2 Corinthians 10

₁Tùusentuppaik molopai wakù pe Christ wettok winà, apawanattàyatàu Iulà. Iulà Paul “àssà'mùn” apyau'nokon wechi yau, tùse “meluntà” apyau'nokon pùla wechi yau. ₂Apawanattà kon uya, apyakù'nokon uyàssak yau meluntà pe wechi pe uyittu auya'nokon tukaik, mùkyamlo sàlà wolù yeselu yamùk yau ina welaika pe ittunnan pàk wettok woton kasa. ₃Masapùla wolù yau là wema'nà'nokon tùse, ina wepanta'matok wechi wolù yawon kasa pùla màlà. ₄Ina ulapayi yamùk ina wepanta'matok ike màlà wolù yawon kon walai pen. Tùse meluntà Katù wepanta'matok ike, eyaton uso'namù patassek sa'man mattanù'nai pe iwechi. ₅Usàulàmantok kon molopai tamù'nawolon uselupantok Katù ittutok wakà'nài mattanù'nài nan ina. Tamù'nawàlà usenumenkantok yachinài nan ina, Christ maimu yawàlà iwettoppe. ₆Màlàpàk tamù'nawolon yau imaimu yawàlà eppai ewechi kon yau, ànù'là nen uchi imaimu yawolon pen talumattà ina uya màlà.

₇Eyemloto kon po nai'nùk yentàk kon! Ànù'là Christ ponaloppe tùuchittusen wechi yau, tàwà nùsenumenka tu'mai Christ ponaloppe ina wechi pàk tùkasa làma. ₈Masapùla wekuli'ma pùla man, Itepulu uya ina lepatok apàikkek pàk lànen utapulàsak tùse. Sàlà apàikkek wechippù màlà ayamùtok kon ina uya pe, ayalakkatok kon pe ina uya pùla. ₉Atalipaiche'nokon wechi pen ukaletayi yamù ke. ₁₀Tùulon kon uya, “Paul kaletayi màlà àsà molopai meluntà, tùse kùpyau'nokon iwechi kappon pe yau, atu'mùn mùkkàlà molopai imaimu màlà yà'là pen!” te. ₁₁Tàwà mùkyamlo yekkwa nùttui tùpatalon pùla iwechi ina kaletayi ina nùmenuka apyau'nokon pùla echi'ma yau, molopai ina nùkupù woton yau molo ina wechi apyau'nokon yau.

₁₂Ina wechi meluntà pe tukaik là mùyamlo tùulon kon kàyik yamùk kasa eke pe pen màlà, mùkyamlo wakù pe kulu tùwechi kon yekamanài nan. Tùusensan neken mùkyamlo tùulon kon tùwalai'nokon pokonpe molopai tùuchittusan teselu kon winà. Pukek ton pen mùkyamlo sàlà kupù pàk! ₁₃Ina utapulàtok utà ina meluntàlù tentakase pen màlà. Tùse ina wotokoyi màlà ikuttoppe ina uya Katù nùtùlùppù kupù, àkklottau nokon ina we'wotokoma toppe. ₁₄Tùutapulàtok kon yau mei kulu ina utà pen sàlà eyeponàippù nokon pen kasa là, masapùla ina wechippù wapiyalok kon pe tùuyàpù kon apyakù'nokon Christ yekale pokonpe yau. ₁₅Màlàpàk ina utapulà tùulon kon nùkupùppù wotoko pàk pùla man. Tùse làkku enpen ina man ailon tetok auya'nokon wekatù pàk, molopai eke peiwa ina wotokoyi wettoppe àkklottau'nokon. ₁₆Màlàpàk nen uchi ina uya Wakù Itekale yekama toppe tùulon kon pata yamùk àwoino kon yau, tùulon kon wotokoyi ikukasak lùppù tùulon pata yamùk yau pàk ina utapùlà tukaik.

₁₇Tùse, “Tàwà ànù'là atapulàpaino Itepulu nùkupùppù yapulài.” ₁₈Masapùla kappon yanùnnsak kulu màlà Itepulu uselupa wakù pe ipàk yau, tùpàk wakù pe ichelupa yau pùla.