Dag 81 van 365- Jozua 10-12 en Lucas 1:39-56

₁Kownu Adonisedek fu Yerusalem ben kisi fu yere tak' Yosua ben teki a foto Ai abra èn tak' a ben kiri ala den sma fu en. A ben yere tu tak' a srefi sani di Yosua ben du nanga Yeriko nanga a kownu fu en, na dati a du tu nanga Ai nanga a kownu fu en, sosrefi tak' den sma fu Gibeon ben meki mati nanga Israel èn tak' den ben e libi now na den mindri. ₂A sani dati meki Adonisedek nanga en folku kon frede srefsrefi, bika Gibeon ben de wan bigi foto. A ben bigi leki den tra foto di ben abi wan kownu. A ben bigi moro Ai srefi èn ala den man fu Gibeon ben de dyadya fetiman. ₃Dat' meki kownu Adonisedek fu Yerusalem seni boskopuman go na kownu Hoham fu Hebron, kownu Piram fu Yarmut, kownu Yafia fu Lakis nanga kownu Debir fu Eglon. A seni a boskopu disi gi den: ₄“Un kon yepi mi fu un go feti nanga Gibeon. Bika den meki wan ferbontu nanga Yosua nanga den Israelitisma tak' noiti den o feti nanga densrefi.” ₅Dan so den feifi kownu fu den Amoritisma bondru densrefi: a kownu fu Yerusalem, a kownu fu Hebron, a kownu fu Yarmut, a kownu fu Lakis nanga a kownu fu Eglon. Makandra nanga ala den legre fu den, den hari go na Gibeon, den lontu a foto na alasei, dan den bigin feti nanga en. ₆Ne den man fu Gibeon seni a boskopu disi go gi Yosua, ini a kampu fu den Israelitisma na Gilgal: “No libi den knekti fu yu wawan, kon es'esi na wi fu ferlusu wi èn fu yepi wi. Bika ala den kownu fu den Amoritisma di e libi ini den bergi, bondru kon feti nanga wi.”

₇Dan Yosua hari kmoto na Gilgal, makandra nanga a heri legre fu en, soso bun dyadya fetiman. ₈Dan MASRA taigi Yosua taki: “Yu no abi fu frede gi den, bika Mi e gi den abra na yu. No wan fu den o man hori feti nanga yu.” ₉Yosua ben abi wan neti nomo fanowdu fu kmoto fu Gilgal go na Gibeon. Dan a broko go na a feyanti tapu sondro fu den ben ferwakti en. ₁₀MASRA meki den bruya di den si a legre fu Israel. Dat' meki Yosua ben kan teki wan bigi wini na den tapu na Gibeon. A lon na den baka go na a sei fu a bergipasi fu Bet-Horon èn a kiri wan lo fu den te na den foto Aseka nanga Makeda. ₁₁Di den feyanti ben e lon saka fu a bergipasi fu Bet-Horon, MASRA meki bigibigi tranga pis'pisi ijs fadon kmoto fu heimel na den tapu, go te na Aseka. A ijs dati kiri moro furu fu den, dan di den man fu Israel ben kiri na ini feti. ₁₂Bika a dei dati, a dei di MASRA gi den Amoritisma abra na Israel, Yosua ben taki nanga MASRA leti fesi ala den Israelitisma. A ben taki:

₁₆Den feifi kownu fu den Amoritisma ben lowe èn den ben go kibri ini wan bergi-olo na Makeda. ₁₇Di Yosua kisi fu yere tak' na drape den kibri, ₁₈a komanderi den man fu en taki: “Un lolo bigi ston poti fesi a olo èn un poti waktiman. ₁₉Ma unu no mus tan dyaso. Un lon go moro fara baka un feyanti èn un kiri ibriwan fu den di de na libi ete. Un no gi den a okasi fu den lon go ini den foto fu den, bika MASRA, a Gado fu unu, gi den abra na unu.” ₂₀Den Israelitisma teki wan bigi wini tapu den feyanti fu den. Den kiri furu fu den èn wantu nomo ben man lowe go na den tranga foto fu den. ₂₁Baka dati den drai go baka na Yosua na a kampu fu den na Makeda. No wan sma ben kisi wan mankeri èn no wan sma ben taigi den Israelitisma wan sani.

₂₂Dan Yosua taki: “Un opo a bergi-olo dan un tyari den feifi kownu kon gi mi.” ₂₃Den du san a taki èn den puru den feifi kownu fu a bergi-olo tyari go gi Yosua. Dati ben de a kownu fu Yerusalem, a kownu fu Hebron, a kownu fu Yarmut, a kownu fu Lakis nanga a kownu fu Eglon. ₂₄Di den tyari den kownu gi en, a kari ala den man fu Israel kon na en. Dan a taigi den fesiman fu a legre, di ben feti makandra nanga en, taki: “Un kon krosbei dan un poti un futu tapu den neki fu den kownu disi.” Den go èn den poti den futu tapu den neki fu den kownu. ₂₅Dan Yosua taigi den taki: “Un no abi fu frede èn un no abi fu lasi ati. Un mus tranga èn un mus abi dek'ati. MASRA o du a srefi sani disi nanga ala den feyanti nanga san un mus feti ete.” ₂₆Baka dati Yosua naki den feifi kownu kiri, dan a anga den na feifi bon. Den dedeskin fu den tan drape te neti. ₂₇Di a son ben e saka Yosua komanderi den man fu en fu puru den na den bon, fu trowe den ini a bergi-olo pe den ben go kibri èn fu tapu a bergi-olo nanga bigi ston. Te tide den ston dati drape ete.

₂₈A srefi dei dati Yosua nanga a legre fu en teki a foto Makeda abra. Den kiri a kownu nanga ala sma drape nanga deigri. Ala sma di ben e libi drape den kiri, no wan sma den meki tan na libi. A srefi sani san Yosua ben du nanga a kownu fu Yeriko, a du tu nanga a kownu fu Makeda.

₂₉Baka dati Yosua nanga a heri legre fu Israel hari go moro fara, fu Makeda go na Libna èn den feti nanga a foto dati. ₃₀Dan MASRA gi a foto nanga a kownu fu en ini a makti fu Israel. Den kiri ala sma drape nanga deigri, no wan sma den meki tan na libi. A srefi sani di Yosua du nanga a kownu fu Yeriko, a du tu nanga a kownu fu Libna.

₃₁Baka dati Yosua nanga a heri legre hari go moro fara, fu Libna go na Lakis. Den lontu a foto dati na alasei dan den feti nanga en. ₃₂Tapu a di fu tu dei fu a feti MASRA gi Lakis abra ini a makti fu Israel. Den teki a foto abra èn den kiri ala libisma drape nanga deigri, soleki fa den ben du nanga Libna. ₃₃Dan kownu Horam fu Geser hari kon fu yepi Lakis. Ma Yosua fon en nanga den man fu en, te leki a kiri den alamala.

₃₄Baka dati Yosua nanga a legre hari go moro fara, fu Lakis go na Eglon. Den lontu a foto dati na alasei dan den feti nanga en. ₃₅A srefi dei dati den teki a foto abra èn den kiri ala sma drape nanga deigri. Ala sma di ben e libi drape den kiri, soleki fa den ben du nanga Lakis.

₃₆Baka dati Yosua nanga a heri legre hari kmoto fu Eglon go na Hebron èn den feti nanga a foto dati. ₃₇Den teki en abra èn den kiri a kownu nanga ala sma drape nanga deigri. Den kiri ala den sma tu fu den foto ini a birti. No wan den meki tan na libi, leki fa den du nanga Eglon tu. Ala sma di ben e libi drape den kiri.

₃₈Dan Yosua nanga a heri legre drai go na a foto Debir èn den feti nanga a foto dati. ₃₉A teki a foto abra èn den kiri a kownu nanga ala tra sma drape nanga deigri. Den kiri ala sma tu fu den foto di ben de ini a birti. Ala sma di ben e libi drape den kiri. No wan sma den meki tan na libi. A srefi di den ben du nanga Hebron nanga Libna nanga den kownu fu den, den du tu nanga Debir nanga a kownu fu en.

₄₀Na so Yosua teki a heri kondre abra, a bergikontren, a Negebsabana, a kontren na den bergifutu nanga a kontren mindri den bergi nanga a Dedese. A kiri ala den kownu. No wan sma a meki tan na libi. Ala sma di ben e libi drape a kiri, soleki fa MASRA, a Gado fu Israel, ben komanderi en. ₄₁Yosua ben kiri ala sma fu Kades-Barnea go te na Gasa, sosrefi fu a heri kontren fu Gosen go te na Gibeon. ₄₂Wan leisi nomo Yosua hari go feti, dan a wini ala den kownu dati èn teki a kondre fu den abra, fu di MASRA, a Gado fu Israel, ben e feti gi Israel. ₄₃Baka dati Yosua nanga a heri legre fu Israel drai go baka na a kampu fu den na Gilgal.

₁Di kownu Yabin fu Hasor yere fa Israel ben e teki den presi abra, a seni boskopu go na kownu Yobab fu Madon nanga den kownu fu Simron nanga Aksaf. ₂A seni boskopu go tu na den tra kownu na noordsei fu Kanaan ini a bergikontren, a Yordandal na zuidsei fu Kinarot, a kontren na den bergifutu nanga a kontren na a syoro krosbei fu Dor. ₃A seni a boskopu moro fara gi den kownu fu den Kananitisma di ben e libi na oostsei nanga na westsei, gi a kownu fu den Amoritisma, gi a kownu fu den Hetitisma, gi a kownu fu den Perisitisma, gi a kownu fu den Yebusitisma ini den bergi nanga gi a kownu fu den Hiwitisma di ben e libi na a futu fu a Hermonbergi ini a kontren fu Mispa. ₄Dan den kownu disi hari gwe nanga ala den legre fu den, bun furu fetiman. Den ben lai leki a santi na sekanti. Den ben de nanga bun furu asi nanga fetiwagi tu. ₅Ala den kownu disi bondru densrefi èn den go meki a legrekampu fu den na a kriki Merom, fu feti nanga Israel.

₆Dan MASRA taigi Yosua taki: “Yu no abi fu frede gi den, bika tamara a yuru disi Mi o kiri den alamala gi Israel. Dan yu mus koti a bakafututitei fu den asi fu den èn bron den fetiwagi fu den.” ₇Ne Yosua nanga a heri legre fu en broko go na den tapu na a kriki fu Merom, sondro fu den ben ferwakti en. ₈Dan MASRA gi den abra ini a makti fu Israel. Den Israelitisma fon den èn den lon na den baka go te na Bigi-Sidon nanga Misrefot-Maim, èn te na a dal fu Mispe na oostsei. Den feti nanga den te leki den kiri den alamala. ₉Baka dati Yosua du nanga den san MASRA ben komanderi en: a koti a bakafututitei fu den asi fu den èn a bron den fetiwagi fu den.

₁₀Di Yosua ben e drai gwe, a teki Hasor abra èn a kiri a kownu fu en. A ten dati Hasor ben de a moro prenspari foto fu ala den tra foto nanga wan kownu. ₁₁Den kiri ala libisma di den miti ini Hasor nanga deigri. Den kiri ala sani san ben e bro. Dan Yosua meki den sutu faya gi a foto. ₁₂Yosua ben teki ala den foto fu den kownu disi abra, makandra nanga den kownu fu den, èn a kiri den alamala nanga deigri. A kiri ala den sma soleki fa Moses, a knekti fu MASRA, ben komanderi en. ₁₃Soso gi Hasor Yosua ben sutu faya. A no ben meki den bron den tra foto di ben de tapu den pikinpikin bergi. ₁₄Den Israelitisma ben teki ala den gudu nanga den meti di den ben feni ini den foto dati. Ma ala libisma den kiri nanga deigri, te leki no wan sma ben de moro. No wan sani di ben e bro den ben meki tan na libi. ₁₅Na so MASRA ben komanderi Moses, a knekti fu En, èn na so Moses ben komanderi Yosua. Yosua du ala sani so tu. A du ala sani di MASRA ben komanderi Moses.

₁₆Yosua ben teki a heri kondre abra: a bergikontren, a heri Negebsabana, a heri kontren fu Gosen, a kontren na den bergifutu, a Yordandal nanga den bergi fu Israel nanga den bergifutu fu en. ₁₇A heri presi disi ben e waka fu den Kali Bergi go na a sei fu Seir, te go miti Baal-Gad ini a Libanondal na a futu fu Hermonbergi. Yosua ben grabu ala den kownu fu den presi disi dan a kiri den. ₁₈A feti langa nanga den kownu disi fu ben kan teki a kondre fu den abra. ₁₉Bika no wan foto ben meki mati nanga Israel, boiti Gibeon, a foto fu den Hiwitisma. Soso nanga feti den sma fu Israel ben teki ala den tra foto abra. ₂₀Ma na MASRA ben seti en so, taki ala den tra folku ben tranga den ati fu feti nomonomo nanga Israel. Sofasi Israel no ben abi fu sari den, ma a ben kan kiri den alamala te leki no wan sma ben de moro. Bika na dati MASRA ben komanderi Moses.

₂₁Ini a srefi ten dati Yosua kiri den Enakitisma puru na pasi tu. Den sma dati ben libi ini a bergikontren, ini Hebron, Debir nanga Anab, nanga ini a heri bergikontren fu Yuda nanga Israel. Yosua kiri den èn a broko den foto fu den. ₂₂No wan Enakitisma ben de moro ini a kondre fu den Israelitisma. Den ben de fu feni soso ini Gasa, Gat nanga Asdod.

₂₃Baka di Yosua teki a heri kondre abra, soleki fa MASRA ben komanderi Moses, a gi en na den Israelitisma leki den eigi kondre. A gi ibri lo fu Israel wan pisi taki na fu den. Na so wan kba kon na a feti ini a kondre.

₁Disi na den kownu di den Israelitisma ben wini èn den ben teki a kontren fu den abra na oostsei fu a Yordanliba, fu a Arnonliba te go miti a Hermonbergi nanga a heri oostsei fu a Yordandal:

₂A fosi kownu ben de Sikon, a kownu fu den Amoritisma, di ben e libi na Hesbon. A kontren fu en ben e bigin na Arower na sei a Arnonliba, a ben e waka mindrisei fu a Arnonliba, nanga afu fu Gilead te go miti a Yabokliba, pe a kontren fu den Amonitisma e bigin. ₃Moro fara a pisi fu a Yordandal di e waka fu a oostsei fu a meer fu Kineret go na a oostsei fu a Sowtuse, di den e kari a Dedese tu, te go miti Bet-Hayesimot. Na a zuidsei a kontren ben e waka te go miti a futu fu a Pisgabergi. ₄A di fu tu kownu ben de Og, a kownu fu Basan. A ben de wan fu den laste Refaitisma èn a ben libi na den foto Astarot nanga Edrei. ₅Og ben de kownu abra a Hermonbergi, Salka nanga heri Basan, te go miti a kontren fu Gesur nanga Maaka. Moro fara abra a tra afu fu Gilead te go miti a kontren fu kownu Sikon fu Hesbon.

₆Moses, a knekti fu MASRA, nanga den Israelitisma ben wini den tu kownu disi. Baka dati Moses gi a kontren fu den na a lo fu Ruben, Gad nanga a afu lo fu Manase, leki den eigi tanpresi.

₇Baka dati Yosua nanga den Israelitisma wini ala den kownu na westsei fu a Yordanliba fu Baal-Gad ini a Libanondal te go miti den Kali Bergi di e go na a sei fu Seir. Yosua gi a kontren dati na den Israelitisma leki den eigi tanpresi. A gi ibri lo en eigi pisi. ₈Dati ben de a bergikontren, a kontren na den bergifutu, a Yordandal, a kontren mindri den bergi nanga a Dedese, a bigi dreisabana, nanga a Negebsabana. A kontren dati ben de a kontren fu den Hetitisma, fu den Amoritisma, fu den Kananitisma, fu den Perisitisma, fu den Hiwitisma nanga fu den Yebusitisma. ₉Disi na den kownu di den wini: a kownu fu Yeriko, a kownu fu Ai, ini a birti fu Betel, ₁₀a kownu fu Yerusalem, a kownu fu Hebron, ₁₁a kownu fu Yarmut, a kownu fu Lakis, ₁₂a kownu fu Eglon, a kownu fu Geser, ₁₃a kownu fu Debir, a kownu fu Geder, ₁₄a kownu fu Horma, a kownu fu Arad, ₁₅a kownu fu Libna, a kownu fu Adulam, ₁₆a kownu fu Makeda, a kownu fu Betel, ₁₇a kownu fu Tapua, a kownu fu Hefer, ₁₈a kownu fu Afek, a kownu fu Lasaron, ₁₉a kownu fu Madon, a kownu fu Hasor, ₂₀a kownu fu Simron-Meroon, a kownu fu Aksaf, ₂₁a kownu fu Taanak, a kownu fu Megido, ₂₂a kownu fu Kedes, a kownu fu Yokneam na Karmelbergi, ₂₃a kownu fu Dor, na a syoro krosbei fu a foto dati, a kownu fu Goyim ini Gilgal, ₂₄nanga a kownu fu Tirsa. Makandra den ben de dritenti-na-wan kownu.

₃₉Baka dati Maria teki pasi go es'esi na wan foto san de ini den bergi fu Yudea. ₄₀A go na Sakarias oso, dan a gi Elisabet odi. ₄₁Di Elisabet yere a odi fu Maria, a pikin dyompo ini en bere. Ne Elisabet kon furu nanga a Santa Yeye, ₄₂dan a taki nanga tranga sten taki: “Masra blesi yu moro ala uma di de, èn a blesi fu Masra de tapu a pikin ini yu bere. ₄₃Ma fa mi du feni a bun disi, taki a m'ma fu a Mesias kon luku mi? ₄₄Bika luku, di mi yere a odi fu yu, a pikin dyompo fu prisiri ini mi bere. ₄₅A blesi fu Gado de na yu tapu fu di yu bribi taki a sani san Masra taigi yu, o psa.”

₄₆Dan Maria taki: