1Sarai, a frow fu Abram, no ben man kisi pikin gi en. A ben abi wan umasrafu, Hagar, di ben kmoto fu Egipte. 2Dan Sarai taigi Abram taki: “Arki, MASRA no wani fu mi kisi pikin. Go sribi nanga mi srafu. Kande en sa meki a pikin gi mi.” Dan Abram agri nanga san Sarai taigi en. 3Ne Sarai, a frow fu Abram, teki Hagar, a umasrafu fu en di ben kmoto fu Egipte, dan a tyari en gi Abram fu a sribi nanga en. A pisten dati Abram ben e libi tin yari kba na ini Kanaan. 4So Abram go sribi nanga Hagar èn Hagar hori bere. Ma di Hagar si taki a hori bere, a no ben e teri en basi srefsrefi moro. 5Ne Sarai taigi Abram taki: “Na fu yu ede meki a hati sani disi e miti mi. Na misrefi gi yu a umasrafu fu mi, ma now di a si taki a hori bere a no e teri mi srefsrefi moro. Meki MASRA koti a krutu fu mi nanga yu.” 6Ma Abram piki en taki: “Na yu srafu. Du nanga en san yu wani.” Ne Sarai pina Hagar sowan fasi, taki Hagar lowe gwe fu en.
7Dan a Engel fu MASRA miti nanga Hagar na wan watrabron ini a sabana. Disi na a watrapeti di de na a pasi di e go na Sur. 8A Engel fu MASRA aksi en taki: “Hagar, srafu fu Sarai, pe yu kmoto? Pe yu e go so?” Hagar piki taki: “Na lowe mi e lowe gi Sarai mi basi.” 9Ne a Engel fu MASRA taigi en taki: “Drai go baka na yu basi. Saka yusrefi gi en.” 10A Engel fu MASRA taigi en tu taki: “Mi sa gi yu furu bakapikin. Den o de so furu taki den no o de fu teri.” 11A Engel fu MASRA taigi en moro fara taki: “Yu de nanga bere èn yu o kisi wan manpikin. Yu mus kari en Ismael Bika MASRA yere yu nowtu. 12A o de wan man di e libi fri, sondro fu tan na wan presi. A o feti nanga ala sma èn ala sma o feti nanga en. A o libi mindri en famiri ma a o go en eigi pasi.” 13Dan Hagar kari MASRA di taki nanga en: A Gado di e si. A taki: “Bika dyaso mi si trutru taki Gado e luku fu mi.” 14Dat' meki den e kari a peti dati: a peti Lakai-Roi. A de na mindri Kades nanga Bered.
15Dan Hagar kisi wan manpikin gi Abram. Abram kari a boi di Hagar meki gi en, Ismael. 16Abram ben abi aititenti-na-siksi yari di Hagar kisi Ismael.
Genesis 17
A ferbontu fu Gado nanga Abram
1Di Abram ben abi neigitenti-na-neigi yari MASRA sori ensrefi na en, dan a taigi en taki: “Mi na A Gado di abi ala makti. Libi leki fa Mi wani taki yu mus libi. No meki mi feni fowtu na yu. 2Mi o meki wan ferbontu nanga yu. Mi o gi yu furu bakapikin.” 3Dan Abram trowe ensrefi nanga fesi na gron. Gado taigi en moro fara taki: 4“Luku, Mi e meki a ferbontu disi nanga yu: den bakapikin fu yu sa tron bigi folku. 5Fu dat'ede den no sa kari yu Abram moro langa, ma yu sa nen Abraham. Bika Mi o meki den bakapikin fu yu tron bigi folku. 6Mi o meki yu kisi furu bakapikin di o tron bigi folku. Sonwan fu den o tron kownu srefi. 7Mi e meki a ferbontu disi nanga yu, ma a o de fu den bakapikin fu yu tu. A ferbontu disi o de fu têgo. Mi sa de Gado gi yu, den pikin fu yu nanga den bakapikin fu yu. 8Mi sa gi yu nanga den bakapikin fu yu a kondre disi pe yu e libi now leki wan doroseisma. A heri kondre Kanaan sa de fu unu fu têgo èn mi sa de un Gado.”
9Gado taigi Abraham moro fara taki: “Yu, den pikin fu yu nanga den bakapikin fu yu mus hori unsrefi fu unu sei na a ferbontu fu mi. 10Disi na fa un mus hori unsrefi na a ferbontu: ala mansma na un mindri mus besnei. 11Un sa koti a fesibuba fu un manpresi puru. Dati sa de a marki fu a ferbontu fu Mi nanga unu. 12Fu têgo ala manpikin mus besnei aiti dei baka te den gebore. Disi de gi yu eigi folku, gi ala sma di gebore ini yu oso, nanga gi den sma di yu bai nanga moni ma di no de sma fu yu folku. 13Ala srafu di gebore ini yu oso nanga den wan di yu bai nanga moni mus fu besnei. Tapu a fasi disi a marki na yu skin sa sori taki Mi abi wan têgo ferbontu nanga yu. 14A man di no besnei sobun a man di no meki den koti a fesibuba fu en manpresi puru, den mus yagi fu têgo kmoto na mindri fu den Israelitisma, fu di a broko a ferbontu nanga Mi.”
15Gado taigi Abraham tu taki: “Yu no sa kari yu wefi Sarai moro, ma yu sa kari en Sara. 16Mi sa blesi en. Ensrefi sa gi yu wan manpikin tu. Iya, Mi sa blesi en taki den bakapikin fu en tron bigi folku. Bakapikin fu en sa de kownu srefi.” 17Dan Abram trowe ensrefi nanga fesi na gron. A lafu dan a prakseri na ensrefi: “Wan man fu wan hondro yari o man tron p'pa ete? Sara o man meki wan pikin ete nanga en neigitenti-na-neigi yari?” 18Ne a taigi Gado taki: “Tye, meki a pramisi fu yu de gi Ismael.” 19Ma Gado taigi en taki: “Kwet'kweti. Yu wefi Sara sa kisi wan manpikin èn yu mus kari en Isak Mi sa meki wan ferbontu nanga en. Disi sa de fu têgo èn a sa de tu gi den bakapikin fu en. 20Mi yere yu begi tu gi Ismael. Arki, Mi sa blesi en tu fu a kisi furu bakapikin. Den o tron wan bigi folku èn twarfu bakapikin fu en sa de kownu. 21Ma a ferbontu fu Mi na fu Isak wawan, a manpikin di Sara o meki tra yari gi yu, a srefi pisten disi.” 22Di Gado kba taki nanga Abraham a gwe libi en.
23A srefi dei dati ete Abraham teki en boi Ismael, ala den srafu di gebore ini en oso nanga den wan di a ben bai nanga moni, dan a besnei den. A koti a fesibuba fu den manpresi puru, leki fa Gado ben taigi en fu du. 24Abraham ben abi neigitenti-na-neigi yari di a besnei. 25Ismael, a manpikin fu en, ben abi tin-na-dri yari di a besnei. 26Abraham nanga en boi Ismael besnei tapu a srefi dei. 27Tapu a srefi dei dati ala den mansma ini en oso besnei tu. Ala srafu di gebore ini en oso nanga den wan di a ben bai nanga moni.
27“Un yere taki a skrifi taki: ‘Yu no mus huru.’ 28Ma Mi e taigi un taki: A sma di luku wan uma nanga a prakseri taki a wani en, huru na ini en ati nanga a uma dati kba. 29Dat' meki efu yu let' ai meki yu sondu, diki en puru dan yu trowe en gwe. Bika a moro bun gi yu taki wan pisi nomo fu yu skin e lasi, dan taki yu feni yusrefi nanga yu heri skin ini hel. 30Efu na yu let'anu meki yu sondu, kapu en puru dan yu trowe en gwe. Bika a moro bun gi yu taki wan pisi nomo fu yu skin e lasi, dan taki yu feni yusrefi nanga yu heri skin ini hel.”
No broko trow
31“A skrifi tu taki: ‘Wan man di e prati nanga en uma, mus gi en wan brifi di e sori taki a trow broko.’ 32Ma Mi e taigi un taki: Wan man no mus broko trow nanga en uma sondro taki a uma ben huru gi en. Efu a man du dati, a e meki taki a uma libi wan huru libi efu a trow baka, èn a e meki a man di trow nanga en libi wan huru libi tu.”
No meki sweri
33“Un yere tu taki a wèt fu Moses leri den bigisma fu unu taki: ‘Yu no sa broko wan sweri di yu meki, ma yu sa du san yu sweri gi Masra.’ 34Ma Mi e taigi un taki: Yu no mus meki sweri kwet'kweti. No sweri na heimel, bika heimel na a kownusturu fu Gado. 35Yu no mus sweri na grontapu, bika grontapu na a futubangi fu Gado. Yu no mus sweri na Yerusalem, bika Yerusalem na a foto fu a bigi Kownu. 36No sweri tu na yu ede, bika yu no kan meki no wan fu yu edewiwiri kon blaka noso weti. 37So dan, meki te yu e taki ‘iya,’ a tan ‘iya,’ èn meki te yu e taki ‘no,’ a tan ‘no.’ Bika ala san yu e taki moro leki dati, kmoto fu didibri.”
No pai ogri nanga ogri
38“Un yere taki a skrifi taki: ‘Efu wan sma naki wan trawan broko en ai, den mus broko a ai fu a sma dati baka. Èn efu wan sma naki wan trawan broko en tifi, den mus broko a tifi fu a sma dati baka.’ 39Ma Mi e taigi un taki: No meki trobi nanga a sma di e du yu ogri. Efu wan sma naki yu na a let'sei fu yu fesi, drai a tra sei gi en tu. 40Efu wan sma tyari yu go na krutu fu yu empi ede, gi en a dyakti fu yu tu. 41Efu wan sma dwengi yu fu tyari a lai fu en wan kilometer, tyari en tu kilometer gi en. 42Efu wan sma aksi yu wan sani, gi en san a aksi. Èn efu a wani leni wan sani fu yu, leni en.”
Fa fu lobi tra sma
43“Un yere taki a skrifi taki: ‘Yu mus lobi yu mati, èn yu mus hori yu feyanti na ati.’ 44Ma Mi e taigi un taki: Lobi yu feyanti, èn begi gi den sma di de na yu baka fu du yu ogri. 45Dan so yu sa de wan trutru pikin fu yu P'pa di de na heimel. Bika A e meki a son opo gi den sma di e du ogri, nanga gi den sma di e du bun. A e meki alen kon gi den sma di bun ini En ai, nanga den sma di no bun ini En ai. 46Bika efu yu lobi soso den sma di lobi yu, sortu pai yu abi? Bika srefi den man di e piki lantimoni e du dati. 47Efu yu e gi odi soso na den sma nanga san yu de bun, dan na wan aladei sani yu e du. Den sma di no sabi Gado e du a srefi sani. 48Ma yu mus bun dorodoro, soleki fa yu P'pa na heimel bun dorodoro.”
