1 Thessalonians 4

₁Molopai uselupa wenukapù pe, te uya utonpa yamùk, mesenupatantàu ku ina winà tà yà'là kasa là wema'nàtok Katù yauchinpanài pe wechi mùttutantàu. Sàlà kasa làkku ewemapù kon màlà. Màlàpàk nen uchi sàlà ina uya kulu apawanattà kon, Itepulu Jesus yesek yau, wakù peiwa i'napailà ewemapù kon pa. ₂Masapùla eyenupappù kon ina uya mùttuyatàik Itepulu Jesus yapàikketù yai. ₃Sàlàichi màlà Katù wettok iche, yawàlà ewechi kon pa. Wakù pe esuken molopai àli imakuyippù kuttok màlàwannà ke pokonpe pùla ewemattok kon yau ewechi kon pa. ₄Wakù pe noppùtantok yeselu tùttuik ekkà, wakù molopai tùnamai'nai'nùk yawàlà, ₅Iche ewettok yappyato pe kechii wapùla kemapùi, Katù ittunài nan pen yeselu kasa là iteselu kettàu. ₆Màlàpàk uchi ànù' là iwalai pen nà kuttak tùtonpa kon winàkàik, wapùla wakù pe là iwemattok mattanùttak. Sàlà yekamappù ku ina uya àpàkù'nokon, ina eyekamappotantàu tùuseka’nonkaik, Itepulu Jesus uya màlà yekkwa ton àli ku’nàinannùssan talumattà màlà. ₇Àli yau là wema’nàtok kon pe Katù uya kùkà'ma kon pùn tùse wakù pe, esuken Katù tùnamaik we’nàtok kon pe kùkà’massak kon ya màlà. ₈Màlàpàk uchi ànù'là sàlà enupantok nulunpanài uya, kappon pen nulunpa màlà, tùse Katù nulunpa ya, mùkkàlà elepanài'nokon Wakù Akkwalù ke. ₉Suwa kuluichi àtonpa kon mù'nùnmatàik tukaik emenukatok kon uya iwenai woton pùla man. Masapùla Katù uya apanamappù kon màlà yà'là kasa là tùuchi'nùnmaik ewemattok kon pàk. ₁₀Molopai sàlà kasa ewessak kon man tamù'nawolon kon ailon tawonnan, àtonpa kon yamùk, Macedonia pon kon pàk. Màlàpàk miyaiwa eke peiwa ikupù kon pa ina apawanattàyatàu, ina tonpa yamùk. ₁₁Intakek pe pùla emattàk kon echitonpa pe, mùkklà nùkupù tense pùla eyiwalà’nokon molopai e’wotokomatàk kon ewemattok ipàk yepolo kon pa. ₁₂Sàlà kasa ailon tawonnan pen uya anamatok kon yepolo auya’nokon màlà, molopai enpen ànù'là pàk ewechi kon pen nen uchi.

₁₃Ina tonpa yamùk, iwelichak kon yekale, ailon kulu, ittu sa' auya'nokon iche kulu ina man, eusewankono'ma kon tukaik, mùkyamlo enpen iwettok ipàk pùnon kasa là. ₁₄Ailon tawonnan ku kùmyamlo tà Jesus welikùppù pàk molopai iwe'wuluuka tu'mappù pàk. Màlàpàk nàlà nen uchi mùkyamlo iwelikchak kon ailon tei'ma Jesus pàk nepù Katù uya Jesus ya'là pàk ailon tawonnan kùmyamlo.

₁₅Masapùla sàlà màlà Itepulu uya enupantok ina nekama yai'nùk àpàkù'nokon. Kùmyamlo nulà nai'nannùk utà Itepulu Jesus uyàpù weyu yattai iwelichak kon wapiya pen màlà. ₁₆Eke wentaimentok wechi màlà molo meluntà pe kan, inchelù yepotolù maimu useta màlà, Katù wayi tàwù màlà molopai nen uchi Itepulu uttù màlà epùn poi! Mùkyamlo iwelichak kon ailon tei'ma Christ pàk we'wuluuka màlà wapiya. ₁₇Màlàyau nen uchi kùmyamlo pàli'yawon kon màlà yattai wepilipù màlà tok pokonpe katuppluk yau Itepulu wakkàsse kau. Molopai nen uchi màlà Itepulu piyau we'nà tàwàlà. ₁₈Màlàpàk meluntà pe ettàk kon eyewan kon ipittàtàk kon sàlà mayin ke.