1“Heimel poti yesi,
arki san mi o taki,
grontapu,
yere den wortu fu mi mofo.
2Meki den sani di mi o taki fadon leki alen,
den wortu fu mi dropu leki dow.
Leki alen a mus fadon tapu a yongu grasi,
leki wan sibibusi tapu a wiwiri.
3Bika mi sa opo a nen fu MASRA,
ala sma mus gi Gado grani.
4A Trangawan pe mi e kibri,
di e du sani tapu a yoisti fasi.
Ala den wroko fu En bun.
Wan Gado di de fu fertrow,
di no abi kruktufasi.
A e du sani nanga leti, A bun dorodoro.
5Den pikin fu En no libi bun nanga En srefsrefi.
Den no warti fu de En pikin fu den sani di den du.
Wan takru-ati folku, di no de fu fertrow.
6Na a tangi disi un abi gi MASRA?
Fa un don so? Fa un du lasi un ferstan?
Na En na un p'pa, a wan di meki unu.
Na En gi un libi, na En meki un de san un de.
7Prakseri a ten di psa.
Memre den yari di de na un baka.
Aksi den bigisma fu unu meki den ferteri unu,
meki den graniwan leri un san psa.
8Di a Moro Hei Gado ben e sori den folku pe den mus tan,
di A ben e gi den a kondre di bo de fu den.
Na En poti o fara a kondre fu den folku e waka,
di A si omeni den sma fu Israel de.
9Bika a folku disi na fu MASRA
Yakob a teki fu Ensrefi.
10Na ini wan drei kontren A ben feni en,
wan sabana pe sma no e tan.
11Leki wan aka di e hori wakti gi en nesi,
a e frei go frei kon.
A e panya en frei,
dan a e tyari den pikin na en tapu.
12Na so MASRA wawan ben tyari en.
No wan tra gado ben yepi en.
13A tyari en abra den bergi fu grontapu,
A meki a nyan den froktu fu a gron,
meki a soigi oni fu a bergiston
nanga oli fu den tranga bergiston.
14A gi en botro fu kaw merki,
merki fu skapu nanga krabita.
A gi en man skapu fu Basan nanga bokoboko,
a moro bun tarwe di de,
nanga win, a brudu fu den droifi.
15Ma di Yesurun kon fatu,
a bigin skopu go nanga baka.
A kon fatu, lontu, en bere kon bigi,
dan a drai en baka gi Gado,
a Wan di meki en.
A ben e si a Trangawan di ben yepi en,
fu noti moro.
16Den ben meki Gado dyarusu,
fu di den ben e dini tra gado.
Den ben e meki En ati bron,
nanga den ogri di den ben du.
17Den ben e tyari ofrandi gi takruyeye,
di no de gado srefsrefi,
gado di den no ben sabi,
nyun gado di den no sabi langa srefi,
gado di den afo fu den no ben e lespeki.
18Un no ben e luku a Trangawan moro di meki un,
un fergiti a Gado, di tyari un kon na grontapu.
19Di MASRA si dati, A poti den na wan sei,
fu di den pikin fu En gi En atibron.
20A taki: ‘Mi no o luku den srefsrefi moro,
dan Mi o si san o psa nanga den.
Bika na wan takru-ati folku,
pikin di no de fu fertrow.
21Den meki Mi dyarusu fu di den dini sani di no de gado.
Den meki Mi atibron nanga den soso sani fu den.
Fu dat'ede Mi o meki den dyarusu,
dyarusu tapu wan folku di no warti fu den kari en wan folku srefi.
Mi o meki den ati bron tapu wan folku di no abi ferstan srefsrefi.
22Bika a atibron fu Mi wiki wan faya ini Mi,
di sa bron te ini den moro dipi pisi fu dedekondre.
A o bron grontapu nanga ala sani san de na en tapu.
A o drei den fundamenti fu den bergi.
23Mi o meki a wan nowtu baka a trawan miti den.
Ala den peiri fu Mi, Mi o sutu na den tapu.
24Te angri meki den kon swaki,
korsu meki den bron gwe fu inisei,
ala sortu takru siki e kiri den,
Mi sa lusu krasi meti na den tapu,
nanga a bita fu takru sneki.
25Na dorosei den sa dede na ini feti,
na ini den oso frede o meki den no sabi pe fu tan,
uma nanga man,
pikinwan nanga owruwan.
26Mi ben wani taki: Mi o figi den puru na grontapu,
meki no wan sma no memre den moro.
27Ma Mi frede taki den feyanti fu den o teki den meki spotu,
taki den no o ferstan fu sanede disi psa nanga den,
fu den no taki na den kiri
èn taki a no MASRA du a sani disi nanga den.
28Bika den feyanti fu unu no abi ferstan,
den no sabi not' noti.
29Efu den ben koni, den bo ferstan
fa sani o waka gi densrefi.
30Fa wan man fu den bo man lon baka dusun man fu unu?
Fa tu man fu den bo man lon tin dusun man fu unu?
Soso te a Trangawan seri den gi den feyanti,
Soso te MASRA gi den abra.
31Bika den feyanti fu unu kan taki srefi
taki a trangawan fu den pe den e kibri na noti sei a Trangawan fu unu.
32A tru taki a win di Mi gi den fu dringi,
kmoto fu den droifi bon fu Sodom,
nanga den droifidyari fu Gomora.
Bita droifi di e kiri sma.
33A win fu den gersi a bita fu wan takru sneki,
a gari fu wan sakasneki.
34Mi kibri ala den sani di Mi wani du
na ini den kamra pe Mi e kibri den gudu fu Mi.
35Na Mi o strafu, na Mi o pai baka,
te den no tnapu steifi moro tapu den futu.
Bika a dei no fara moro pe bigi nowtu o miti den.
Den sani di o miti den e kon es'esi.’
36MASRA sa gi en folku a leti di a mus kisi.
A sa sorgu gi den knekti fu En,
te A si taki den e kon swaki,
taki alamala e dede gwe.
37Dan A sa taki: ‘Pe den gado fu den de?
a trangawan pe den ben e kibri?
38di ben nyan a fatu fu den ofrandi fu unu,
di ben e dringi a win di un ben e kanti leki ofrandi.
Meki den opo yepi unu,
meki den kibri unu.
39Un no man ferstan ete tak' na Mi èn Mi wawan?
taki no wan tra Gado no de boiti Mi?
Mi e kiri èn Mi e gi libi baka.
Mi e broko èn Mi e dresi baka.
No wan no de di man puru wan sani
di de ini Mi makti.
40Fu tru, Mi e opo Mi anu go na loktu,
èn Mi e sweri taki soleki fa a tru
taki Mi e libi fu têgo,
41Mi sa srapu Mi deigri di e koti faya,
èn Mi sa koti a krutu.
Mi sa pai den feyanti fu Mi baka,
Mi sa strafu den wan di no lobi Mi srefsrefi.
42Den peiri fu Mi sa drungu fu a brudu,
fu den wan di un wini
nanga den wan di un teki leki srafu.
Mi deigri sa nyan meti,
fu den langa wiwiri feyanti fu unu.’ ”
43Meki ala folku prijse Israel.
Bika A pai den wan baka,
di meki a brudu fu En knekti lon.
A e strafu den feyanti fu en,
èn A e meki en bun nanga en folku, en pipel.
Den laste yuru fu Moses
44Na so Moses ben singi a heri singi disi meki a heri folku yere. Yosua, a manpikin fu Nun, ben de nanga en.
45Di Moses ben kba fu taigi a folku ala den sani disi, 46a taigi den ete taki: “Un memre ala den sani disi di mi taigi un tide, fu un kan leri den pikin fu unu, fu den kan hori densrefi bun na a heri wèt disi. 47Bika den wortu disi a no soso wortu, ma na wortu di kan meki un libi. Efu un du san den wortu e taki, dan un sa libi langa ini a kondre di un o teki abra te un koti a Yordanliba abra.”
48A srefi dei dati MASRA taigi Moses taki: 49“Go na a Abarimbergi ini a kondre fu Moab. A bergi disi tnapu abra nanga abra nanga Yeriko. Te yu doro drape yu mus kren go na wan fu den hei pisi fu en, di den e kari Nebo. Fu drape yu sa si a kondre Kanaan, di Mi o gi den Israelitisma fu a de fu den. 50Drape tapu a bergi di yu o kren yu o dede go na den afo fu yu, leki fa yu brada Aaron dede go na den afo fu en tapu a Horbergi. 51Un no ben du san Mi taki di un ben de na a watrabron fu Meriba Kades ini a sabana fu Sin, èn un no gi Mi grani leti na fesi ala de Israelitisma. 52Fu dat'ede yu o si fa a kondre didon na yu fesi, ma yu no sa go ini a kondre di Mi o gi na den Israelitisma.”
