Dag 51 van 365- Leviticus 26-27 en Marcus 2

₁“Un no sa meki kruktu gado gi unsrefi. Un no sa koti udu ston noso wan tra sani tu fu meki wan popki fu en noso poti wan ston tnapu fu anbegi en. Un no sa tyerfi prentyi tu ini ston, dan un poti den tnapu ini un kondre fu boigi gi en. Mi na MASRA, un Gado. ₂Un hori unu na den sani fu a sabatdei èn un mus abi lespeki gi a santa presi fu Mi. Mi na MASRA.

₃Efu un du den sani di un mus tan du èn un hori un na den gebod fu Mi, ₄dan Mi sa meki alen fadon tapu a yoisti ten. A gron sa gi nyanyan èn den bon sa gi froktu. ₅A ten fu masi a buba puru na a graan, sa tan te leki a ten doro fu un puru den droifi na den bon. A ten fu puru den droifi na den bon sa tan te leki a ten doro fu sai. Un sa nyan te un bere furu èn un sa libi sondro frede ini un kondre. ₆Mi sa meki freide de ini a kondre, fu un kan sribi sondro taki wan sani skreki unu. Mi sa yagi den krasi meti puru fu a kondre èn no wan tra kondre sa feti nanga unu. ₇Na unu sa meki den feyanti fu unu lon èn un sa kiri den na ini feti. ₈Feifi fu unu sa wini wan hondro èn wan hondro fu unu sa wini tin dusun fu un feyanti. Un sa kiri den na ini feti. ₉Mi sa sorgu gi unu. Mi sa meki un kisi furu pikin èn Mi sa meki un si taki Mi e hori Mi na a ferbontu. ₁₀Un sa nyan a nyanyan di un ben kibri poti ini maksin, te leki a ten doro fu un koti nyanyan baka. Dan un o abi fu puru a owru nyanyan ini den maksin fu meki presi gi a nyanyan di un koti now. ₁₁Mi sa poti Mi tenti tnapu na un mindri èn Mi no sa drai Mi baka gi unu. ₁₂Mi sa koiri na un mindri. Mi sa de un Gado èn un sa de Mi pipel. ₁₃Mi na MASRA, un Gado, di puru unu na ini Egiptekondre, fu un no de srafu fu den moro. Mi broko a hebi di ben de na un tapu fu un kan tnapu let'opu.

₁₄Ma efu un no wan arki Mi èn efu un no wan hori un na den gebod disi, ₁₅efu un no wani du den sani di un mus tan du, fu di un e si den fu noti, efu un no wani tan hori unsrefi na den sani fu Mi fu di un poti den na wan sei èn broko a ferbontu fu Mi fu di un no hori un na den gebod fu Mi, ₁₆dan na disi Mi sa du nanga unu: Mi sa meki ogri miti unu. Mi sa meki un kisi wan takru kosokoso nanga hebi korsu, di sa meki un ai kon dungru èn meki un bro de na tapu. Un sa sai fu soso bika den feyanti fu unu sa nyan sa un prani. ₁₇Mi sa drai Mi baka gi unu. Den feyanti fu unu sa fon unu èn den wan di no man si un srefsrefi na ai, sa basi unu èn un sa lowe sondro taki sma de na un baka.

₁₈Efu baka dati un no wani du ete san Mi taki, Mi sa strafu unu seibi tron moro hebi fu den sondu fu unu. ₁₉Mi sa broko a krakti tapu san un e bow. Mi no sa meki alen fadon. A heimel o gersi isri èn a gron o kon tranga leki kopro. ₂₀Un sa lasi un krakti fu soso. A gron no sa gi nyanyan èn den bon no sa gi froktu.

₂₁Efu un tan kaka un futu èn un no wani arki Mi, Mi sa strafu unu seibi tron moro hebi fu den sondu fu unu. ₂₂Mi sa lusu krasi meti na un tapu. Den sa kiri den pikin fu unu èn priti ala den meti fu unu di un e kweki. Den sa kiri someni sma, taki sma no sa de fu si na strati.

₂₃Efu den sani disi no meki un drai kon baka na Mi, ma un e tan kaka un futu, ₂₄dan Mi sa kaka Mi futu gi unu tu. Mi sa strafu un ete wan leisi seibi tron moro hebi fu den sondu fu unu. ₂₅Mi sa meki feti broko, fu di un no hori unu na a ferbontu. Te un go kibri ini den foto fu unu, Mi sa seni wan takru siki kon èn un o fadon na ini anu fu den feyanti fu unu. ₂₆Mi o meki wan angriten broko. Wan onfu nomo o sari fu tin umasma baka den brede. Den o abi fu prati a brede ini pikinpikin pisi gi den ososma fu den. Unu o nyan ma un bere no o furu.

₂₇Efu baka dati un no wani arki Mi ete èn un e tan kaka un futu, ₂₈dan nanga atibron Mi sa strafu unu seibi tron moro hebi fu den sondu fu unu. Iya, Misrefi sa strafu unu. ₂₉Dan un sa nyan den manpikin nanga den umapikin fu unu. ₃₀Mi sa broko den presi pe un e tyari ofrandi èn den altari tapu san un e bron wierook, Mi sa naki trowe. Mi sa trowe den dedeskin fu unu tapu wan ipi nanga den kruktu gado fu unu èn Mi sa drai Mi baka gi unu. ₃₁Mi sa broko den foto fu unu trowe na gron. De santa presi fu unu Mi sa figi puru. Mi no wani smeri den switi smeri fu den ofrandi fu unu moro. ₃₂Mi sa broko a kondre tapu sowan fasi, taki den feyanti fu unu di o teki a kondre abra no o tnapu nanga opo mofo te den si en. ₃₃Mi sa panya unu na mindri den tra folku. Tra kondre o de nomo na un baka fu feti nanga unu. A kondre fu unu o de wan sabana èn den foto fu unu o broko didon na gron. ₃₄Te a kondre didon leki wan sabana, a sa kisi a rostu di a ben mus kisi. Bika den no ben gi a kondre a rostu di a ben mus kisi ini den sabat-yari. Unsrefi o de na ini a kondre fu unu feyanti te a kondre sa kisi a rostu. A kondre sa kisi a rostu di a ben mus kisi. Ma un no ben gi a kondre a rostu di a ben mus kisi ini den sabat-yari. ₃₅A heri pisten di a kondre didon leki wan sabana, a sa rostu. Disi na a rostu di a ben mus kisi. Ma di un ben tan ini a kondre un no gi en a rostu ini den sabat-yari. ₃₆Mi sa poti sowan frede ini a ati fu den wan fu unu di tan na libi ini a kondre fu un feyanti, taki den o lon suku kibripe efu wan wiwiri opo wai nomo. Den sa lowe leki te sma de na den baka fu kiri den èn den o fadon, sondro taki wan sma de na den baka. ₃₇Den o lon fadon abra makandra leki te sma de na den baka fu kiri den, ma no wan sma o de na den baka. Un no o man hori feti nanga den feyanti fu unu tu. ₃₈Un o dede ini wan kondre san no de un eigi kondre èn den o beri unu ini a kondre fu un feyanti. ₃₉Den wan fu unu di de na libi ete, o pori gwe ini a kondre fu un feyanti, fu unu eigi sondu ede nanga fu di fu den afo fu unu.

₄₀Ma efu den taki sortu sondu den nanga den afo fu den du, taki Mi no ben man fertrow den, taki den ben kaka den futu gi Mi, ₄₁èn taki na fu dat'ede Mi ben kaka Mi futu baka gi den èn tyari den go na a kondre fu den feyanti fu den, efu den saka densrefi, efu den no tranga den ati èn efu den wani tyari a strafu fu den sondu, ₄₂dan Mi sa memre a ferbontu fu Mi nanga Yakob, Isak nanga Abraham. Mi sa memre a kondre. ₄₃Ma den sa abi fu gwe libi a kondre. Te den no drape, a kondre sa kisi a rostu di a ben mus kisi ini den sabat-yari. Ma un no ben gi en. Den sa butu fu den sondu di den du, fu di den no tan hori densrefi na den sani fu Mi, fu di den si den fu noti èn den no du den sani di den ben mus tan du, fu di den poti den na wan sei. ₄₄Ma srefi te den de ini a kondre fu den feyanti, Mi no sa drai Mi baka gi den. Mi no sa broko a ferbontu nanga den èn Mi no sa kiri den, fu di Mi no wani si den srefsrefi moro. Bika Mi na MASRA, den Gado. ₄₅Mi sa memre a ferbontu di Mi meki nanga den afo fu den. Mi puru den na ini Egiptekondre meki den tra folku si. Mi du dati fu Mi kan de wan Gado gi den. Mi na MASRA.”

₄₆Disi na den sani na san den sma fu Israel ben mus tan hori densrefi, den sani di den ben mus tan du, nanga den wèt. MASRA ben meki Moses taigi den ala den sani disi èn den ben de fu leri den sma fu Israel fa den ben mus libi nanga En.

₁MASRA taigi Moses taki: ₂“Taigi den sma fu Israel taki: ‘Te wan sma pramisi fu pai MASRA a moni di wan sma warti, ₃dan na disi a mus pai: gi wan mansma fu tutenti yari kon miti siksitenti yari, un sa pai feifitenti solfru moni. A moni disi mus wegi leki fa den e wegi den sani di de fanowdu gi a santa presi. ₄Efu na wan umasma, un sa pai dritenti solfru moni. ₅Efu na wan sma fu feifi yari kon miti tutenti yari, dan un sa pai tutenti solfru moni gi wan mansma nanga tin solfru moni gi wan umasma. ₆Efu na wan pikin fu wan mun kon miti feifi yari, dan un sa pai feifi solfru moni gi wan manpikin nanga dri solfru moni gi wan umapikin. ₇Efu na wan sma fu siksitenti yari noso moro owru, dan un sa pai tin-na-feifi solfru moni gi wan mansma nanga tin solfru moni gi wan umasma. ₈Efu a sma di pramisi fu pai a moni no man pai a moni, a sa tyari a sma gi san a bo pai a moni go na a priester. Dan a priester sa kari wan tra moni gi en, di a man pai.

₉Efu na wan meti di yu kan tyari leki wan ofrandi gi MASRA a sma ben pramisi, dan den mus si a meti dati leki wan meti di poti aparti. ₁₀Den no sa kenki en fu poti wan trawan ini en presi moro. Den no sa poti wan tra meti di no bun so, leki a wan di den ben poti kba. Den no sa poti wan moro bun wan tu, dan a wan di den ben poti kba. Efu den kenki a meti gi wan trawan, dan den mus si ala tu meti leki meti di poti aparti. ₁₁Efu a sma ben pramisi fu gi wan meti di no krin ini Gado ai, sobun wan meti di yu no kan tyari leki wan ofrandi gi MASRA, den sa tyari a meti go na a priester. ₁₂A priester sa luku san bun nanga san no bun na a meti, nanga omeni yu bo pai gi sowan meti. Te a priester taki omeni yu mus pai gi sowan meti, a sa tan so taki na dati yu mus pai. ₁₃Efu a sma di abi a meti wan bai a meti baka, dan a sa pai a moni di a priester ben taki tak' a mus pai gi a meti nanga tutenti prosenti moro na en tapu.

₁₄Te wan sma poti en oso leki wan santa sani aparti gi MASRA, a priester sa luku san bun nanga san no bun na a oso, nanga omeni yu bo pai gi sowan oso. Te a priester taki omeni yu mus pai gi a oso, dan a sa tan so taki na dati yu mus pai. ₁₅Efu a sma, di poti a oso aparti, wani bai a oso baka, a sa poti tutenti prosenti moro na en tapu, dan a oso sa de fu en.

₁₆Te wan sma poti wan pisi fu a gron fu en aparti gi MASRA, den sa luku omeni siri de fanowdu fu sai tapu a pisi gron dati, nanga omeni yu pai gi a siri. A moni di yu pai gi a siri sa de a moni di yu mus pai gi a pisi gron dati. Gi sowan tu hondro kilo tarwe yu sa pai feifitenti solfru moni. ₁₇Efu a poti a gron aparti na a bigin fu a yari fu gi baka, dan a sa tan so taki yu mus pai a moni fu a pisi gron dati te leki a tra yari fu gi baka. ₁₈Ma efu a poti a gron aparti baka a yari fu gi baka, dan a priester sa luku omeni yari de ete go miti a tra yari fu gi baka di de fu kon. Dan a sa pai fu den yari di libi ete. ₁₉Efu a sma di ben poti a gron aparti wan bai en baka, a sa poti tutenti prosenti moro na en tapu, dan a sa de fu en baka. ₂₀Ma efu a no bai a gron gi ensrefi baka ma a seri en gi wan tra sma, dan a no o man bai a gron baka. ₂₁Te a gron kon fri ini a yari fu gi baka, a sa de fu MASRA fu têgo. A sa kon ini anu fu den priester.

₂₂Efu wan sma bai wan gron, di no ben de fu en, dan a poti en aparti gi MASRA, ₂₃a priester sa luku omeni yari libi ete go miti a yari fu gi baka. Dan a priester sa taigi a sma omeni a mus pai gi a gron. A sma mus langa a moni a srefi dei dati gi a priester, leki wan sani di poti aparti gi MASRA. ₂₄Ini a yari fu gi baka, a gron e go baka ini anu fu a sma fu san a ben bai en, sobun a sma di ben abi a gron fosi.

₂₅Ala moni di mus pai, den sa wegi leki fa den e wegi den sani di de fanowdu gi a santa presi. Dati wani taki tak' wan sikkel na tutenti gera.

₂₆A fosi pikin fu wan kaw, wan skapu noso wan krabita, un no sa poti aparti bika den na fu MASRA kba. ₂₇Efu na a fosi pikin fu wan meti di no krin ini Gado ai, den sa luku omeni yu bo pai gi sowan meti, dan den sa bai en baka nanga tutenti prosenti moro na en tapu. Efu a sma no bai en baka, a priester sa luku omeni yu bo pai gi sowan meti, dan a seri en gi a moni dati.

₂₈Efu wan sma poti wan sani fu en aparti gi MASRA taki a no wani en baka, dan a sa de so fu têgo. Sowan sani yu no kan seri noso bai baka gi yusrefi. A no a abi trobi efu na wan libisma noso wan meti. Ala sani di gi fu têgo na MASRA, na tumsi santa sani. ₂₉No wan libisma di wan trawan gi fu têgo na MASRA, yu o man bai baka tu. Kiri nomo den sa kiri sowan sma.

₃₀Tin prosenti fu a gron, fu a nyanyan fu a gron nanga fu den froktu fu den bon na fu MASRA. A sa poti aparti gi MASRA. ₃₁Efu a sma wan bai a tin prosenti baka, a sa poti tutenti prosenti moro na en tapu. ₃₂Un sa meki ala den kaw, skapu noso krabita fu unu waka psa a tiki fu a man di e luku den. Ala den di fu tin meti di e psa a tiki un sa poti aparti gi MASRA. ₃₃Un no sa luku efu na wan bun meti noso efu a no de wan bun meti. Un no sa kenki a meti tu gi wan trawan. Ma efu un kenki en, dan ala tu meti sa poti aparti gi MASRA. Un no kan bai a meti baka.’ ”

₃₄Disi na den gebod di MASRA gi Moses tapu a Sinaibergi gi den sma fu Israel.

₁Baka wantu dei Yesus drai go baka na Kafarnaum, dan den sma kisi fu yere taki A de na oso. ₂Furu sma ben kon na En, taki srefi na mofodoro presi no ben de moro fu sma tnapu. So Yesus preiki a wortu fu Gado gi den. ₃Dan wantu sma kon nanga wan lanman na En. Fo man ben tyari en tapu wan matrasi. ₄Ma den no ben man doro na Yesus nanga a man, fu di den sma ben furu. Dat' meki den broko a daki opo tap'sei pe Yesus ben de. Baka di den puru wan pisi fu a daki, den saka a matrasi pe a man ben didon go na gron. ₅Di Yesus si a bribi fu den, A taigi a lanman taki: “Mi mati, yu kisi pardon fu yu sondu.”

₆Ma wantu sabiman fu Gado wèt ben sidon drape tu. Den ben taki na ini den ati taki: ₇“Fa a man disi kan taki so? A e afrontu Gado! Na Gado wawan kan gi pardon fu sondu.” ₈Ma wantron Yesus ben sabi ini Ensrefi taki na dati den e prakseri. Dan A aksi den taki: “Fu sanede sowan prakseri kon ini un ati? ₉San moro makriki? Fu taigi a lanman taki a kisi pardon fu en sondu, noso fu taigi en taki: ‘Opo, teki yu matrasi, dan yu waka.’ ₁₀Ma Mi o sori unu taki a Manpikin fu Libisma abi makti dya na grontapu fu gi sma pardon fu sondu.” Dan Yesus taigi a lanman taki: ₁₁“Mi e taigi yu fu yu opo, teki yu matrasi, dan yu go na oso.” ₁₂Ne a man opo. Wantewante a teki en matrasi, dan a waka fesi den alamala go na dorosei. Ala den sma ferwondru srefsrefi èn den gi Gado glori taki: “Noiti ete un si sowan sani!”

₁₃Yesus kmopo ini a oso go baka na a Meer fu Galilea. Ala den sma ben go nanga En, dan A bigin gi den leri. ₁₄Di Yesus ben de na pasi, A si Lefi, a manpikin fu Alfeus. A ben sidon pe den sma ben mus kon pai lantimoni. Yesus taigi en taki: “Kon nanga Mi!” Ne Lefi opo, èn a bigin waka na Yesus baka. ₁₅Bakaten Yesus go nyan na Lefi oso. Furu fu den man di e piki lantimoni, nanga tra sondusma, ben sidon e nyan makandra nanga Yesus nanga den man di ben e teki leri fu En. Bika bun furu fu den sortu sma disi ben de ini a bigi grupu sma di ben e waka nanga Yesus. ₁₆Den sabiman fu Gado wèt di ben de fu a grupu fu den Fariseiman, si taki Yesus ben e nyan makandra nanga sondusma nanga den man di e piki lantimoni. Fu dat'ede den aksi den man di ben e teki leri fu Yesus taki: “Fu sanede A e nyan makandra nanga den man di e piki lantimoni, èn nanga den sondusma?”

₁₇Di Yesus yere san den aksi, A piki den taki: “Sma di gesontu no abi datra fanowdu, ma na sma di e siki abi datra fanowdu. Mi no kon fu kari bun sma, ma Mi kon fu kari sondusma.”

₁₈A pisten dati den man di ben e teki leri fu Yohanes, nanga den Fariseiman, ben e faste. Dan wantu sma kon na Yesus taki: “Den man fu Yohanes nanga di fu den Fariseiman e faste. Ma fu sanede den man fu Yu no e du dati?” ₁₉Yesus piki den taki: “Den sma di kon na wan trow-oso no kan tan sondro fu nyan te a trowmasra de drape nanga den. Solanga a trowmasra de nanga den, den no kan faste. ₂₀Ma a ten o kon taki den o puru a trowmasra na den mindri. Dan ini den dei dati den sa faste. ₂₁No wan sma e lapu wan owru krosi nanga wan pisi nyun wan. Bika te a nyun wan o krempi, a o hari a owru wan priti èn a olo o kon moro bigi. ₂₂Sosrefi yu no e poti win di no lepi ete na ini owru winsaka. Bika te a win o kari dyesi, den winsaka o priti. Dan yu o lasi a win nanga den winsaka. Dat' meki yu e poti win di no lepi ete, na ini nyun winsaka.”

₂₃Tapu wan sabatdei Yesus ben e waka psa ini wan gron pe graan ben e gro. Di den e waka psa, den man di ben e teki leri fu Yesus broko wantu taki graan. ₂₄Dan den Fariseiman taigi Yesus taki: “Fu sanede den man fu Yu e du wan sani san a wèt no wani fu yu du tapu a sabatdei?” ₂₅Yesus piki den taki: “Noiti un no leisi san David du di a ben de ini nowtu, èn angri ben e kiri en nanga den man di ben de nanga en? ₂₆Ini a ten di Abyatar ben de granpriester, David go ini a oso fu Gado dan a nyan den brede san den ben poti aparti gi Gado. Owktu A gi den man fu En meki den nyan. Ma no wan sma kan nyan den brede dati, boiti den priester.” ₂₇Dan A taigi den taki: “Gado meki a sabatdei gi libisma, ma A no meki en leki wan strafu gi den. ₂₈So, a Manpikin fu Libisma na a basi fu a sabatdei.”