Dag 60 van 365- Numeri 23-25 en Marcus 7:24-37

₁₃Ma Balak taigi Bileam taki: “Kon meki wi go na wan tra presi, fu pe yu kan si a folku. Dyaso yu e si wan pikin pisi nomo fu a folku. Yu no e si den alamala. Drape yu mus fluku den gi mi.” ₁₄Dan Balak tyari Bileam go na loktu tapu a Pisgabergi, na wan bigi opo wei di den e kari Sofim. Drape a bow seibi altari dan a tyari wan kaw nanga wan man skapu tapu ibri altari leki ofrandi. ₁₅Baka dati Bileam taigi Balak taki: “Tan tnapu dyaso na den ofrandi di yu bron. Mi o go pikinso moro fara fu abi wan miti nanga Gado.” ₁₆Dan MASRA miti nanga Bileam èn A taigi en san a ben mus taki. A taigi en taki: “Drai go baka na Balak, dan yu e taigi en san Mi taki.” ₁₇Di Bileam drai go baka, Balak ben tnapu drape ete pe a ben bron den ofrandi. En nanga den fesiman fu Moab. Ne Balak aksi en taki: “San MASRA taigi yu?” ₁₈Dan Bileam taki a san disi:

₂₇Ne Balak taigi Bileam taki: “Kon. Mi sa tyari yu go na wan tra presi. Kande a sa bun ini Gado ai efu yu fluku den gi mi fu drape.” ₂₈Dan Balak tyari Bileam go te na loktu fu a Peorbergi. Fu drape yu ben man si a heri sabana. ₂₉Dan Bileam taigi Balak taki: “Bow seibi altari dyaso gi mi, dan yu e meki seibi kaw nanga seibi man skapu klari leki ofrandi.” ₃₀Balak du san Bileam taigi en fu du. A tyari wan kaw nanga wan man skapu tapu ibri altari leki ofrandi.

₁Di den Israelitisma ben de na Sitim, den bigin waka baka den uma fu Moab. ₂Den uma ben e kari den kon fu kon, te den ben e srakti meti leki ofrandi gi den gado fu den. Dan a folku ben e nyan èn den ben e boigi gi den gado dati. ₃So Israel ben bigin moksi nanga Baal-Peor. Ne MASRA ati bron nanga Israel. ₄A taigi Moses taki: “Teki ala den edeman fu a folku, dan yu e anga den gi MASRA, meki ala sma si. Dan a faya atibron fu MASRA tapu Israel sa kowru.” ₅Ne Moses taigi den krutubakra fu Israel taki: “Un mus kiri ala den man abra san un abi fu taki, di moksi den srefi nanga Baal-Peor.”

₆Ma a pisten di Moses nanga heri folku e krei fesi a tenti pe yu kan miti nanga Gado, wan Israelitiman koiri kon nanga wan uma fu Midyan na den tapu. ₇Di Pinekas si dati, a opo kmoto mindri den trawan dan a teki wan lansri. Pinekas ben de a granpikin fu priester Aaron. En p'pa ben de Eleasar, a manpikin fu Aaron. ₈Dan Pinekas waka na baka a Israelitiman di ben kon nanga a uma, go te na ini a tenti pe den ben de, dan a sutu a man nanga a uma na den ondrobere. Ne a siki tapu fu kiri den Israelitisma. ₉Tutenti-na-fo dusun sma ben dede kba fu a siki. ₁₀Dan MASRA taigi Moses taki: ₁₁“Pinekas, a manpikin fu Eleasar, èn bakapikin fu priester Aaron, kowru a atibron fu Mi tapu den Israelitisma. Bika a opo gi Mi na den mindri. Dat' meki Mi no kiri den alamala ini a dyarusu di Mi e dyarusu. ₁₂Fu dat'ede yu mus taigi en taki: ‘Arki, Mi e sroto wan ferbontu fu freide nanga yu. ₁₃Yu nanga den bakapikin fu yu sa tan priester fu têgo, fu di yu opo gi yu Gado en sorgu taki den Israelitisma kon bun baka nanga Gado.’ ” ₁₄A Israelitiman di dede makandra nanga a uma fu Midyan, ben nen Simri. A ben de a manpikin fu Salu, wan famiri-edeman fu lo fu Simeon. ₁₅A uma fu Midyan di den kiri ben nen Kosbi. A ben de wan umapikin fu Sur, wan famiri-edeman ini Midyan. ₁₆MASRA taigi Moses taki: ₁₇“Un mus si den Midyanitisma leki un feyanti. Un mus kiri den ₁₈bika den si unu leki den feyanti. Den kisi un nanga triki. Dati de fu si na den sani di psa na Peor, nanga a sani di psa nanga Kosbi, den eigi sisa, a umapikin fu a edeman fu Midyan, di dede di a siki ben e rigeri fu a sani di psa na Peor.”

₂₄Yesus kmopo fu drape, dan A go na a kontren fu a foto Tirus. A go na wan sma oso, ma A no ben wani fu sma sabi pe A de. Ma toku sma kon sabi pe A e tan. ₂₅Wan uma ben abi wan umapikin di ben abi wan takruyeye na en tapu. Di a yere pe Yesus de, wantron a go na En, dan a fadon tapu en kindi na En futu. ₂₆A uma disi no ben de wan Dyusma. A ben gebore na ini Fenisia di ben de wan pisi fu Siria. A begi Yesus fu puru a takruyeye na tapu en umapikin. ₂₇Yesus taigi en taki: “Den pikin mus kisi nyanyan fosi. Bika a no bun fu puru a brede na a mofo fu den pikin, trowe gi den dagu.” ₂₈Ma a uma piki En taki: “Masra, Yu abi leti. Ma srefi den dagu ondro a tafra e nyan a sakasaka san e fadon fu den brede fu den pikin.” ₂₉Ne Yesus taigi en taki: “Fu di yu taki so, yu kan go na yu oso. A takruyeye kmopo tapu yu umapikin.” ₃₀Di a uma go na oso, a si taki a pikin didon tapu a bedi, èn a takruyeye ben kmopo na en tapu.

₃₁Yesus drai kmopo ini a kontren fu Tirus, dan A waka psa ini Sidon nanga Dekapolis go na a Meer fu Galilea. ₃₂Den sma tyari wan man kon na En di ben dofu èn di no ben man taki so bun. Dan den begi Yesus fu poti En anu na en tapu. ₃₃Yesus puru a man mindri den sma kon na wan sei, dan A poti En finga go ini a man yesi. A poti pikin spiti na En finga, dan a fasi a man tongo. ₃₄Yesus luku go na loktu, dan A dyeme. A taigi a man taki: “Efata!” Dat' wani taki: Kon opo! ₃₅Wantron a man ben kan yere, èn a ben kan taki bun. ₃₆Dan Yesus komanderi den sma taki den no mus taigi no wan sma. Ma o moro A ben taigi den fu no du en, o moro den ben panya a nyunsu. ₃₇Den sma ben ferwondru srefsrefi. Den taki: “Ala sani san a Man disi e du, A e du bun. A e meki dofusma yere, èn A e meki babawsma taki.”