Sranan Tongo Bible 2016 (STB16)
1

A fasi fa ala sani bigin

11Na a bigin Gado1:1 A Hebrewtongo taki: Elohim. meki heimel nanga grontapu. 2Grontapu ben bruya èn leigi. Wan dipi dungru ben de abra a watra di ben de na grontapu. A Yeye fu Gado ben e beweigi abra a watra.

3Dan Gado taki: “Faya mus de.” Èn faya ben de fu si. 4Gado si taki a faya ben bun, dan A prati a faya nanga a dungru. 5Dan Gado kari a faya dei èn a dungru A kari neti. Neti tapu èn dei ben opo. Na so a fosi dei psa.

6Dan Gado taki: “Wan sani mus de na mindri fu a watra di e prati a watra.” 7So Gado meki wan sani fu prati a watra di de na loktu, nanga a watra di de na gron. Na so a psa. 8Dan Gado kari a sani di A meki fu prati a watra, heimel. Neti tapu èn dei ben opo. Na so a di fu tu dei psa.

9Dan Gado taki: “A watra na grontapu mus kon makandra na wan presi, fu drei presi kan de fu si.” Èn na so a psa. 10Gado kari a dreipresi gron. A watra di ben kon na makandra A kari se. Èn Gado si taki a ben bun.

11Dan Gado taki: “Sani mus gro na grontapu: wiwiri mus de di e gi siri èn froktubon mus de di e gi froktu nanga siri.” Èn na so a psa. 12Sani bigin gro na grontapu: wiwiri ben de di ben e gi siri, nanga bon di ben e gi froktu nanga siri. Èn Gado si taki a ben bun. 13Neti tapu èn dei ben opo. Na so a di fu dri dei psa.

14Dan Gado taki: “Faya mus de na heimel fu prati dei nanga neti. Den mus de leki wan marki gi fasti ten fu a yari, gi spesrutu dei nanga spesrutu yari. 15Den mus de na heimel fu gi faya na grontapu.” Èn na so a psa. 16Dan so Gado meki den tu bigi faya. A moro bigiwan ben o de basi deiten, a pikinwan ben o de basi te neti. Èn Gado meki den stari tu. 17Gado gi den wan presi na loktu na heimel, fu gi faya na grontapu, 18fu den ben de basi fu dei nanga neti èn fu prati leti nanga dungru. Èn Gado si taki a ben bun. 19Neti tapu èn dei ben opo. Na so a di fu fo dei psa.

20Dan Gado taki: “Den watra mus lai nanga libisani di e beweigi na ini, èn fowru mus frei psa hei na loktu abra grontapu.” 21So Gado meki den bun bigi meti di de ini a se nanga wan heri ipi libisani di e beweigi ini a watra. A meki alamala na den eigi fasi. A meki ala sortu fowru tu na den eigi fasi. Èn Gado si taki a ben bun. 22Dan Gado blesi den èn a taki: “Un meki pikin, un meki furu pikin: a watra fu den se mus lai nanga libi èn grontapu mus kon furu nanga fowru.” 23Neti tapu èn dei ben opo. Na so a di fu feifi dei psa.

24Dan Gado taki: “Libisani mus de na grontapu: meti di yu kan kweki, meti di e kroipi, nanga krasi meti. Den mus de na den eigi fasi.” Èn na so a psa. 25So Gado meki den krasi meti. A meki den meti di yu kan kweki nanga ala den sani di e kroipi na gron. A meki den alamala na den eigi fasi. Èn Gado si taki a ben bun.

26Dan Gado taki: “Meki wi meki libisma di de leki wi èn di gersi wi. Den mus de basi abra den fisi fu den se, abra den fowru di e frei na loktu, abra den meti di yu e kweki, abra heri grontapu nanga ala meti di e kroipi na gron.” 27So Gado meki libisma di ben o de leki En. Leki fa En de, na so den ben o de. A meki man nanga uma. 28Dan Gado blesi den èn a taigi den taki: “Un meki pikin, un meki furu pikin fu den furu grontapu. Un mus de basi fu grontapu. Un mus de basi abra den fisi fu den se, abra den fowru di e frei na loktu, nanga abra ala meti na grontapu di e kroipi na gron.” 29Gado taigi den moro fara taki: “Luku, Mi e gi unu ala wiwiri na grontapu di e gi siri, nanga ala bon di e gi froktu nanga siri, fu un nyan fu den. 30Ma ala tra wiwiri Mi e gi na den meti fu grontapu, den fowru di e frei na loktu, na ala den meti di e kroipi na gron nanga ala tra libi sani.” Èn na so a psa. 31Dan Gado luku ala sani di A meki èn den ben bun fu tru. Neti tapu èn dei ben opo. Na so a di fu siksi dei psa.

2

21Na so heimel nanga grontapu nanga ala sani di de na den ini ben meki. 2Di Gado kon kba tapu a di fu seibi dei nanga ala a wroko, A bro tapu a dei dati fu ala a wroko di A ben du. 3Dan Gado blesi a di fu seibi dei èn A poti en leki wan aparti dei, bika tapu a dei dati A bro fu ala a wroko di A ben du fu meki ala sani.

4Dati ben de a tori fa heimel nanga grontapu meki. Na so den ben meki.

Gado e meki wan dyari fu poti a libisma

Di MASRA Gado2:4 A Hebrewtongo taki: Yahweh Elohim. ben e meki heimel nanga grontapu, 5no wan sani ben gro ete èn no wan wiwiri ben sproiti ete. Bika MASRA Gado no ben meki alen fadon ete na grontapu èn libisma no ben de ete fu wroko a gron. 6Ne wan dampu kmoto ini a gron di nati heri grontapu. 7Dan MASRA Gado teki kleidoti fu a gron dan A meki wan libisma. Baka dati A bro a libibro na ini en noso. Na so a libisma tron wan libisani.

8Moro fara MASRA Gado seti wan dyari ini Eden, na a sei pe son e opo. Dan A poti a libisma di A ben meki, drape. 9MASRA Gado ben meki ala sortu bon gro drape. Den ben moi fu si èn den ben e gi bun froktu fu nyan. Na mindri fu a dyari yu ben abi a bon di ben e gi a libi fu têgo, nanga a bon di ben e meki yu kon sabi bun nanga ogri.

10Wan liba ben e lon na ini Eden di ben e sorgu taki a gron fu a dyari ben abi watra. Drape a ben e prati ensrefi na ini fo tra liba. 11A fosiwan ben nen Pison èn a ben e lon kronkron ini a heri kondre Hawila, pe gowtu de. 12A gowtu fu a kondre dati bun. Drape yu e feni hars2:12 Hars na wan sortu balata nanga wan switismeri. nanga a diri ston di den e kari Krisopas. 13A di fu tu ben nen Gikon èn a ben e lon kronkron ini a heri kondre Kus. 14A di fu dri ben nen Tigris èn a ben e lon na a oostsei fu Asur. A di fu fo ben nen Eufrat.

15Dan MASRA Gado poti a man2:15 A wortu di un puru nanga man wan taki libisma tu. na ini a dyari fu Eden fu wroko a gron èn fu sorgu gi en. 16MASRA Gado komanderi en taki: “Yu kan nyan fu ala bon di de ini a dyari. 17Ma yu no mus nyan fu a bon di e meki yu kon sabi bun nanga ogri. Bika a dei sa yu nyan fu en, na dede nomo yu sa dede.”

18Dan MASRA Gado taki: “A no de wan bun sani, taki a man tan en wawan. Mi sa meki wan yepi gi en, di fiti en.” 19Ne MASRA Gado teki kleidoti fu a gron dan A meki ala den meti fu grontapu nanga ala den fowru di e frei na loktu. Dan A tyari den gi a man fu si fa a ben o kari den. Èn soleki fa a man ben kari ala sani di e libi, na so den ben o nen. 20A man gi nen na ala den meti di yu kan kweki, na ala den fowru di e frei na loktu nanga ala den krasi meti. Ma a no feni wan yepi gi ensrefi di ben fiti en. 21Dan MASRA Gado meki a man fadon ini wan dipi sribi. Di a e sribi Gado puru wan lebrikibonyo fu en, dan A tapu a presi dati nanga meti. 22Ne MASRA Gado meki wan umasma fu a lebrikibonyo di A ben puru fu a man. Dan A tyari en gi en. 23Ne a man taki:

“Disi leisi a de

mi eigi bonyo nanga mi eigi meti.

Mi o kari en uma,

bika a kmoto fu a man.”

24Fu dat'ede wan man sa gwe libi en p'pa nanga en m'ma fu go libi nanga en uma èn den sa de wan.

25Den ala tu ben de nanga sososkin, a man nanga en uma, ma den no ben e syen gi densrefi.

Door deze website verder te gebruiken gaat u akkoord met plaatsing en gebruik van cookies door het SBG en derden conform onze privacyverklaring.[bericht verbergen]