Jézi ka pryè pou so kò
1Lò Jézi fini palé konsa, li lévé so wèy laro syèl, é li di: “Papa, tan-an rivé! Fè moun wè laglwar to Pitit, pou to Pitit fè moun wè to laglwar osi.
2A pousa, to bay li drwè ansou tout moun latè, pou li bay tousa to bay li-a lavi pou tout tan.
3Atò, lavi pou tout tan a di konèt to, to sèl vrè Bondjé, é di konèt Jézi-Kris, sala to voyé-a.
4Mo fè wè to laglwar ansou latè, lò mo fini travay to bay mo fè-a.
5Anprézan, Papa, bay mo laglwar òbò to, laglwar mo té ganyen òbò to-a anvan latè-a té fèt.
Jézi ka pryè pou so disip-ya
6Moun-yan to bay mo, annan moun latè-a, mo fè yé konèt to non. Yé té sa to pa, to bay mo yé é yé kouté to palò.
7Anprézan yé savé a to ki bay mo tousa mo gen,
8Piski mo di yé palò to bay mo-ya é yé risouvwè l. Yé rikonèt vrèman mo soti koté to é yé krè a to ki voyé mo.
9Mo ka pryè pou yé, mo pa ka pryè pou ròt moun latè, mé pou moun-yan to bay mo-a, piski yé sa to pa.
10Tousa mo gen a di to é tousa to gen a di mo. Mo fè moun wè mo laglwar annan yé.
11Mo pa ké la ansou latè ankò, mé yé ké rété ansou latè é mo ka alé jwenn to. Papa to sen, mo ka doumandé to véyé ansou yé ké otorité to non, non to bay mo-a, pou yé fè roun sèl, kou to menm ké mo ka fè roun.
12Lò mo té ké yé, mo té ka véyé ansou yé ké pouvwè to non, non to bay mo-a. Mo véyé ansou yé, é yé pyès pa pédi, sòf sala ki té divèt pédi pou sa Liv Bondjé di-a fèt vrè.
13Anprézan mo ka alé jwenn to, é mo ka di tousa pannan mo la ansou latè-a ankò, pou yé ganyen menm tchò kontan mo ganyen-an, roun tchò kontan pasé kontan fèt.
14Mo bay yé to palò, é moun latè rayi yé, piski yé pa kou moun latè, kou mo menm mo pa kou moun latè.
15Mo pa ka pryè to pou tiré yé di latè-a, mé pou protéjé yé di Mové-a.
16Yé pa sa moun latè, kou mo pa sa moun latè.
17Konsakré yé plito ké lavérité-a: to palò sa lavérité-a.
18Kou to voyé mo vini ansou latè-a, mo ka voyé yé osi ansou latè-a.
19E mo ka konsakré mo kò mo menm pou yé, pou yé konsakré osi ké palò lavérité-a.
Jézi ka pryè pou moun ké krè an li
20A pa pou yé sèlman mo ka pryè, mé a pou tousa ki ké krè an mo osi gras a yé témwanyaj.
21Mo ka pryè pou yé tout fè roun sèl. Kou to, Papa, to annan mo é kou mo annan to, mo ka doumandé to fè yé fè roun sèl annan nou pou moun latè krè a to ki voyé mo.
22Mo bay yé laglwar to bay mo-a, pou yé fè roun sèl kou nou ka fè roun.
23Mo ka viv annan yé, to ka viv annan mo; a konsa yé ké fè roun sèl pou vrè, é a konsa moun latè ké rikonèt to voyé mo é to kontan yé kou to kontan mo.
24Papa, sa ya to bay mo-a, mo lé yé la koté mo fika, pou yé wè laglwar to bay mo-a, piski to kontan mo dipi koumansman latè.
25Papa, to ki jist, moun latè pa konèt to, mé mo mo konèt to, é sa ya konpran a to ki voyé mo.
26Mo fè yé konèt to non é mo ké fè yé konèt li ankò. Konsa lanmou to gen pou mo ké annan yé é mo menm ké annan yé.
