Dag 83 van 365- Jozua 16-18 en Lucas 2:1-24

₁Baka dati a lot sori a kontren di den bakapikin fu Yosef ben mus kisi. A kontren dati ben e bigin na a Yordanliba krosbei fu Yeriko. Fu drape a ben e go na oostsei, psa den watrabron fu Yeriko, dan a ben psa ini den bergi ini a bigi dreisabana go fadon na Betel. ₂Fu Betel a ben go na a foto Lus èn a ben go moro fara na a foto Atarot, ini a kontren fu den Arkitisma. ₃Fu drape a kontren ben e saka go na westsei na a kontren fu den Yaflitisma, baka dati a ben e go na a kontren fu Lagi-Bet-Horon èn moro fara na Geser, fu kon fadon na se.

₄Disi ben de den a kontren di a lo fu Manase nanga di fu Efraim, den manpikin fu Yosef, kisi taki na fu den.

₅Disi na fa a kontren fu a lo fu Efraim ben e waka.

Na a zuidsei a kontren ben e bigin oostsei fu a foto Atrot-Adar, dan a ben go na Hei-Bet-Horon, ₆fu go fadon na se.

Na oostsei a kontren ben e bigin noordsei fu a foto Mikmetat. A ben waka na zuidoostsei go na a foto Taanat-Silo, èn a ben psa na oostsei fu a foto dati go na a foto Yanoak. ₇Fu a foto dati a ben e saka go na den foto Atarot nanga Naarat, èn a ben psa leti fesi Yeriko fu kon stotu na a Yordanliba.

₈Fu a foto Tapua, èn a ben e psa na a kriki Kana go na westsei, fu go kba na se.

Dati ben de a kontren fu den famiri fu a lo fu Efraim. ₉Den ben kisi wantu foto nanga den dorpu tu ini a kontren fu a lo fu Manase. ₁₀Ma den sma fu a lo fu Efraim no ben yagi den Kananitisma puru ini a foto Geser. Dat' meki den Kananitisma dati tan libi na den mindri te tide, ma den ben e wroko leki srafu gi den.

₁A lot sori tu sortu kontren a lo fu Manase ben mus kisi. Manase ben de a fosi manpikin fu Yosef. Makir ben de a fosi manpikin fu Manase èn a p'pa fu Gilead. Fu di Makir ben de wan bun fetiman, a ben kisi den kontren fu Gilead nanga Basan kba. ₂Dan a lot sori sortu kontren den tra manpikin fu Manase nanga den famiri fu den bo kisi. Den tra manpikin fu Manase ben de: Abiyeser, Helek, Asriyel, Sekem, Hefer nanga Semida. Den manpikin disi fu Manase, a manpikin fu Yosef, ben de den edeman fu den famiri fu Manase. ₃Manase ben de a p'pa fu Makir, Makir ben de a p'pa fu Gilead, Gilead ben de a p'pa fu Hefer èn Hefer ben de a p'pa fu Selofkad. Selofkad no ben abi manpikin. A ben abi soso umapikin. Den umapikin fu Selofkad ben de: Makla, Noa, Hogla, Milka nanga Tirsa. ₄Den umapikin disi go na priester Eleasar, Yosua, a manpikin fu Nun, nanga den edeman fu den lo. Dan den taigi den man dati taki: “Wi wani memre unu dati MASRA ben komanderi Moses fu gi unu, neleki den omu fu unu, wan pisi fu a kondre gi unsrefi tu.” Dan soleki fa MASRA ben komanderi, den kisi wan pisi fu a kondre gi densrefi tu, neleki den omu fu den. ₅Na so a kontren fu a lo fu Manase kon prati ini tin pisi, boiti Gilead nanga Basan di ben didon na a tra sei fu a Yordanliba. ₆Bika den umapikin fu a lo ben kisi wan pisi fu a kondre tu neleki den mansma. Ma Gilead ben de gi den tra bakapikin fu Manase.

₇A kontren fu Manase ben e waka fu a kontren fu a lo fu Aser go te na a foto Mikmetat, oostsei fu a foto Sikem. Fu drape a ben e waka go na zuidsei na den sma fu En-Tapuak. ₈A foto Tapua ben de leti pe den kontren fu Manase nanga Efraim ben e miti. A foto srefi ben de fu a lo fu Efraim, ma a kontren lontu a foto ben de fu a lo fu Manase. ₉Baka dati a kontren ben e saka go na a kriki Kana, dan a ben e psa na zuidsei fu a kriki Kana fu go kba na a se. Ala den foto drape ben de fu Efraim, ma den ben didon mindri den foto fu Manase. ₁₀Dati wani taki tak' a kontren zuidsei fu a kriki Kana ben de fu a lo fu Efraim, èn a kontren noordsei fu a kriki ben de fu a lo fu Manase.

A kontren fu Manase ben e kba na westsei na a se, na noordwestsei a ben e miti nanga a kontren fu Aser èn na noordoostsei nanga a kontren fu Isakar.

₁₁A lo fu Manase kisi wantu foto nanga dorpu di ben de ini a birti fu den foto, ini den kontren fu den lo fu Isakar nanga Aser. Disi ben de den foto: Bet-Sean, Yibleam, Dor makandra nanga wan pisi fu a sekanti, Endor, Taanak nanga Megido. ₁₂Ma a lo fu Manase no ben man teki den foto dati abra. Den no ben man yagi den Kananitisma gwe èn den Kananitisma tan libi drape. ₁₃Di den Israelitisma ben kon moro tranga, den meki den Kananitisma wroko leki srafu gi den, ma den no ben man yagi den alamala gwe.

₁₄Den bakapikin fu Yosef go na Yosua, dan den aksi en taki: “Fu sanede yu meki a lot sori wan leisi nomo sortu kontren un ben o kisi èn fu sanede yu gi wi wan kontren nomo? Wi de nanga furu sma fu di MASRA blesi unu te nanga now.” ₁₅Yosua piki den taki: “Efu un de nanga furu sma èn a bergikontren fu Efraim pikin tumsi gi unu, dan un mus hari go na den busi fu den Perisitisma nanga den Refaitisma. Un kapu den opo èn meki presi gi unsrefi.” ₁₆Ma den bakapikin fu Yosef piki Yosua taki: “Awinsi un du dati toku a bergikontren no sari gi unu. Boiti dati, den Kananitisma di e libi drape ini den dal abi isri fetiwagi. Den di fu Bet-Sean nanga den dorpu ini a birti fu en, nanga den wan di e libi ini a dal fu Yisreel.” ₁₇Yosua piki den bakapikin fu Yosef, den lo fu Efraim nanga Manase taki: “Un na wan bigi folku di tranga srefsrefi. A tru taki wan kontren nomo no sari gi unu. ₁₈Dat' meki a bergikontren nanga den dal fu en sa de fu unu. Awinsi na busi, un o man kapu en opo. Un o man yagi den Kananitisma nanga den isri fetiwagi fu den puru drape tu, awinsi den tranga.”

₁Ala den Israelitisma ben kon makandra ini a foto Silo. Drape den opo a tenti pe den ben kan miti nanga Gado, bika den ben teki a kondre abra kba. ₂Ma seibi lo fu Israel no ben kisi kontren ete. ₃Dat' meki Yosua taigi den Israelitisma taki: “Olanga un o tan draidrai fosi un teki a kondre abra di MASRA, a Gado fu den afo fu unu, gi unu? ₄Un teki dri man fu ibri lo fu unu. Mi sa seni den fu go waka lontu luku a kondre èn kon ferteri fa a tan. Dan a kondre sa prati te den drai kon baka. ₅A sa prati ini seibi pisi. Ma a kontren fu Yuda na zuidsei nanga di fu den bakapikin fu Yosef na noordsei, mus tan leki fa den de. ₆Un mus skrifi ala spesrutu sani fu den seibi pisi dati poti, dan un tyari en kon gi mi. Dan mi sa fringi a lot gi unu dyaso na fesi MASRA, a Gado fu unu. ₇Den lo fu Gad, Ruben nanga a afu lo fu Manase ben kisi kontren kba fu Moses, a knekti fu MASRA, na oostsei fu a Yordanliba. A lo fu Lefi no o kisi no wan pisi fu a kondre. A sani san den kisi na fu dini MASRA leki priester.” ₈Di den man di ben o go luku a kontren ben meki densrefi klari fu gwe, Yosua komanderi den fu den poti tapu papira san den si ini a kontren. A taigi den taki: “Un go waka lontu ini a kontren. Un poti tapu papira san un si, dan un drai kon baka na mi. Dan mi sa fringi a lot gi un dyaso fesi MASRA ini Silo.” ₉Dan so den man kon gwe. Den waka lontu ini a kondre, dan den poti tapu papira fa a kondre tan nanga ala den foto fu en, wan fru wan. Baka dati den prati a kontren ini seibi pisi, dan den drai go baka na a kampu na Yosua. ₁₀Dan Yosua fringi a lot gi den na Silo, na fesi MASRA. Baka dati a prati a kontren dati gi den lo fu den Israelitisma di no ben kisi kontren ete.

₁₁A fosi lo di a lot sori ben de a lo fu Benyamin. A kontren di den famiri fu a lo dati kisi ben de mindri a kontren fu Yuda nanga di fu Yosef.

₁₂A kontren ben e bigin na noordsei na a Yordanliba. Fu drape a ben waka noordsei fu a bergi na a foto Yeriko go na loktu, dan a ben go na westsei ini a bergikontren fu go stotu na a bigi dreisabana fu Bet-Awen. ₁₃Fu drape a ben e go na a foto Lus, di den e kari Betel tide, èn fu drape a ben e go moro fara na zuidsei na a bergi di ben de na a foto Lus. Baka dati a ben e saka go na a foto Atrot-Adar èn a ben e waka moro fara abra a bergi di de na zuidsei fu Lagi-Bet-Horon. ₁₄Drape a ben e meki wan boktu go na a zuidwestsei.

Na a westsei a kontren ben e bigin na a bergi di ben de na a zuidoostsei fu Bet-Horon, te go miti Kiryat-Baal di den e kari Kiryat-Yearim tide. Kiryat-Yearim ben de wan foto fu Yuda. Disi na fa a kontren ben e waka na a westsei.

₁₅Na a zuidsei a kontren ben e bigin na a foto Kiryat-Yearim, dan a ben go na westsei na a watrabron fu Me-Neftoak. ₁₆Fu drape a ben e saka go na a futu fu a bergi di de westsei fu a Ben-Hinomdal nanga noordsei fu a Refaimdal. Fu a Refaimdal a ben e saka go na a Hinomdal. Dan a ben e waka ini a dal dati na zuidsei fu a bergi tapu san a foto Yebus ben de, fu saka baka dati go na a watrabron Rogel. ₁₇Na a Rogelbron a ben e meki wan lekti boktu go na noordoostsei. Fu drape a ben go langalanga na a Semesbron èn baka dati a ben e go na a foto Gelilot, di ben de abrasei fu a bergipasi Adumim. Baka dati a ben e saka go na a bergiston Bohan. (Bohan ben de wan bakapikin fu Ruben). ₁₈A kontren ben e waka moro fara psa na noordsei fu a bergi di ben de krosbei fu a foto Bet-Araba, dan a ben e saka go na a Yordandal. ₁₉Fu drape a ben e psa noordsei fu a bergi di de na Bet-Hogla, dan a ben e go na zuidsei moro fara go miti a mofo fu a Yordanliba. Drape, noordsei fu a Sowtuse, a kontren ben e kba. Na so a kontren fu a lo fu Benyamin ben e waka na a zuidsei.

₂₀Na a oostsei a Yordanliba ben de a kbapisi fu a kontren.

Disi na a fasi fa a kontren ben e waka di ben de fu den famiri fu a lo fu Benyamin.

₂₁Disi na den foto fu den famiri fu a lo fu Benyamin:

Yeriko, Bet-Hogla, Emek-Kesis, ₂₂Bet-Araba, Semaraim, Betel, ₂₃Awin, Para, Ofra, ₂₄Kefar-Haamoni, Ofni nanga Geba. Dati ben de twarfu foto nanga den dorpu di ben de ini a birtu fu den.

₂₅Yu ben abi moro fara: Gibeon, Rama, Beerot, ₂₆Mispa, Kefira, Mosa, ₂₇Rekem, Yirpeel, Tarala, ₂₈Sela, Elef nanga Yebus (di den e kari Yerusalem now).

Disi ben de a kontren fu den famiri fu a lo fu Benyamin.

₁Ini a srefi ten dati grankownu Augustus ben seni wan boskopu go lontu ini ala den kondre di a ben e tiri, taki ala sma mus go skrifi den nen na ini lantibuku. ₂Disi ben de a fosi leisi di den ben meki den sma skrifi den nen na ini lantibuku èn a psa ini a ten di Kwirinius ben de granman fu Siria. ₃So ala sma ben go skrifi den nen na ini a foto pe a famiri fu den ben kmopo. ₄Dan fu di Yosef ben de wan bakapikin fu David, a kmopo fu Nasaret na ini Galilea fu go na Betlehem na ini Yudea, bika na drape David ben gebore. ₅A go drape fu skrifi en nen nanga a di fu Maria, a uma nanga san a ben o trow. A pisten dati Maria ben abi bere. ₆Di den ben drape, a yuru doro fu Maria kisi a pikin. ₇Dan a kisi en fosi boi. A domru En na ini krosi, dan a poti En didon ini wan baki pe meti e nyan, bika a oso pe yu ben kan yuru wan presi fu tan, ben furu kba.

₈Ini a srefi kontren dati wantu skapuman ben de ini den wei e hori wakti te neti gi den skapu fu den. ₉Dan wantron so wan engel fu Masra ben tnapu na den fesi, èn a glori fu Masra ben krin a heri presi pe den ben de. Den man ben frede srefsrefi. ₁₀Ma a engel taigi den taki: “No frede! Bika mi tyari wan bun nyunsu gi unu san o meki a heri folku prisiri. ₁₁Tide a Ferlusuman gebore gi unu na ini a foto fu David. Na En na a Mesias, na En na Masra. ₁₂Disi na a marki: Te un go, un o si wan pikin di domru na ini krosi, èn a didon ini wan baki pe meti e nyan.” ₁₃Dan wantron so wan heri ipi tra engel ben tnapu nanga a fosi wan. Den ben e prijse Gado taki:

₂₁Di a pikin tapu aiti dei, den ben mus besnei En. Dan den gi En a nen Yesus. Bika fosi A ben de ini en mamabere, a engel ben taki tak' na so den mus kari En.

₂₂A ten ben doro tak' den ben mus krin densrefi gi Gado soleki fa a wèt fu Moses e taki. Dan Yosef nanga Maria tyari Yesus go na Yerusalem fu poti En na ini Masra anu. ₂₃Bika a skrifi na ini a wèt fu Masra taki: “Ala fosi manpikin un sa poti aparti gi Masra.” ₂₄A wèt fu Masra e taki moro fara tak' den ben mus tyari tu paskadoifi noso tu yongu doifi leki wan ofrandi gi Gado.