Dag 72 van 365- Deuteronomium 20-22 en Marcus 13:21-37

₁Te un e hari go feti nanga den feyanti fu unu dan un si wan folku di bigi moro unu nanga asi nanga wagi, un no sa frede bika MASRA, un Gado, di puru unu ini Egipte, de nanga unu. ₂Leti fosi a feti bigin wan priester mus go na fesi fu taki nanga a folku. ₃A mus taigi den taki: “Israel, arki, un tnapu klari fu feti nanga un feyanti. No meki den tapu skreki gi unu, no frede, no degedege, no beifi gi den, ₄bika MASRA, un Gado, srefi e go nanga unu fu feti nanga den feyanti fu unu fu un kan wini a feti.” ₅Den edeman sa taigi a folku taki: “A sma di bow wan nyun oso, ma a no go tan ete na ini kan drai go na en oso fu a no dede ini a feti dan wan tra sma go tan ini en oso. ₆A sma di prani wan droifidyari ma di no nyan ete fu den froktu fu en, kan drai go na en oso fu a no dede ini a feti dan wan tra sma nyan den froktu fu en. ₇A sma di de fu trow nanga wan uma ma di no trow a uma ete, kan drai go na en oso fu a no dede ini a feti dan wan tra sma trow a uma.” ₈Den ofisiri sa taigi a folku taki: “Den sma di e frede nanga den sma di e degedege kan drai go na den oso fu den no meki den tra sma frede tu leki ensrefi.” ₉Te den ofisiri kba taki nanga a folku, den sa sori suma na den kapten fu den grupu.

₁₀Te un doro wan foto fu feti nanga en, un mus suku fosi fu seti en nanga den taki un no abi fu feti nanga den. ₁₁Efu den agri nanga unu èn den opo den bigi doro fu a foto gi unu, dan ala sma fu a foto di drape sa tron knekti fu unu fu dini unu. ₁₂Efu den no wani sroto freide nanga unu, ma den de fu feti nanga unu, dan un sa lontu a foto fu feti nanga en. ₁₃Dan MASRA, un Gado, sa gi a foto abra ini un makti èn un sa kiri ala mansma fu a foto nanga deigri. ₁₄Ma den frow, den pikin, den meti nanga ala tra sani di de ini a foto, ala den gudu fu a foto, un kan hori gi unsrefi. Un kan hori den gi unsrefi èn du nanga den san un wani fu di na MASRA, un Gado, gi un den. ₁₅Na so un sa du nanga ala den foto di de fara fu unu. Den foto di no de fu den folku disi. ₁₆Ma ini den foto fu den folku di MASRA, un Gado, o gi unu taki na fu unu, un no sa libi noti fu tan na libi. ₁₇Un sa kiri den Hetitisma, den Amoritisma, den Kananitisma, den Perisitisma, den Hiwitisma nanga den Yebusitisma, leki fa MASRA, un Gado, taigi un fu du. ₁₈Dan den no sa leri unu fu du ala den groskin sani di den e du gi den gado fu den, fu un du san MASRA, un Gado, no wani.

₁₉Te un e feti nanga wan foto èn un lontu en wan heri pisten kba fu teki en abra, un kan nyan fu den bon di tnapu lontu a foto ma un no sa kapu den bon trowe. Bika den bon a no libisma taki un mus hari den kon ini a feti tu. ₂₀Soso den bon fu san un sabi taki sma no e nyan den froktu fu den, den dati wawan un kan kapu trowe fu meki trapu fu kren feti nanga den sma fu a foto te leki un teki en abra.

₁Te un de ini a kondre di MASRA, un Gado, o gi unu dan un feni wan sma didon dededede ini wan wei sondro fu un sabi suma kiri en, ₂den fesiman nanga den krutubakra sa kmoto go luku. Den sa marki o fara a de kmoto fu a dedeskin go na den foto di de ini a birti. ₃Dan de fesiman fu a moro krosbei foto sa teki wan yongu kaw di no du no wan wroko ete èn gi san den no weri no wan wrokosani na en neki ete fu hari. ₄Den fesiman fu a foto sa tyari a yongu kaw go na wan dal pe noiti watra e mankeri èn pe noiti wan sma no drai a doti noso sai. Drape den sa drai a yongu kaw en neki broko. ₅Den priester, den manpikin fu Lefi, sa kon na fesi. Bika na den MASRA, un Gado, teki fu dini En, èn fu blesi sma ini a nen fu MASRA. Na den e koti trobi èn na den e krutu te wan sma du wan trawan wan sani. ₆Den fesiman fu a moro krosbei foto sa wasi den anu abra a yongu kaw, fu san den broko a neki ini a dal. ₇Dan den sa taki: “A no unu anu meki a brudu disi lon èn un ai no si suma du en. ₈MASRA, meki en bun nanga Yu folku Israel, di Yu ferlusu. No krutu Yu folku Israel fu a brudu disi di lon.” Dan Gado no sa krutu den fu a brudu di lon. ₉Tapu a fasi disi un no sa meki Gado krutu unu gi brudu san lon. Bika un du san bun ini MASRA ai.

₁₀Efu un hari go feti nanga un feyanti èn MASRA, un Gado, gi den abra ini un makti fu en teki den leki srafu, ₁₁dan un si wan moi uma mindri den srafu di fiti un ai èn di un wani leki frow, ₁₂un sa tyari en go na un oso. Drape a sa piri en ede èn a sa koti en nangra. ₁₃A sa puru a krosi di a ben weri di un tyari en gwe èn a sa tan wan mun langa ini un oso fu row gi en p'pa nanga en m'ma. Baka dati un kan teki en fu a tron un frow. ₁₄Efu un no wani en moro leki frow, dan un sa libi en meki a go pe a wani go. Un no sa seri en gi moni. Un no sa du nanga en leki fa un e du nanga srafu bika yu sribi nanga en leki frow.

₁₅Efu wan man abi tu frow èn a lobi a wan ma a no lobi a trawan, dan ala tu, a wan di a lobi nanga a wan di a no lobi, kisi manpikin gi en, èn a fosi manpikin na fu a frow di a no lobi, ₁₆dan a man no sa gi den leti di wan fosi manpikin abi na a manpikin fu a frow di a lobi, te a e prati den gudu fu en gi den manpikin. Tapu sowan fasi a no e gi a manpikin fu a frow di a no lobi san a mus kisi. ₁₇A sa si a manpikin fu a frow di a no lobi leki en fosi manpikin èn a sa gi en tu tron so furu, leki fa a musu, fu ala sani san o de fu en. Bika en na a fosi pikin di a meki nanga en krakti. Na en mus kisi den leti fu wan fosi manpikin.

₁₈Te wan man abi wan trangayesi manpikin di no wan arki, èn di no wan du san en p'pa nanga en m'ma e taigi en aladi den e priti en skin gi en, ₁₉en p'pa nanga en m'ma mus grabu en tyari go na a bigi doro fu a foto fu den, pe den fesiman fu a foto e de. ₂₀Den sa taigi den fesiman fu a foto taki: “A boi disi fu unu trangayesi èn a no e arki. A no e du san wi e taigi en fu du. A e libi wan yayo libi èn a e dringi drungu.” ₂₁Dan den man fu a foto sa fringi ston na en tapu meki a dede. Tapu a fasi disi un sa tyari wan kba kon na a ogri na un mindri. Heri Israel sa yere disi èn den sa frede.

₂₂Efu wan sma du wan sondu di fiti fu un kiri en, èn un kiri en tu fu anga en na wan postu, ₂₃un no sa libi a dedeskin na a postu a heri neti te a tamara. A srefi dei ete un sa bere en. Bika a fluku fu Gado de na tapu a sma di den anga na wan postu èn un no sa doti a kondre di MASRA, un Gado, gi unu taki na fu unu.

₁Efu yu si taki a kaw, a skapu noso a krabita fu wan sma fu yu eigi folku lasi pasi, yu no sa libi en fu a waka fu en, ma yu sa tyari en go gi yu kondreman. ₂Efu a sma di abi en no e libi krosbei noso efu yu no sabi suma abi en, yu sa hori en na oso na yu. A sa tan na yu te leki a sma di abi en suku en. Dan yu sa gi en baka. ₃A srefi fasi yu sa du nanga a buriki, a krosi nanga ala tra sani di wan sma fu yu folku lasi èn di yu feni. Yu no sa libi a sani sondro fu du yu plekti.

₄Efu yu si taki a buriki noso a kaw fu wan sma fu yu folku fadon na pasi, yu no sa libi en sondro fu yepi en. Yu sa yepi en fu opo a meti baka.

₅Wan umasma no sa weri mansma krosi. Wan mansma no sa weri umasma krosi. Bika ibrisma di du den sani disi de wan groskin sani gi MASRA, un Gado.

₆Efu yu de na pasi dan yu si wan fowrunesi ini wan bon noso na gron, èn wan m'ma fowru di sidon tapu den eksi noso di abi pikinwan, dan yu no sa teki den pikinwan makandra nanga a m'mafowru. ₇Yu sa libi a m'mafowru fu a frei gwe. Den pikinwan yu kan teki gwe nanga yu. Efu yu du so, a sa go bun nanga yu èn yu sa libi langa.

₈Te yu bow wan nyun oso, yu sa meki wan sani leki wan plata skotu lontu a daki fu en. Noso a o de yu fowtu efu wan sma fadon fu a daki.

₉Un no sa prani tu sortu sani ini un droifidyari. Efu un du dati dan ala sani di yu ben prani nanga a moni di yu kisi fu a droifidyari sa de fu Gado.

₁₀Un sa poti wan kaw nanga wan buriki makandra fu drai a doti gi unu.

₁₁Un no sa weri wan sani di meki fu tu sortu krosi. A no sa meki fu katun makandra nanga linnen.

₁₂Un sa meki sani leki kwasi na den fo uku fu a krosi san un e weri.

₁₃Efu wan man trow nanga wan uma, ma a no wan si a uma srefsrefi moro baka te den sribi leki man nanga uma, ₁₄èn a lei gi a uma fu gi en wan pori nen taki: “Mi trow nanga a uma disi, ma di un go na bedi mi si taki a no ben de wan yongu uma moro,” ₁₅a p'pa nanga a m'ma fu a pikin sa teki den sani di e sori taki a pikin ben de wan yongu uma ete. Den sa tyari en go na a bigi doro fu a foto, pe den fesiman fu a foto e de. ₁₆Dan a p'pa fu a pikin sa taigi den fesiman taki: “Mi gi mi umapikin leki frow na a man disi. Ma now a no wan si en srefsrefi. ₁₇Luku, a e lei gi en fu taki tak' a kon si taki mi umapikin no ben de wan yongu uma moro. Ma disi na den sani di e sori taki mi umapikin ben de wan yongu uma ete.” Te a p'pa taki dati, a sa bradi a krosi fesi den fesiman fu a foto. ₁₈Dan den fesiman fu a foto sa teki a man dan den strafu en. ₁₉Den sa meki a pai wan butu tu fu wan hondro solfru moni, dan den gi en na a p'pa fu a pikin, fu di a gi a wan yongu uma fu Israel wan pori nen. A pikin sa tan en frow. Solanga a e libi a no sa seni a pikin gwe.

₂₀Ma efu a tori tru èn no wan sani de di man sori taki a pikin ben de wan yongu uma ete, ₂₁den sa tyari a pikin go na mofodoro fu en p'pa oso. Dan den man fu a foto sa fringi ston na en tapu meki a dede. Den sa du dati fu di a du wan syen sani ini Israel. A sribi nanga wan man di a ben de ini en p'pa oso ete. Tapu a fasi disi un sa tyari wan kba kon na a ogri na un mindri.

₂₂Te un grabu wan man di didon nanga wan uma di trow, un sa kiri den ala tu. A man, di ben didon nanga a frow, nanga a frow tu. Tapu a fasi disi un sa tyari wan kba kon na ogri ini Israel.

₂₃Efu wan man miti ini a foto nanga wan uma di de fu trow nanga wan trawan dan a sribi nanga a uma, ₂₄un sa tyari den ala tu go na a bigi doro fu a foto, dan un fringi ston na den tapu kiri den. A uma mus dede, fu di a no bari suku yepi. A man sa dede, fu di sribi nanga a frow fu wan trawan. Tapu a fasi disi un mus tyari wan kba kon na a ogri na un mindri. ₂₅Ma efu na ini wan wei a man miti a uma di de fu trow, dan a grabu en, dan a dwengi en fu didon nanga en, un sa kiri soso a man di didon nanga a uma. ₂₆Un no sa du a uma noti. A no du no wan sondu di fiti tu un kiri en. A sani di a man du na a srefi leki te yu kiri wan sma fu yu eigi folku. ₂₇Bika na ini wan wei a man miti a uma. A uma di ben de fu trow bari suku yepi, ma no wan sma ben de fu kon yepi en.

₂₈Efu wan man miti nanga wan uma di de wan yongu uma ete èn di no de fu trow, dan a grabu en didon nanga en, ma den kisi en, ₂₉a man di didon nanga a uma sa pai a p'pa fu a uma feifitenti solfru moni. A sa teki a uma tu leki en frow, fu di a didon nanga en. Solanga a e libi a no sa seni en gwe.

₃₀Wan man no sa go na bedi nanga a frow fu en p'pa, noso a e gi en p'pa syen.

₂₁Efu wan sma sa taigi unu ini a ten dati taki: ‘Luku, a Mesias de dyaso,’ noso: ‘Luku, A de drape,’ no bribi en. ₂₂Sma o kon di o du leki den na a Mesias. Trawan o du leki den na profeiti. Den o du wondru èn den o meki un si marki. Nanga dati den o suku fu kori den sma di Gado ben teki gi Ensrefi. ₂₃Ma un dati mus luku bun! Mi e warskow unu na fesi.”

₂₄“Ma ini den dei baka a pinaten dati, a son o kon dungru èn a munkenki no o gi faya. ₂₅Den stari o fadon kmopo na loktu, èn ala den makti di de na loktu o seki. ₂₆Dan den sma o si a Manpikin fu Libisma e kon tapu den wolku nanga bigi krakti nanga glori. ₂₇Dan A o seni den engel fu En go fu tyari den sma kon na wan di A ben teki gi Ensrefi. A o teki den fu den fo uku fu grontapu pe a winti e kmopo, èn fu a moro fara presi fu grontapu go te na a moro fara uku fu heimel.

₂₈Un teki wan figabon leki eksempre. Te a bigin sproiti èn a e bigin gi nyun wiwiri, dan un sabi taki a dreiten de fu kon. ₂₉Na so un mus sabi tu taki te un si den sani disi e bigin psa, dan a ten de krosbei, a de let' na mofodoro. ₃₀Fu tru Mi e taigi un taki: Ala den sani disi o psa te den sma fu a ten disi de na libi ete. ₃₁Wan dei heimel nanga grontapu no o de moro, ma den sani san Mi taki o tan fu têgo.”

₃₂“No wan sma sabi a dei noso a yuru te a o psa. Den engel di de na heimel no sabi, èn a Manpikin srefi no sabi. Na a P'pa wawan sabi.

₃₃Fu dat'ede un mus tan na ai, fu di un no sabi oten a yuru o doro. ₃₄Un mus si a sani leki wan man di go na wan tra kondre, dan a libi en oso gi den knekti fu en. A libi wroko gi alamala, san nanga san den mus du, èn a taigi a waktiman tak' a mus hori wakti. ₃₅So un mus de na ai. Bika un no sabi oten a man di abi a oso o drai kon baka. Un no sabi efu a o kon na neti, mindrineti, musudei noso mamanten. ₃₆Un sorgu taki te a drai kon baka, a no kon miti unu e sribi. ₃₇San Mi e taigi unu, Mi e taigi ala sma: Un mus de na ai!”