Dag 73 van 365- Deuteronomium 23-25 en Marcus 14:1-26

₁Wan man di kisi mankeri na en manpresi noso wan man fu san den koti en manpresi puru, no sa teki prati ini den konmakandra fu MASRA. ₂Wan sma di gebore sondro taki en p'pa nanga en m'ma ben trow no sa kon ini a konmakandra fu MASRA. Fu têgo a no sa kon ini a konmakandra fu MASRA. ₃Wan Amonitisma noso wan Moabitisma no sa kon ini a konmakandra fu MASRA. Fu têgo den no sa kon ini a konmakandra fu MASRA, ₄fu di den no gi un nyanyan nanga dringi di un ben kmoto na ini Egipte. Den ben yuru Bileam tu, a manpikin fu Beor, fu a foto Petor ini Mesopotamia, fu fluku unu. ₅Ma MASRA, un Gado, no arki Bileam, èn A drai a fluku ini blesi gi unu, fu di MASRA, un Gado, lobi unu. ₆Solanga un e libi, un no sa suku fu libi ini freide nanga den noso yepi den fu sani go bun nanga den. ₇Un no mus si den Edomitisma leki noti, bika den na famiri fu unu. Un no sa si den sma fu Egipte leki noti tu, bika un ben de doroseisma ini den kondre. ₈Den bakapikin fu den kan kon ini den konmakandra fu MASRA.

₉Te a legre fu unu e hari go feti nanga den feyanti fu unu, un no sa du no wan sani di sa meki taki un no krin. ₁₀Efu wan man de na un mindri di no krin, fu di wan sani psa nanga en neti, a sa go dorosei fu a kampu. A no sa kon ini a kampu. ₁₁Te a son e saka a sa wasi en skin èn te neti e fadon a so kon ini a kampu baka. ₁₂Un mus sorgu taki wan presi de na dorosei fu a kampu, fu un go du un fanowdu. ₁₃Un mus abi wan pikin skopu na unu. Dati na fu un diki wan olo te un e du un fanowdu èn fu un tapu a olo baka. ₁₄Bika MASRA, un Gado, e koiri ini a kampu, fu yepi unu èn fu gi den feyanti fu unu abra ini un makti. Fu dat'ede a kampu fu unu mus santa. A no mus si noti san no fiti fu A drai en baka gi unu.

₁₅Un no sa tyari wan srafu di lowe kmoto fu en basi go baka na en basi. ₁₆A kan tan na unu ini wan fu den foto fu unu di a wani. Un no sa meki a libi tranga gi en.

₁₇No wan uma noso man ini Israel sa seri en skin na a santa presi. ₁₈A moni di wan uma kisi di a seri en skin nanga a moni di wan man kisi di a seri en skin un no sa tyari kon ini a oso fu MASRA, un Gado, leki wan ofrandi di un ben pramisi fu gi. Bika den tu sani disi na groskin sani gi MASRA, un Gado.

₁₉Te un leni wan sma fu Israel leki unsrefi wan sani, un no mus aksi fu pikinso moro na en tapu. Un no mus du dati nanga moni, nanga nyansani noso iniwan tra sani. ₂₀Fu wan doroseisma un kan aksi pikinso moro na en tapu te un leni en wan sani. Ma fu wan sma fu Israel leki unsrefi un no sa aksi pikinso moro na tapu. Dan MASRA, un Gado, sa blesi unu ini ala sani san un o du ini a kondre di un e go fu teki abra.

₂₁Te un pramisi MASRA, un Gado, wan sani, un no sa draidrai fu du san un pramisi. Bika efu un no du san un ben pramisi, dan MASRA, un Gado, sa aksi unu a sani di un ben pramisi En, èn a o de wan sondu di yu du, fu di yu no du san yu ben pramisi. ₂₂Efu un no ben meki wan pramisi, dan un no bo sondu tu. ₂₃San un taki, un mus du tu. Bika sondro fu sma dwengi unu, unsrefi pramisi MASRA, un Gado, wan sani nanga un eigi mofo. ₂₄Te go ini wan sma droifidyari un kan nyan someni droifi leki un wani, ma un no sa tyari gwe ini wan sani.

₂₅Te un de ini wan tra sma gron mindri a karu di a prani, un kan broko nanga un anu someni leki un man, ma un no mus koti nanga babun-nefi.

₁Efu wan man trow nanga wan uma ma a no lobi en moro fu di a uma du wan sani di no fiti, a sa gi a uma wan brifi taki a trow broko èn seni en gwe. ₂Te a uma gwe fu a man oso, a kan tron a frow fu wan trawan. ₃Ma efu a di fu tu man nanga san a e libi no lobi en moro tu, èn a seni en gwe fu en oso nanga wan brifi taki a trow broko, noso efu a di fu tu man nanga san a e libi kon dede, ₄dan a fosi man di ben seni a uma gwe no sa teki a uma baka leki en frow, bika a uma no krin moro gi en. Efu a teki a uma baka, dati o de wan groskin sani ini MASRA ai. Un no sa meki den sondu disi psa ini a kondre di MASRA, un Gado, o gi unu taki na fu unu.

₅Efu wan no trow tumsi langa, un no sa seni en go na feti noso meki a du wroko ini a legre. Wan yari langa a sa de fri fu meki prisiri nanga en uma.

₆Un no sa teki a miri fu wan sma leki panti noso a tapusei wan fu den tu ston nanga san a sma e mara sani. Efu yu du dati a de a srefi leki na a sma libi yu teki leki panti.

₇Te un kisi wan sma di tyari wan sma Israel leki ensrefi gwe nanga tranga, dan a seri en leki srafu, un sa kiri a sma di du a sani dati. Tapu a fasi disi un sa tyari wan kba kon na a ogri na un mindri.

₈Sorgu taki un du ala sani fin'fini di den lefiti priester taigi un fu du te wan sma abi gwasi. Un mus hori unsrefi fin'fini na den sani di Mi taigi den fu du. ₉Memre san MASRA, un Gado, du nanga Miryam di un ben de na pasi di un ben kmoto na ini Egipte.

₁₀Awinsi wan sma mus pai un wan sani, un no sa go ini en oso go teki wan sani leki panti. ₁₁Un sa tan tnapu na dorosei. A man di mus pai unu sa tyari a panti kon srefi na dorosei gi unu. ₁₂Efu na wan pôtiman, yu no sa teki a dyakti di a gi yu leki panti fu tapu yu skin te neti. ₁₃Te son e saka un sa gi en a langa dyakti baka di a ben gi leki panti te son. Dan a sa tapu en skin nanga en eigi dyakti te a e go sribi èn a sa blesi yu. Disi sa de wan bun sani di un du ini a ai fu MASRA, un Gado.

₁₄Un no sa meki a libi tranga gi wan pôtiman di e wroko gi en deibrede. Awinsi na wan sma fu Israel leki unsrefi noso wan doroseisma di e tan ini wan fu den foto ini a kondre fu unu. ₁₅Tapu a dei di a wroko un sa pai en san a mus kisi. Son no mus saka sondro fu un pai en. Bika na wan pôtiman di abi a moni fanowdu. No meki a go kragi fu yu na MASRA, noso sa sondu yu sondu.

₁₆Un no sa kiri p'pa nanga m'ma fu wan sani di den pikin fu den du. Un no sa kiri pikin tu fu wan sani di den bigisma fu den du. Ala sma sa dede fu un eigi sondu.

₁₇Un sa gi wan doroseisma nanga wan pikin di no abi p'pa nanga m'ma moro, den leti di den mus kisi. Un no sa teki a tapusei krosi fu wan uma di masra dede kba, leki panti. ₁₈Un no sa fergiti taki un ben de srafu na ini Egipte èn taki na MASRA, un Gado, puru un drape. Fu dat'ede mi e taigi unu fu du so.

₁₉Te un e tyari a nyan fu un gron go poti ini un maksin, dan un si taki un fergiti wan bosu karu ini a gron, un no sa drai go baka go teki en. Dati sa de gi a doroseisma, a pikin di no abi p'pa nanga m'ma moro nanga gi a uma di masra dede kba. Efu un du so, MASRA, un Gado sa blesi unu ini ala wroko di un e du. ₂₀Te un e naki den oleif fu unu puru na den bon, un no sa luku ete wan leisi efu moro no tan na baka na den taki. San tan na baka na gi a doroseisma, a pikin di no abi p'pa nanga m'ma moro nanga gi a uma di masra dede kba. ₂₁Te un e piki den droifi fu un droifidyari, un no sa waka a di fu tu leisi psa fu luku efu noti no tan na baka. San tan na baka na gi a doroseisma, a pikin di no abi p'pa nanga m'ma moro nanga gi a uma di masra dede kba. ₂₂Un no sa fergiti taki un ben de srafu na ini Egipte. Fu dat'ede mi e taigi unu fu du so.

₁Te tu man kisi wan trobi èn den go na fesi krutubakra nanga en, a krutubakra sa taki suma abi leti nanga suma no abi leti. ₂Efu a wan di no abi leti fiti fu kisi fonfon nanga wan tiki, a krutubakra sa meki a didon leti pe a de, dan a sa meki den gi en someni wipi nanga wan tiki, di fiti fu a kisi. ₃Den kan gi en te nanga fotenti wipi. No moro. Bika efu un gi en moro leki dati un o meki taki sma no lespeki en moro.

₄Un no mus tai a mofo fu wan kaw san e masi a buba fu puru a graan.

₅Te tu brada e tan makandra, dan wan fu den dede sondro fu libi wan manpikin na baka, a frow fu a wan di dede no sa tron a frow fu wan man fu wan tra famiri. A brada fu en masra sa sribi nanga en, èn a sa trow nanga en, fu du en plekti leki swagri. ₆A fosi manpikin di a sa kisi, sa tyari a nen fu a omu di dede. Tapu a fasi disi en nen no e dede gwe ini Israel. ₇Ma efu a man no firi fu trow nanga a frow fu en brada, a frow sa go na a bigi doro fu a foto pe de fesiman e de. Dan a sa taigi den taki: “A brada fu mi masra no wani fu a nen fu en brada tan na ini Israel. A no wani du en plekti leki swagri.” ₈Dan den fesiman fu a foto sa seni kari en fu taki nanga en. Efu a man tan hori taki a no wani trow nanga a uma, ₉a uma sa puru den susu fu a man na en futu fesi den fesiman, a sa spiti ini a man fesi, dan a sa taki: “Disi den mus du nanga a man di no wani meki pikin gi en brada.” ₁₀Dan den sa kari en famiri ini Israel: A famiri di no weri susu.

₁₁Efu tu man e feti, dan a frow fu wan fu den kon ini a feti fu yepi en masra, dan a grabu a tra man na en manpresi, ₁₂den sa kapu a anu puru fu a uma dati. Un no sa sari en.

₁₃Un no sa abi tu sortu wegi, wan lekti wan nanga wan hebi wan, ini un saka. ₁₄Un no sa abi tu sortu kan tu, wan bigi wan nanga wan pikin wan, nanga san un e marki sani ini un oso. ₁₅Un sa abi wan soifri wegi nanga wan soifri kan nanga san un e marki sani. Dan un sa libi langa ini a kondre di MASRA, un Gado, o gi unu. ₁₆Bika MASRA, un Gado, no lobi den sma srefsrefi di abi tu sortu wegi nanga sortu kan èn di e bedrigi trawan.

₁₇Un no mus fergiti san Amalek du nanga unu na pasi di un kmoto na ini Egipte. ₁₈Di un ben weri èn kon swaki, a sori taki a no ben e span nanga Gado. A koti a bakapisi fu a grupu fu unu puru, pe den moro swakiwan de dan a feti nanga den. ₁₉Te MASRA, un Gado, meki un wini ala den feyanti fu unu ini a kondre di MASRA, un Gado, o gi unu taki na fu unu, un mus sorgu taki figi a folku fu Amalek puru na grontapu. Un no mus fergiti fu du dati.

₁A ben de tu dei fosi Paska nanga a fesa pe den e nyan brede san meki sondro dyesi. Den prenspari priester nanga den sabiman fu Gado wèt ben e suku wan fasi fa den ben o man kisi Yesus nanga wan triki fu ben kan kiri En. ₂Ma den taki: “Un no mus grabu En tapu den dei fu a fesa, noso a folku o meki dyugudyugu.”

₃Yesus ben de na Betania, na a oso fu wan man di den ben kari Gwasi Simon. Di Yesus ben e nyan, wan uma kon na En nanga wan albast batra di ben furu nanga bun diri oli san ben meki fu nardus rutu. A uma broko a neki fu a batra, dan a kanti a oli tapu Yesus ede. ₄Ma wantu sma drape ben mandi nanga a uma. Den aksi makandra taki: “Sanede a uma fermorsu a oli? ₅Un ben kan seri en gi moro leki dri hondro solfrumoni, èn prati a moni gi pôtisma.” So den ben e krutu a uma. ₆Ma Yesus taki: “Un libi en. Sanede un e krutu en? Na wan bun sani a du gi Mi. ₇Pôtisma de ala ten nanga unu. Oten un wani, un kan du bun gi den. Ma Mi no o de ala ten nanga unu. ₈A uma du san a man. A lobi oli na Mi skin na fesi fu meki Mi klari fu den beri Mi. ₉Fu tru Mi e taigi un taki: Ala sei fu grontapu pe sma sa ferteri a bun nyunsu, den sma o memre a uma fu a sani san a du gi Mi.”

₁₀Dan Yudas Iskariot, wan fu den twarfu man di ben e teki leri fu Yesus, go na den prenspari priester fu gi Yesus abra na ini den anu. ₁₁Di den man yere san Yudas ben wani du, den ben breiti èn den pramisi en tak' den o gi en moni. Dan a bigin luru wan bun okasi fu gi Yesus abra na den.

₁₂Na a fosi dei fu a fesa pe den e nyan brede san meki sondro dyesi, den sma ben mus srakti wan pikin skapu fu nyan Paska. Dan den man di ben e teki leri fu Yesus aksi en taki: “Pe Yu wani fu wi go meki sani klari fu Yu kan nyan a Paska-nyanyan?” ₁₃Dan Yesus seni tu fu den man di ben e teki leri fu En fu go du wan sani gi En. A taki: “Un go ini a foto, dan wan man di e tyari wan kroiki o kon miti unu. Un waka na en baka. ₁₄A man o go ini wan oso. Dan un mus taigi a man di abi a oso taki: ‘A Meister seni aksi pe a kamra de pe A kan nyan Paska nanga den man di e teki leri fu En.’ ₁₅Dan a man o sori unu wan bigi kamra na sodro, di seti èn di abi ala sani kba. Drape un mus meki a Paska-nyanyan klari gi wi.” ₁₆Na so den man go na a foto èn ala sani waka soleki fa Yesus taki. Dan den meki a Paska-nyanyan klari.

₁₇Di neti tapu, Yesus kon nanga den twarfu man fu En. ₁₈Di den ben e nyan, Yesus taigi den taki: “Fu tru Mi e taigi un taki: Wan fu unu di e sidon nyan dyaso nanga Mi, o seri Mi.” ₁₉Den man bigin sari, dan wan fru wan den aksi En taki: “Masra, na mi?” ₂₀Yesus piki den taki: “Na wan fu unu, a wan di e dopu en brede ini a srefi komki nanga Mi. ₂₁Bika a Manpikin fu Libisma sa dede leki fa a ben skrifi fu En kba na fesi. Ma a man di seri En mus luku bun! A ben o bun gi en efu noiti en m'ma ben meki en.”

₂₂Di den ben e nyan, Yesus teki wan brede, A blesi en, dan A broko en. Baka dati A gi den man di ben e teki leri fu En, dan A taki: “Un teki. Disi na Mi skin.” ₂₃Dan Yesus teki wan kan nanga win, A taki Gado tangi fu en, dan A gi den man. Dan den alamala dringi. ₂₄A taigi den taki: “Disi na Mi brudu san o stampu a ferbontu di Gado meki. A o lon gi furu sma. ₂₅Fu tru Mi e taigi un taki: Mi no o dringi win moro, te leki Mi o dringi nyun win pe Gado e rigeri.”

₂₆Baka di den singi fu gi Gado grani, den go na a Oleifbergi.