Masmur 145

Duh Gusti Allah kula, duh Ratu, Panjenengan bakal kula luhurké,

lan bakal tansah memuji asma-Mu tekan sak lawasé.

₂Saben dina kula bakal memuji marang Panjenengan,

lan asma-Mu bakal tansah kula luhurké tekan sak lawasé.

₃GUSTI kuwi gedé lan banget pinujiné

kaluhurané kuwi ora bisa dijajaki.

₄Saben turunan bakal ngelem-elem penggawéan-Mu,

lan pada bakal nyeritakké kekuwatan-Mu.

₅Padangé kamulyan-Mu sing gedé

lan penggawéan-Mu sing nggumunké bakal kula kidungé.

₆Wong okèh pada bakal ngabaraké kekuwatané penggawéan-Mu sing medèni,

lan kaluhuran-Mu bakal kula tyritakké.

₇Pengéling-éling kanggo kabetyikan-Mu sing gedé bakal dikabarké karo wong-wong iki,

lan bakal pada surak-surak awit sangka keadilan-Mu.

₈GUSTI kuwi kebak trésna lan welas,

sabar banget lan gedé banget kasetian-Né.

₉Kabetyikané GUSTI kuwi marang wong kabèh

lan kawelasan-Né nglubèri kabèh karo sing digawé Panjenengané.

₁₀Duh, GUSTI, kabèh sing Panjenengan dadèkké kuwi bakal maturkesuwun marang Panjenengan,

lan para katrésnan Panjenengan bakal pada memuji marang Panjenengan,

₁₁pada bakal ngluhurké kamulyané kraton Panjenengan,

lan bakal ngrembuk kekuwatan Panjenengan,

₁₂supaya para anak-anaké manungsa pada krungu kabar bab kekuwatan-Mu,

karo kamulyané semloroté kraton-Mu.

₁₃Kraton-Mu kuwi kraton sing langgeng,

lan pemrintahan-Mu kuwi tetep marang kabèh anak-putuné.

GUSTI kuwi setia karo tembung-tembungé

lan kebak kawelasan kanggo kabèh penggawéan-Né.

₁₄GUSTI kuwi dadi sing nyangga kanggo kabèh wong sing tiba

lan sing jejekké kabèh wong sing ndingkluk.

₁₅Kabèh mripat pada ngarep-arep marang Panjenengan,

lan ya pada Panjenengan kèki pangan ing waktuné.

₁₆Panjenengan sing megarké tangan-Mu,

lan nglilani mareki kabèh sing urip.

₁₇GUSTI kuwi adil ing sak tumindaké,

lan kebak kawelasan ing sak penggawéan-Né.

₁₈GUSTI tyedak karo saben wong sing nyebut marang asma-Né,

lan karo wong sing sambat marang Panjenengané karo setia.

₁₉Para wong sing ngabekti marang Gusti Allah pada dituruti kekarepané,

digatèkké sambaté terus pada diluwari.

₂₀GUSTI njaga marang sak kabèhé wong,

sing trésna marang Panjenengané, nanging kabèh wong duraka bakal pada dientèkké.

₂₁Tutukku masrahaké pamuji marang GUSTI,

lan kabèh makluk ya bèn pada tansah ngluhurké asma-Né sing sutyi tekan selawasé.