1Sàlà màlà kaleta Iulà amoko, John nùmenukappù, Gaius u'nùn kulu piyak.
2Uwechi yakon, wàpàlemayaik tamù'nawolon wettoppe wakù pe molopai e'nek pùla ewechi pa, wakù pe là ewechi ayakkwalù yau kasa. 3Utauchinpatai kulu ailon tawonnan Katù pàk tonpa yamùk welepansak pàk, molopai ailon pe ewechi yekamasak tok uya pàk, tàwàlà ailon pe ewemapù yekamasak tok uya pàk molopai màlà kasa tùwemassen pe ewechi pàk. 4Yà'làlà uyauchinpanài woton pùla iwechi màlà Christ winàkàik unpùikattàssan wemapù ailon yau pàk utauchinpa yentaino.
Gaius Yapulà
5Uwechi yakon kulu, ailon pe kulu messaik màlà wotoko ànkupù yau, mùkyamlo tonpa wannà yamùk pàk kakklan yamùk pe lànen tok wechi tùse, pena tok yensak auya pùla lànen tùse. 6Pùnùnman auya yekale yekamasak tok uya man talonnà sochi tawon kon pàk. Te'ma kon tawàichi tok wechi yàwà tok ipuikattàkà. Katù yauchinpanài pe neken. 7Masapùla tok wepyattàsak man Christ wotokoyi yau, ailon tawonnan pen winàpai tùwepùikattàtok kon tepose pùla. 8Kùmyamlo nen uchi, Jesus pàk ailon tawonnan pùsamlo kappon yamùk pùikattài, tamùkke tùwepùikattàik we'wotokoman toppe, ailon itekale yau.
Diotrephes molopai Demetrius
9Tokkwen kaleta tùmenukatai sochi tawon kon piyak, tùse Diotrephes, tok yesappe eppai tùwessen, wechi uselupa enetapai pùla màlà. 10Uyàssak yau nen uchi, màlà tamù'nawolon àli pe ichelupappù kùwinàkài'nokon yekama uya ipàk: tamù'nawolon kasei pe ichelupappù yekama uya màlà. Tùse màlà neken pen, ailon tawonnan Katù pàk tonpa wannà yamùk yanùmù ya pùla iwechi màlà tok uyàssak yau, molopai nàlà mùkyamlo ananùnpai nokon yeleutanùpù ya. Tok yenpakkaiche tùwessen mùkkàlà sochi tapai.
11Uwechi yakon kulu, àli pe nai'nùk kasa kechii, tùse wakù pe nai'nùk kasa ekkà. Ànù'là wakù ku'nài wechi màlà Katù ponaloppe; molopai ànù'là àli ku'nài uya Katù yensak pùla man.
12Tamù'nawolon kon mùkyamlo Demetrius pàk tùselupassan wakù pe, masapùla ailon pe kulu iwechi pàk. Molopai ina nàlà ailon mùkkàlà nùkayan; molopai ina nùselupayai'nùk wechi ailon pe mùttuyaik.
Tewin itekkwalok pe “Wakù pe na' mesan?” tetok John uya.
13Tukke unekama molo man àpàk, tùse ànkuppai pùla wessaik kaleta pàk. 14Enpen wessaik, eyene uya màlà sàlà pe'ne là molopai uselupan màlà kùyiwalà àpokonpe neken.
15Tàwà wakù pe echitonpa pe we'nàtok apyau nechii.
Tamù'nawolon kon ewechi yakon non: “Wakù pe na' mesan?” nùkayan. Molopai tamù'nawolon kon ina wechi yakonnon pàk, “Wakù pe na' messatàu?” kakkà àmàlà pe ina ponaloppe.
