Dag 75 van 365- Deuteronomium 28-29 en Marcus 14:53-72

₁“Efu un arki bun san MASRA, un Gado, e taigi unu èn efu un hori unsrefi trutru na ala den gebod di mi e leri unu tide, dan MASRA, un Gado, o gi un moro makti moro ala tra folku na grontapu. ₂Efu un arki san MASRA, un Gado, e taigi unu, un o si den blesi disi na ini un libi:

₃A blesi fu Gado sa de na un tapu ini a foto nanga te un de ini un gron.

₄A blesi fu Gado sa de tapu den pikin fu unu, tapu den sani di un prani nanga den pikin fu den meti fu unu: de pikin fu den kaw, nanga den pikin fu den skapu nanga den krabita fu unu.

₅A blesi fu Gado sa de tapu a nyanyan ini un baskita nanga a brede fu unu.

₆A blesi fu Gado sa de na un tapu te un e go nanga te un e kon.

₇MASRA sa fon den feyanti fu unu di ben wan feti nanga unu, dan A o gi den abra ini un makti. Leki wán man den o kon na un tapu, ma den o panya ala sei te den e lon gwe gi unu.

₈A blesi fu Gado sa de na tapu den maksin fu unu, nanga ala sani di unu e du. A sa blesi unu ini a kondre di MASRA, un Gado, o gi unu.

₉MASRA sa teki un leki En santa folku, leki fa A ben pramisi un taki A bo du, efu un hori unsrefi na den gebod fu MASRA, un Gado, èn efu un libi leki fa En wani. ₁₀Dan ala folku sa si taki MASRA teki un leki en folku èn den sa lespeki unu.

₁₁MASRA sa gi un ala sani bogobogo. A sa gi un furu pikin. A sa gi den meti fu unu furu pikin èn a gron fu unu o gi furu nyanyan, ini a kondre di MASRA sweri na den afo fu unu, taki o gi en na unu.

₁₂MASRA sa opo heimel, a bigi kamra fu En pe den gudu fu En de, èn seni a alen tapu a yoisti ten kon gi a gron fu unu. A sa blesi ala sani di un e du taki un o man leni furu folku sondro taki unsrefi abi fu leni.

₁₃Efu un hori unsrefi trutru na den gebod fu MASRA, un Gado, di mi e leri un tide, dan MASRA sa meki un de na fesi, no na baka. Un sa go nomo nanga fesi, no nanga baka. ₁₄Ma un mus hori unsrefi na ala den gebod di mi gi un tide. No wan fasi un mus du wan tra sani leki san den e taki. No waka baka tra gado èn no dini den.

₁₅Efu un no arki san MASRA, un Gado, e taigi unu, èn efu un no hori unsrefi na ala den gebod nanga den sani di un mus tan du, dan den fluku disi sa de na un tapu.

₁₆A fluku fu Gado sa de na un tapu ini a foto nanga te un de ini un gron.

₁₇A fluku fu Gado sa de tapu a nyanyan ini un baskita nanga a brede fu unu.

₁₈A fluku fu Gado sa de tapu den pikin fu unu, tapu den sani di un prani, tapu den pikin fu den kaw, nanga den pikin fu den skapu nanga den krabita fu unu.

₁₉A fluku fu Gado sa de na un tapu te un e go nanga te un e kon.

₂₀MASRA sa fluku ala sani san un e du. A sa meki bruya de na un mindri èn A sa meki a wan nowtu baka a trawan miti unu. Fu di un ati ben takru so fu un drai un baka gi Gado, A sa meki den feyanti fu unu kiri un es'esi.

₂₁MASRA sa meki wan takru siki de nanga unu te leki a kiri un alamala ini a kondre, di un e go fu teki abra.

₂₂MASRA sa naki un nanga wan takru kosokoso, tranga korsu, nanga tra takru siki. A sa meki wan tranga dreiten de, nanga siki di e pori ala sani san un prani. Den sani disi sa psa nanga unu te leki un dede. ₂₃A heimel na loktu sa gersi kopro èn a gron ondro un futu sa gersi isri.

₂₄MASRA sa meki fini santi fadon tapu a kondre. A sa fadon leki alen fu loktu kon na un tapu, te leki un dede.

₂₅MASRA sa gi un abra na un feyanti. Leki wán man un o go na den tapu, ma un o panya ala sei te un e lon gwe gi den. Un sa de wan eksempre gi ala kondre na grontapu. Den sa frede te den si san miti unu. ₂₆Tingi fowru nanga krasi meti sa nyan den dedeskin fu unu, sondro taki wan sma yagi den gwe.

₂₇MASRA sa naki un nanga butsweri, leki fa A ben du nanga den sma fu Egipte. A sa meki unu kisi soro, flaka nanga krasikrasi, di no man dresi.

₂₈MASRA sa meki un kon law, un o breni èn un o lasi un ferstan. ₂₉Bigibigi dei un o waka lontu e firifiri pasi leki wan breniman. Noti fu unu sa waka bun. Dorodoro den sa pina unu, fufuru unu èn sma no sa de fu yepi unu.

₃₀Un o de fu trow nanga wan uma, ma wan tra man o sribi nanga en. Un o bow wan oso, ma un no o tan na ini. Un o prani wan droifidyari, ma un no o nyan den froktu fu en.

₃₁Den o srakti den kaw fu unu leti na un fesi, ma unsrefi no o nyan den. Den o fufuru un buriki tyari gwe leti pe un de èn un no o si en moro. Den o gi den kaw nanga krabita fu unu na den feyanti fu unu sondro taki wan sma kon yepi unu.

₃₂Den o gi den manpikin nanga den umapikin fu unu abra na ini anu fu tra folku leti na un fesi. Un angri fu si den, ma un no man du noti.

₃₃Wan folku di un no sabi sa nyan san un prani nanga un sweti. Dorodoro den sa libi takru nanga unu èn pina unu. ₃₄Un o lasi un ferstan fu den sani di un o si.

₃₅MASRA sa meki bigi butsweri broko na un kindi nanga un bowtu, di no man dresi. Den o broko fu un ede go te na un futu.

₃₆MASRA sa meki den tyari unu nanga a kownu di un teki fu tiri unu, go na wan kondre di un nanga den afo fu unu no sabi. Drape un sa dini gado di meki fu udu nanga ston. ₃₇Un sa de wan eksempre gi ala den folku fu den kondre pe MASRA e tyari un go. Den o koti odo gi unu èn den o teki un leki spot'popki.

₃₈Un o sai furu ini un gron, ma un o koti pikinso nomo, bika sprenka o nyan ala. ₃₉Un o prani furu droifibon ini un droifidyari èn un o wroko den, ma un no piki den droifi èn un no o dringi a win fu en tu, bika woron o nyan ala. ₄₀Oleifbon o de ini a heri kontren fu unu, ma un no abi oli fu lobi gi un skin bika den bon o trowe ala den froktu fu den.

₄₁Un o meki manpikin nanga umapikin ma den no de fu unu, bika sma o tyari den gwe leki srafu.

₄₂Sprenka sa nyan ala den sani san un prani nanga den froktubon fu unu.

₄₃Den doroseisma di e libi na un mindri o kon gudu moro nanga moro èn den o kisi moro makti, ma unu o pina èn un o go nanga baka moro nanga moro. ₄₄Na den sa leni un sani. A no unu o leni den. Den sa de na fesi, no na baka.

₄₅Ala den fluku disi sa kon na un tapu. Den sa tan kon na un tapu te leki un dede. Dati sa psa fu di un no arki san MASRA, un Gado, taki èn fu di un no hori unsrefi na den gebod nanga den sani di un ben mus tan du. ₄₆Den fluku disi sa tan na un tapu fu têgo leki wan wondru nanga wan marki gi unu nanga den bakapikin fu unu. ₄₇Un no dini MASRA, un Gado, nanga prisiri di un ben abi ala sani bogobogo. ₄₈Dat' meki Masra o meki feyanti hari kon feti nanga unu, èn A o meki un dini den. Un o dini den nanga angri bere, watra o kiri unu, un no o abi krosi fu weri. Not' noti un no o abi. A sa poti wan hebi lai na un tapu, te leki un dede. ₄₉MASRA sa meki wan folku hari kon na un tapu. A san kmoto fu fara, fu te na a kba fu grontapu a sa frei kon leki wan aka. Wan folku di e taki wan tongo di un no e ferstan. ₅₀Wan folku di no sabi san na pardon. Den no e lespeki den owruwan èn den no abi sari-ati gi den yonguwan. ₅₁Den sa nyan de yongu kaw fu unu nanga ala sani san un prani, te leki un dede. Den no sa libi karu, win noso oli gi unu. Den no sa libi den pikin fu den kaw gi unu nanga den pikin skapu nanga krabita, te leki un dede gwe. ₅₂Den sa lontu ala foto fu feti nanga unu, te leki ala den tranga hei skotu ini a heri kondre fadon, tapu san un ben e bow. Den sa lontu ala den foto ini a heri kondre fu feti nanga unu, ini a kondre di MASRA, un Gado, o gi unu. ₅₃Den feyanti fu unu sa poti unu ini so wan pina èn un no o si no wan tra fasi fu tan na libi, dan fu nyan un eigi pikin. Un o nyan a meti fu den manpikin nanga umapikin fu unu, di MASRA, un Gado, o gi unu. ₅₄A moro safri man na un mindri, nanga den moro switi maniri, no o wani gi en eigi brada, en eigi frow noso den eigi pikin fu en di a abi ete, wan sani. ₅₅A no o wani gi no wan fu den wan pisi fu a meti fu den pikin fu en di a e nyan, fu di den feyanti no libi no wan tra sani gi en na baka. Na ini sowan pina nanga benawtu den feyanti fu unu o poti unu. ₅₆A moro safri uma na un mindri nanga den moro switi maniri, di den pori sowan fasi taki noiti a ben abi fu du wan sani, no san wani gi en eigi masra, en eigi manpikin nanga en eigi umapikin wan sani. ₅₇A no o wani gi den wan pisi srefi fu a pikin di a meki noso fu a den sani di e kon makandra nanga a pikin na doro, di a e meki a pikin. Bakabaka a sa nyan den sani disi safrisafri, fu di a no abi no wan tra sani fu nyan. Na ini sowan pina nanga benawtu den feyanti fu unu o poti unu.

₅₈Efu un no hori unsrefi trutru na ala den sani fu a wèt di skrifi ini a buku disi, èn efu un no lespeki a bigi nen fu MASRA, un Gado, di fiti fu kisi grani, ₅₉dan MASRA sa strafu unu nanga den bakapikin fu unu hebi. A sa meki ala sortu takru siki broko na un mindri di no abi dresi. ₆₀A sa meki ala den strafu di A ben meki kon abra Egipte, kon tu na un tapu. Den strafu gi san un e frede so èn di no abi dresi. ₆₁MASRA sa meki ala sortu tra siki nanga strafu di no skrifi ini a buku disi nanga a wèt kon na un tapu, te leki un dede. ₆₂Un ben furu leki den stari na heimel, ma wantu fu un nomo o tan abra, fu di un no arki san MASRA, un Gado, taigi unu. ₆₃Leki fa nanga prisiri MASRA ben e du un bun èn A ben e meki un kon furu, na so MASRA broko unu èn kiri unu nanga prisiri. A sa rutu un puru fu a kondre di un e go fu teki abra. ₆₄MASRA sa panya unu na mindri ala den folku fu a wan uku go miti a tra uku fu grontapu. Drape un sa dini tra gado fu udu nanga ston, di unu nanga den afo fu unu no ben sabi. ₆₅Un no sa feni rostu mindri den folku. Un no sa feni wan presi fu unsrefi fu tan. MASRA o meki un de nanga dyompo ati, un no sa abi no wan howpu èn un sa angri tranga fu drai go baka. ₆₆Dorodoro sma sa de na un baka fu kiri unu. Dei nanga neti un ati o de na dyompo èn un no sabi efu un o tan na libi. ₆₇Deiten un sa taki: mi winsi fu a ben kan de neti. Neti un sa taki: mi winsi fu a ben kan de deiten. Un sa taki so fu di un e frede tranga èn fu den sani di un e si nanga un ai. ₆₈MASRA ben taki tak' noiti moro un sa si a pasi baka di e go na Egipte. Ma A sa meki den tyari un go nanga sipi baka go na Egipte. Drape den sa seri un leki srafu gi den feyanti fu unu. Ma sma no o wani bai unu.”

₁Disi na den sani fu a ferbontu na san den sma fu Israel ben mus hori densrefi. MASRA ben meki Moses taigi den den sani disi ini a kondre Moab. Boiti den sani fu a ferbontu na Horeb, den ben mus hori den na den sani disi tu.

₂So Moses kari heri Israel fu kon na en dan a taigi den taki: “Un si ala den sani di MASRA du ini a kondre Egipte nanga Farao, den knekti fu en nanga a heri kondre. Den psa leti fesi un ai. ₃Un si den hebi strafu, den wondru nanga den marki nanga un eigi ai. ₄Ma te leki tide MASRA no ben meki un ferstan trutru ete fu sanede den sani disi psa. A no ben opo un ati nanga un ai ete gi den. ₅Fotenti yari Mi tyari un ini a dreisabana. Den krosi di un ben weri no priti èn un susu no broko na un futu. ₆Un no ben e nyan brede èn un no ben e dringi win noso wan tra sani di ben kan meki un drungu fu un ben kan sabi taki Mi na MASRA, un Gado. ₇Di un doro dyaso, Sikon a kownu fu Hesbon, nanga Og, a kownu fu Basan, hari kon fu feti nanga unu, ma un fon den. ₈Un teki a kondre fu den abra dan un gi en na a lo fu Ruben, Gad nanga afu fu a lo fu Manase, taki na fu den. ₉Fu dat'ede un mus hori unsrefi trutru na den sani fu a ferbontu disi, fu ala sani san un e du kan waka bun gi unu.

₁₀Tide un alamala tnapu dyaso fesi MASRA, un Gado. Den edeman fu den lo fu unu, den fesiman nanga den skrifiman. Ala den mansma fu Israel. ₁₁Den pikin fu unu, den frow fu unu nanga den sma di e libi leki doroseisma na un mindri. Srefi den man di e kapu udu nanga den wan di e peti watra. ₁₂Un tnapu dyaso fu meki wan ferbontu tide nanga MASRA, un Gado. Wan ferbontu di o stampu nanga wan sweri. ₁₃Un o du disi fu un kan tron En folku èn fu En tron un Gado, leki fa A taigi unu taki A o du, èn leki fa A sweri gi Abraham, Isak nanga Yakob, den afo fu unu. ₁₄A no nanga unu wawan Mi e sroto a ferbontu disi di o stampu nanga wan sweri. ₁₅Mi e sroto en nanga unu di de dyaso tide, unu di tnapu dyaso na fesi MASRA, un Gado, ma nanga den wan tu di no tnapu dyaso na unu tide.

₁₆Bika un sabi fa un ben libi na ini Egipte, nanga fa un hari psa na ini a kondre fu tra folku. ₁₇Un si den groskin kruktu gado fu den fu udu, ston, solfru nanga gowtu. ₁₈Dat' meki no wan man noso uma, no wan famiri noso lo mus de na un mindri, di no wani dini MASRA, un Gado, moro fu go dini den gado fu den folku disi. Noso dati bo de leki wan rutu mus de na un mindri di e kiri ala tra sani nanga a bita di a e gi. ₁₉Efu wan sma denki taki aladi a yere den sweri nanga san a ferbontu stampu, sani sa tan go bun nanga en, èn taki a o man taki: noti no sa psa nanga mi efu mi tan du san mi ati firi, dan sowan sma o meki un alamala dede. ₂₀MASRA no sa gi so wan sma pardon. Ma MASRA sa lusu En atibron na a sma tapu fu di A e dyarusu. A sa meki ala den fluku di skrifi ini a buku disi kon na a sma tapu. MASRA sa figi en nen puru na grontapu. ₂₁MASRA sa puru mindri den tra lo fu Israel. A sa poti en aparti fu ala den fluku kon na en tapu, leki fa a skrifi ini a ferbontu di skrifi ini a buku nanga den wèt disi.

₂₂Den wan di e kon na un baka, den pikin fu unu di e kon na un baka, nanga den doroseisma di kmoto fu fara, sa si den strafu nanga den siki, di MASRA meki broko ini a kondre disi. ₂₃Den sa si taki kroiti nanga sowtu pori a heri gron èn taki a bron. Den sa si taki noti no man sai, noti no man sproiti èn taki noti no e gro. A sa de leki di MASRA ben drai den foto Sodom, Gomora. Adma nanga Seboim tapu, di En ati ben e bron tranga na den tapu. ₂₄Dan ala folku sa taki: ‘Fu sanede MASRA du so nanga a kondre disi? San a bigi atibron disi wan taki?’ ₂₅Dan sma sa taigi den taki: ‘Na fu di den broko a ferbontu fu MASRA, a Gado fu den afo fu den. Den broko a ferbontu di A ben sroto nanga den di A ben e puru den na ini Egipte. ₂₆Na fu di den go dini tra gado èn den boigi gi den gado disi, di den no ben sabi èn di Gado no ben poti gi den. ₂₇Na fu dat'ede MASRA lusu En atibron tapu a kondre disi, fu ala den fluku di tnapu ini a buku disi kon na den tapu.’ ₂₈Bika na ini en bigi atibron, MASRA rutu den puru fu a kondre fu den, dan a fringi den go na wan tra kondre.

₂₉Den sani di no kon na krin ete na fu MASRA. Ma den sani di kon na krin kba na fu têgo gi unu nanga den pikin fu unu, fu un hori un na ala pisi fu a wèt.”

₅₃Dan so den tyari Yesus go na a granpriester. Ala den prenspari priester, den fesiman fu a folku nanga den sabiman fu Gado wèt, ben kon makandra. ₅₄Petrus ben waka fara na baka kon te na ini a dyari fu a granpriester. Dan a go sidon mindri den waktiman fu a tempel sei a faya fu teki waran.

₅₅Den prenspari priester nanga ala den man fu a grankrutu fu den Dyusma, ben suku sma fu kon taki wan sani san Yesus du fu den kan kiri En. Ma den no feni noti. ₅₆Bika furu sma ben kon lei gi Yesus, ma den sani san den ben taki no ben de a srefi. ₅₇Dan wantu sma kon lei gi Yesus. Den taki: “Un yere di A taki: ₅₈‘Mi o broko a santa presi disi san libisma meki, dan ini dri dei Mi o meki wan trawan san libisma no meki.’ ” ₅₉Ma srefi ini a sani disi san den taki, den no ben agri. ₆₀Ne a granpriester opo tnapu mindri den tra man, dan a aksi Yesus taki: “Yu no e piki tapu san den man disi e taki fu Yu?” ₆₁Ma Yesus hori En mofo, A no piki. Dan a granpriester aksi En taki: “Na Yu na a Mesias? Na Yu na a Manpikin fu a Blesi Wan?” ₆₂Dan Yesus piki taki: “Iya, na Mi na en. Èn un o si a Manpikin fu Libisma sidon na a let'anu sei fu Gado di abi Makti. Dan un o si En te A e kon baka tapu den wolku.” ₆₃Di Yesus taki a sani dati, a granpriester priti en krosi, dan a taki: “Un no abi kotoigi fanowdu moro! ₆₄Un srefi yere fa A afrontu Gado. San na un besroiti?”

Den alamala feni taki a fiti fu A dede. ₆₅Dan wantu fu den man bigin spiti na En tapu. Den tapu En fesi, dan den naki En kofu. Den taigi En taki: “Sori un taki Yu na wan profeiti.” Den waktiman fu a tempel naki En tu ini En fesi.

₆₆Di Petrus ben de na ondrosei na ini a dyari, wan uma di e wroko gi a granpriester kon. ₆₇Di a si Petrus e teki waran sei a faya, a luku en, dan a taigi en taki: “Yu ben de nanga Yesus fu Nasaret tu.” ₆₈Ma Petrus lei taki: “Mi no sabi noti èn mi no e ferstan noti fu san yu e taki.” Dan a kmopo fu drape go na fes'sei pe a poort de. ₆₉Di a uma si en baka, a bigin taigi den sma drape taki: “A man disi na wan fu den man di ben e teki leri fu En.” ₇₀Ma Petrus lei baka. Baka wan syatu pisten den sma di ben tnapu drape taigi Petrus agen taki: “A tru. Yu na wan fu den, bika yu na fu Galilea.” ₇₁Dan Petrus bigin fluku ensrefi, èn a sweri taki: “Mi no sabi a man san un e taki!” ₇₂A srefi momenti dati a kakafowru bari fu a di fu tu tron. Dan Petrus memre di Yesus ben taigi en taki: “Fosi kakafowru bari tu leisi, yu o taki dri leisi taki yu no sabi Mi.” Dan Petrus bigin krei.