di psa, den bigin frede srefsrefi. Dan den taki: “Trutru, a man disi ben de a Manpikin fu Gado.”

₅₅Furu uma fu Galilea, di ben waka nanga Yesus fu sorgu gi En, ben drape tu. Den ben tnapu farawe e luku. ₅₆Wantu fu den uma dati ben de Maria fu a foto Magdala, nanga Maria a m'ma fu Yakobus nanga Yosef, nanga a uma fu Sebedeus.

₅₇Di neti ben de fu tapu, wan guduman kon di ben nen Yosef. A ben de fu a foto Arimatea èn a ben de wan man di ben teki leri fu Yesus tu. ₅₈A go na Pilatus fu aksi en a dedeskin fu Yesus. Dan Pilatus seni taigi den srudati taki den kan gi en. ₅₉So Yosef teki a dedeskin fu Yesus, èn a domru en ini wan krin linnen krosi. ₆₀Dan a poti a dedeskin ini a nyun grebi fu en di a ben meki den diki ini a bergiskin. Baka dati a lolo wan bigi ston na a mofo fu a grebi fu tapu en, dan a gwe. ₆₁Maria fu Magdala nanga a tra Maria, ben sidon a pisten dati na abrasei fu a grebi.

₆₂A tra dei fu en, den prenspari priester nanga den Fariseiman go makandra na Pilatus. A ben de wan sabatdei. ₆₃Dan den taigi en taki: “Masra, wi memre taki di a bedrigiman disi ben de na libi ete, A ben taki tak' baka dri dei A ben o kon na libi baka. ₆₄Dat' meki wi e aksi yu fu meki srudati hori wakti na a grebi dri dei langa. Bika den man di ben teki leri fu En kan kon fufuru a dedeskin, dan den go ferteri den sma taki A kon na libi baka. A lei dati o bigi moro a fosi wan.” ₆₅Pilatus taigi den taki: “Un kan teki srudati, ma unu srefi luku fa un o seti a wakti drape.” ₆₆So den man go poti wan marki na a ston fu sma no kan puru en èn den poti srudati fu hori wakti.