Dag 87 van 365- Rechters 4-6 en Lucas 4:31-44

₁Baka di Ehud dede den Israelitisma bigin du sani baka di no ben bun ini MASRA ai. ₂Dan MASRA gi den abra na kownu Yabin fu Kanaan, di ben de na makti ini Hasor. A edeman fu a legre fu en ben nen Sisera èn a ben e libi na Haroset-Hagoyim. ₃Kownu Yabin ben abi neigi hondro isri fetiwagi. Sowan tutenti yari langa a pina den Israelitisma hebi. Dan den Israelitisma bari suku MASRA.

₄A pisten dati wan uma, di ben nen Debora, ben de a krutubakra di ben e tiri Israel. A ben de a uma fu Lapidot èn a ben de wan profeiti. ₅A ben gwenti hori krutu ondro a Deborapalmbon di ben de mindri Rama nanga Bet-El ini a bergikontren fu Efraim. Den Israelitisma ben e go drape na en fu a koti krutu gi den. ₆Dan Debora seni kari Barak, a manpikin fu Abinoam, kon. Barak ben de fu a foto Kedes ini a kontren fu Naftali. Di a kon Debora taigi en taki: “MASRA, a Gado fu Israel, e komanderi yu taki: ‘Hari go na a bergi Tabor nanga tin dusun man fu den lo fu Naftali nanga Sebulon. ₇Mi sa meki Sisera, a edeman fu a legre fu Yabin, hari kon drape na yu na a Kisonkriki nanga den fetiwagi nanga den srudati fu en. Dan Mi sa gi en abra ini yu makti.’ ” ₈Ma Barak taigi Debora taki: “Mi o go soso efu yu kon nanga mi, efu yu no o kon nanga mi, mi no o go.” ₉Ne Debora piki en taki: “Mi o kon nanga yu. Ma sabi taki yu no o kisi a grani fu a feti di yu o hari go feti, bika MASRA o gi Sisera abra na wan uma.” Baka dati Debora opo go nanga Barak na Kedes. ₁₀Barak kari den man fu den lo fu Sebulon nanga Naftali kon na wan dan tin dusun man hari gwe nanga en. Debora go nanga en tu.

₁₁Now a ben de so taki a Kenitiman Heber ben kmoto na mindri den Kenitisma go libi aparti. A ben opo den tenti fu en na a bigi bon fu Saanaim, krosbei fu Kedes. Den Kenitisma ben de bakapikin fu Hobab, a swagri fu Moses.

₁₂Di den taigi Sisera taki Barak, a manpikin fu Abinoam, ben hari go na a Taborbergi, ₁₃a meki ala den neigi hondro isri fetiwagi fu en nanga a heri legre fu en hari kmoto na Haroset-Hagoyim go na a Kisonkriki. ₁₄Dan Debora taigi Barak taki: “Hari gwe! Bika tide MASRA e gi Sisera abra ini yu makti. MASRA hari go na yu fesi kba.” Dan Barak saka fu a Taborbergi nanga den tin dusun man fu en na en baka. ₁₅Di Barak bigin feti nanga Sisera, MASRA tyari Sisera nanga ala den fetiwagi nanga a heri legre fu en ini so wan bruya, taki Sisera dyompo fu a fetiwagi fu en dan a bigin lon gwe nanga futu. ₁₆Ne Barak nanga den man fu en go na baka den fetiwagi nanga den srudati fu Sisera te na Hasoret-Hagoyim. Den kiri a heri legre fu Sisera nanga deigri, no wan fu den no tan na libi.

₁₇Sisera lowe nanga futu go na a tenti fu Yael, a uma fu a Kenitiman Heber, bika a ben sabi taki kownu Yabin fu Hasor nanga a famiri fu a Kenitiman Keber ben e libi ini freide nanga makandra. ₁₈Yael waka go miti Sisera na dorosei dan a taigi en taki: “Kon na inisei, mi masra, kon na inisei. Yu no abi fu frede.” So Sisera go ini a tenti, dan a uma tapu en nanga wan krosi. ₁₉Dan Sisera aksi a uma taki: “Gi mi pikinso watra fu dringi, bika watra e kiri mi.” Ne a uma opo wan merkisaka, a gi en fu dringi dan a tapu en baka nanga a krosi. ₂₀Ne Sisera taigi a uma taki: “Go tnapu na mofodoro fu a tenti, dan te wan sma kon aksi efu wan man de dyaso na yu, yu mus taki no.” ₂₁Ma Yael, a uma fu Keber, teki wan fu den udu pen nanga san den e fasi a tenti na gron, a teki wan ambra dan a waka safri go na Sisera di ben fadon na ini wan dipi sribi fu di a ben weri. Dan a uma naki a pisi udu psa ini Sisera en ede, taki a ben fasi na a gron. Na so Sisera dede. ₂₂A srefi momenti dati Barak, di ben lon baka Sisera, doro drape. Yael waka go na dorosei go miti en, dan a taigi en taki: “Kon, mi o sori yu a man di yu e suku.” Di Barak go na inisei, a si taki Sisera ben didon dede nanga a pisi udu ini en ede.

₂₃Na so Gado broko Yabin, a kownu fu Kanaan, saka gi den Israelitisma. ₂₄Den Israelitisma ben e kisi moro nanga moro makti abra kownu Yabin fu Kanaan, te leki den ben puru en na pasi.

₁Tapu a dei dati Debora nanga Barak, a manpikin fu Abinoam, singi a singi disi:

Baka a feti dati a ben tiri fotenti yari langa ini a kondre.

₁Ma den Israelitisma ben e du sani baka di no bun ini MASRA ai. Dat' meki MASRA gi den seibi yari langa abra ini a makti fu den Midyanitisma, ₂di ben e pina den sma fu Israel. Frede ben meki taki den Israelitisma ben meki kibripresi tapu den bergi, ini bergi-olo nanga na tra presi na den bergi di no ben makriki fu teki abra. ₃Ala leisi te den Israelitisma ben prani den gron, den Midyanitisma, den Amalekitisma makandra nanga den folku fu oostsei ben e hari kon feti nanga den. ₄Den ben e opo den tenti te ini a kondre, dan den ben e pori ala den sani di prani, te na Gasa srefi. Not'noti den ben e libi na baka gi den Israelitisma fu den libi go moro fara, no wan skapu, kaw noso buriki srefi. ₅Den ben e hari kon nanga den tenti èn nanga den meti fu den. Den ben furu leki sprenka. No den, no den kameel fu den, ben de fu teri. Te den ben kon, den ben e pori a kondre. ₆Den Midyanitisma ben meki taki Israel ben e pina srefsrefi. Dan den Israelitisma bari suku MASRA.

₇Den Israelitisma bari suku MASRA fu yepi den nanga den Midyanitisma. ₈Ne MASRA seni wan profeiti go na den di taigi den taki: “Na disi MASRA, a Gado fu Israel, taki: Na Mi puru unu na Egipte, pe un ben de srafu. ₉Mi ferlusu unu fu a makti fu den sma fu Egipte, nanga fu ala den tra folku di ben e pina unu. Iya, Mi yagi den gwe gi unu èn Mi gi unu a kondre fu den. ₁₀Mi ben taigi un tu taki: Mi na MASRA, a Gado fu unu. Un no mus anbegi den gado fu den Amoritisma, awinsi na ini den kondre un go tan. Ma un no arki san Mi taigi unu.”

₁₁Dan a Engel fu MASRA kon dan A go sidon ondro a bigi bon na Ofra, di ben de fu Yoas, wan bakapikin fu Abiyeser. Gideon, a manpikin fu Yoas, ben e naki tarwe fu lusu den siri puru na a bosu. A ben e du dati ini wan baki pe den ben e masi droifi fu meki win. A ben e du en drape fu sorgu taki den Midyanitisma no feni en. ₁₂Dan a Engel fu MASRA go na Gideon, dan a taigi en taki: “MASRA de nanga yu, dyadya fetiman.” ₁₃Ne Gideon taigi en taki: “Tye, masra, efu MASRA de trutru nanga wi, fu sanede ala den sani disi e miti wi? Pe ala den wondru fu En de, fu san den afo fu wi ferteri wi? Den ben taki tak' na MASRA puru den ini Egiptekondre. Ma now MASRA no e luku wi na wan ai èn A libi wi gi den sma fu Midyan.” ₁₄Ne MASRA drai, dan A taigi Gideon taki: “Hari gwe nanga a krakti di yu abi èn ferlusu den Israelitisma fu a makti fu Midyan. Na Misrefi e seni yu.” ₁₅Ma Gideon piki taki: “Ma MASRA, fa mi o man ferlusu Israel? A famiri fu mi na a moro pikinwan fu a lo fu Manase èn mi na a moro yonguwan fu a famiri.” ₁₆MASRA piki en taki: “Mi de nanga yu. Na dat' meki yu o man wini den Midyanitisma leki nanga wan sma nomo yu e feti.” ₁₇Ma Gideon aksi baka taki: “Efu Yu abi prisiri nanga mi, gi mi wan marki dati na Yusrefi e taki nanga mi. ₁₈Mi e begi Yu fu Yu no gwe fu dyaso tu. Mi wani go teki wan sani fu gi Yu.” MASRA piki taki: “A bun, Mi sa tan te leki yu kon baka.”

₁₉Ne Gideon lon es'esi go na oso. A srakti wan bokoboko, dan a bori en. A teki blon, dan a baka brede sondro dyesi. Di a kba a poti a meti ini wan mantyi èn a sowsu a poti ini wan patu. A tyari den go ondro a bigi bon, dan a poti den gi En. ₂₀A Engel fu Gado taigi en taki: “Poti a meti nanga den brede tapu a bergiston disi, dan yu e kanti a sowsu na den tapu.” Dan Gideon du dati. ₂₁Dan a Engel fu MASRA langa a tiki di A ben hori ini en anu, dan A fasi a meti nanga den brede. Ne faya kmoto ini a bergiston di bron a meti nanga den brede. A srefi momenti dati A Engel fu MASRA no ben de fu si moro tu. ₂₂Ne Gideon kon ferstan taki a ben de a Engel fu MASRA. Dan a bari: “Masra MASRA, a kba gi mi! Bika mi si a Engel fu MASRA fesi nanga fesi.” ₂₃Ma MASRA taigi en taki: “Freide! No frede, yu no o dede.” ₂₄Dan Gideon bow wan altari leti drape gi MASRA. A kari en: MASRA na freide A altari tnapu te tide tapu a gron fu den bakapikin fu Abiyeser ini Ofra.

₂₅A neti dati MASRA taigi Gideon taki: “Teki a di fu tu bulu fu yu p'pa, a di fu seibi yari. Broko a altari fu Baal trowe di yu p'pa meki. A postu di tnapu drape tu gi a gado fu den yu mus kapu trowe. ₂₆Baka dati yu mus meki wan altari gi MASRA, a Gado fu yu, tapu a moro hei pisi fu a presi disi di skotu. Yu mus meki wan bun altari. Te yu kba yu mus srakti a bulu dan yu e bron en leki wan ofrandi. Yu mus meki a faya nanga a udu fu a postu di yu o kapu trowe.” ₂₇Ma fu di Gideon ben e frede den famiri fu en nanga den sma fu a foto, a no go deiten. Di neti tapu fosi a go nanga tin fu den knekti fu en go du san MASRA taigi en. ₂₈Di den sma fu a foto opo a tra mamanten, den si taki a altari fu Baal ben broko èn taki a postu di ben tnapu drape gi wan gado ben kapu trowe. Den si tu taki a di fu tu bulu ben bron leki wan ofrandi tapu a altari di ben meki. ₂₉Dan den aksi makandra taki: “Suma du a sani disi?” Di den go ondrosuku èn aksi sma, dan den kisi fu yere taki na Gideon, a manpikin fu Yoas, ben du en. ₃₀Ne den taigi Yoas taki: “Tyari a manpikin fu yu kon na dorosei, bika a mus dede. A broko a altari fu Baal èn a kapu a postu fu a gado fu wi trowe di ben tnapu drape.” ₃₁Ma Yoas taigi ala den sma di ben kon na en oso taki: “Na wani un wani feti gi Baal? Na wani un wani yepi en? A sma di wani feti gi en o dede tide mamanten srefi. Efu en na wan gado, meki a feti gi ensrefi now di wan sma broko a altari fu en.” ₃₂Sensi a dei dati a bigin kari Gideon Yerubaal, èn a taki: “Meki Baal kon feti nanga en now di a broko a altari fu en.”

₃₃Den Midyanitisma, den Amalekitisma nanga den folku fu oostsei ben bondru densrefi kon na wan baka. Den ben koti a Yordanliba abra dan den meki den kampu ini a dal fu Yisreel. ₃₄Dan a Yeye fu MASRA kon tapu Gideon. A bro a tutu fu kari den bakapikin fu Abiyeser kon fu hari gwe nanga en. ₃₅A seni boskopuman go ini a heri kontren fu Manase tu fu den hari gwe nanga en. A seni boskopuman go tu na a kontren fu Aser, fu Sebulon nanga Naftali. Den alamala kon fu hari gwe nanga en. ₃₆Dan Gideon taigi Gado taki: “Efu a de so trutru taki Yu wani meki mi ferlusu Israel, soleki fa Yu ben taki, ₃₇dan mi o poti wan pisi skapu buba tapu a gron pe wi e masi den siri fu graan puru na den bosu. Efu tamara mamanten dow de soso tapu a buba, ma a gron lontu en tan drei, dan mi sa sabi taki Yu wani meki mi ferlusu Israel, soleki fa Yu ben taki.” ₃₈Na so a sani psa tu. Mamanten Gideon opo fruku dan a kwinsi a skapububa. A ben man kwinsi wan heri komki watra puru fu a buba. ₃₉Ma Gideon taigi Gado taki: “No meki Yu atibron na mi tapu efu mi aksi Yu ete wan leisi wan sani. Meki mi luku wan leisi wan sani ete nanga a buba. Ma now Yu mus meki soso a buba tan drei èn a dow mus nati a heri gron lontu en.” ₄₀A neti dati Gado du san Gideon aksi En. A buba tan drei ma a heri gron lontu en ben nati fu a dow.

₃₁Dan Yesus go na Kafarnaum, wan foto ini Galilea. Tapu a sabatdei A ben e gi den sma leri. ₃₂Den sma ben ferwondru fu a fasi fa A ben e gi leri, bika A ben taki leki a sma di kon nanga a leri. ₃₃Wan man ben de ini a kerki di ben abi wan takruyeye na en tapu. A bari nanga tranga sten taki: ₃₄“Woooi! Yesus fu Nasaret, san Yu wani nanga unu? Na kon Yu kon fu puru un na pasi? Mi sabi suma na Yu. Yu na a Santa Wan fu Gado.” ₃₅Ma Yesus bari en taki: “Tapu yu mofo, èn kmopo na a man tapu!” Dan a takruyeye fringi a man trowe na gron na mindri den sma pe a ben tnapu. Dan a kmopo tapu a man sondro fu du en wan ogri. ₃₆Ala den sma ben ferwondru. Den taigi makandra taki: “San na a leri disi? Bika nanga makti nanga krakti A e komanderi den takruyeye, èn den e gwe!” ₃₇Dan so a nen fu Yesus ben bari na ala sei ini a kontren dati.

₃₈Baka dati Yesus kmopo ini a kerki, dan A go na a oso fu Simon. Now a m'ma fu a uma fu Simon ben didon nanga hebi korsu, so den aksi Yesus fu dresi en. ₃₉Yesus go tnapu na en sei, dan A taigi a korsu fu libi a skin. Ne a korsu saka. Wantron a uma opo, dan a poti nyanyan nanga dringi gi den. ₄₀Di a son saka, den sma tyari ala den sikisma fu den di ben abi ala sortu siki, kon na Yesus. Wan fru wan A ben poti anu na den tapu èn A dresi den. ₄₁Owktu takruyeye ben kmopo tapu furu sma. Den ben e bari taki: “Yu na a Manpikin fu Gado.” Ma Yesus bari den. A no gi den okasi fu taki, bika den ben sabi taki En na a Mesias.

₄₂Di dei broko Yesus go na wan presi dorosei fu a foto pe sma no e libi. Dan den sma go suku En. Di den feni En, den ben wani hori En fu A no gwe. ₄₃Ma A taigi den taki: “Mi mus go na den tra foto tu, fu tyari a bun nyunsu tak' Gado o bigin tiri libisma. Bika na fu a sani dati Gado seni Mi kon.” ₄₄So A go preiki na ini den kerki fu Yudea.