Barnabas Molopai Saul Tawonnan Yanùmùppù Molopai Tok Yeunokoppù
1Sochi tau Antioch po màlà Katù Maimu yenpoikannan molopai enupannan wechippù. Tok kùlottau Barnabas, Simeon Niger tukaik tesassen, Lucius Cyrene poino, Manaen, pata yesak Herod piyau ichemokkasak molopai Saul wechippù molo. 2Tok wechi Itepulu yapulà pàk. Tùuta'lettàik pùla tok wàpùlema tùse, Wakù Akkwalù uya, “Barnabas molopai Saul yanùntàk kon uponaloppe, uwotokoyi kuttoppe tok uya unkà'massan,” teppù tok pàk. 3Tùuta'lettàik pùla tùwàpùlema kon tùpo, tok uya temyatù kon nonkappù Barnabas molopai Saul tawonnan pona molopai tok yeunokoppù tok uya.
Cyprus po
4Barnabas molopai Saul tawonnan utàppù nen uchi Wakù Akkwalù neunokoppù pe, Seleucia pona molopai tok utàppù tuna po màlà motapai tuna yaploppon pata Cyprus pona. 5Tok welepansak Salamis pona yau, tok uya Katù Maimu yekamappù Jew yamùk wepilittok itak yamùk tau. John Mark wechippù màlà tok ya'là tok pùikattànài pe sàlà wotoko yau.
6Màlà pata yau tok utàppù màlà mei Paphos tentakase, màlàyau kàyik piyassan walai yepoloppù tok uya, Jew pe iwechi, itesek Bar-Jesus. Mùkkàlà Katù Maimu yenpoikanài pe tukaik tùwekkussen. 7Mùkkàlà wechippù màlà, màlà pata yepulu, Sergius Paulus, piyawon pe. Mùkkàlà Itepulu, pukkek, uya Barnabas molopai Saul tawonnan kà'mappù temlotopona masapùla Katù Maimu enetapai tùwechi pàk. 8Tùse Elymas, piyassan walai, uya tok wakkàtùppù, (sàlà Elymas màlà Greek yau itesek) Itepulu lattàiche iwechippù ailon tetok winàpai. 9Màlàyau Saul, Paul tukaik nàlà tùttusen, wanùssak wechippù màlà Wakù Akkwalù ke. Molopai piyassan walai yeneppù ya iponalà tossalà. 10Molopai wateppù ya “Devil mumu àmàlà! Tamù'nawàlà wakù ton iteyaton àmàlà. Molopai àli ennakantok ke iwanùssak àmàlà molopai Katù wettok ailon pe lattàiche tùwessen àmàlà kasei pe! 11Katù yemyatù uyàpù màlà àpona sàlà pe, enpùla ewechi màlà tachin pe lùkkwà là, molopai wei yakkwayi yene auya pen màlà,” teppù Saul uya piyassan walai pàk. Màlà yattai asse'ne Elymas uya ikklùn katuppluk walai uya tenu waputtà ittuppù. Molopai ichalàppù ànù'là talà woton temyatù pàk iwa pe. 12Màlàyau itepulu uya ailon teppù, màlà wekkupù yensak tùuya yau; molopai eke pe ichenumenkasak wechippù, Itepulu Jesus pàk usenupantok pàk.
Antioch Pisidia pon yau
13Paul molopai itonpa yamùk utàppù tuna po, Paphos yapai Perga, Pamphylia pon pona; tùse John Mark uya tok nàmàppù molo molopai iwennapoppù Jerusalem pona. 14Tok utàppù Perga poi molopai tok uyàpùppù Antioch Pisidia pon yak, molopai Wàlàkka'nàtok Weyu yattai tok utàppù Jew yamùk wepilittok itak tak molopai tok weleutappù. 15Law molopai Katù Maimu yenpoikannan nùmenukappù yene tùpo, Jew yamùk wepilittok itak yesak ton uya mayin yeunokoppù Barnabas molopai Paul piyak. “Ina tonpa yamùk, kappon yamùk yelupa auya'nokon iche ina man, Itekale tok meluntàlùttàtok auya'nokon wechi molo yau,” tukaik. 16Paul wà'mùssakkappù, temyatù ke tok yekamappoppù ya molopai iwepyattàppù kappon yamùk yelupa pàk.
“Utonpa yamùk, Israelite yamùk molopai tamù'nawàlà Jew yamùk pen talà Katù namannan. Kùyetatàk kon! 17Pùsamlo Israel pon kon Katùyi uya ina tamo yamùk yanùmùppù màlà, molopai tok kupùppù ya eke pe, kaklan pe tok wemapù pata Egypt yau yattai. Katù uya tok nepùppù màlà Egypt yapai eke tùmeluntàlù ke, 18molopai 40 pe kilichimochi tok yeselu pàlikappù ya wontaik yau. 19450 pe kilichimochi yau 7 pan pata yamùk yawolon kon mattanùpùppù ya Canaan po, molopai tùponalok kon kappon yamùk kupùppù ya pata yesappe. 20“Màlà tùpo tok ittunnan ke tok yepulu pe tok lepappù ya Katù Maimu yenpoikanài Samuel wemattok yattai ponalà.
21Molopai kin yennasak tok uya yau, Katù uya Saul, Kish mumu, Benjamin pa ke tok lepappù tok kinù pe iwettoppe 40 pe kilichimochi. 22Saul mokka tùpo Katù uya David kupùppù tok kinù pe. Sàlà màlà Katù uya ipàk, ‘David, Jesse mumu yeposak uya man, iche wettok kàyik, mùkkàlà kàyik mùkkàlà tamù'nawàlà iche wettok kupù woton,’ teppù lùppù. 23Mùkkàlà Jesus, David payan tonpa, kupùppù Katù uya Israel pon kon Pùikattànài pe iwettoppe ikupù tùuya teppù tùuya kasa. 24Jesus uyàpù wapiya, John uya itekale yekamappù tamù'nawolon kon Israel pon kon pàk, tok welattà toppe tùmakuyi kon winàpai Katù winàkàik, molopai tok usenpatauka toppe. 25Molopai tùwotokoyi yenuka'nùpù tùuya winàkàik tùwechi yau, John uya kappon yamùk pàk, ‘Ànùk pe ken kùyittuyatàu? Mùmàmussatài'nùk pen Iulà. Tùse Nùyàssan uye'mappù pàk, molopai ittasa yewa yeuka uya yentaino!’ teppù ya.
26“Utonpa yamùk, Abraham payan nùssan, molopai Jew yamùk pen talà Katù yapulàn nan, kùponalok pe màlà sàlà wepùikattàntok yekale yeunossak! 27Masapùla kappon yamùk Jerusalem pon kon, molopai tok yepulu yamùk uya, Jesus ittu pùla iwechippù. Molopai tok uya Katù Maimu yenpoikannan Maimu lùppù tùnene kon echipalà Jew yamùk wàlàkkattok weyu yattai'ne ittu pùla iwechippù. Tùse pùsamlo yenpoikannan maimu lùppù kupùppù tok uya iwekkupù màlà teppù Katù uya kasa, Jesus kupùppù tùuya'nokon pàkàlà. 28Iwàtok tùuya'nokon iwenai yepolo tùpo pùla, Pilate yekamappoppù tok uya iwàtoppe itùtoppe ya. 29Tamù'nawàlà Katù Maimu we'menukasak ipàk kupù tùpo, tok uya inuttàppù pulusuk poi molopai tok uya inonkappù uluwaik yak. 30Tùse Katù uya iwuluukappù weli'nàtok yapai. 31Molopai tukke wei yeneppù mùkyamlo ya'là ichasak kon nùssan Galilee poi Jerusalem pona uya. Mùkkàlà pàk tùuselupasan nen uchi mùkyamlo Israel pon kon kappon yamùk pàk. 32-33Wakù Itekale nessak ina uya apyakù'nokon man, màlà Katù uya ikupù tùuya teppù lùppù kùtamo kon pàk. Màlà kussak ya man sàlà pe kùponalok kon pe, kùmyamlo tok payan nùssan, Jesus wuluuka tùuya weli'nàtok yapai winà. Iwe'menukasak yakon Psalm yau kasa,
‘Umu àmàlà, sàlà pe àkàipùnù pe wenasak man,’ tukaik.
34Sàlàichi màlà wa teppù Katù uya lùppù, iwuluuka tùuya weli'nàtok yapai pàk, àkàtase làma tùwennappo tu'ma woton pe pùla.
‘Elepa uya màlà wakù molopai ailon lepantok ke, màlà, ikupù uya màlà teppù uya David pàk lùppù ke,’ tukaik.
35Tùulon yailà wate ya kasa,
‘Iwettùsak wakù kulu ayapyoto kupù auya ikkàtatoppe pen màlà,’ tukaik.
36Masapùla David uya Katù wotokoyi kupùppù màlà tùwemattok yau, molopai nen uchi iwelikùppù, molopai iwu'nattàppù màlà itamo yamùk piyau, itesak ukkàtappù màlà. 37Tùse mùkkàlà Katù nùwuluukappù weli'nàtok yapai, ukàtappù pen.
38-39Utonpa yamùk ittutàk kon pùsàlà Jesus yai usentuppantok àli kuttok pàk usekamappù àpàkù'nokon, iwinà ànù'là ailon tawon ipàk wemokkasak màlà tamù'nawolon àli kuttok yapai, Law Moses winàpaino winà ikasa ewenatok pùla iwechi màlà. 40Tùttuseichi ettàk kon, Katù Maimu yenpoikannan uya wa teppù lùppù wekkupù ewinàkàik nokon tukaik.
41‘Yentàk kon! Mottùnpan nan! Esenumenkatàk kon molopai amattatàk kon! Masapùla sàlà wotoko tùkussai'nùk eweyu kon yattai, wechi màlà ailon tetok auya'nokon ipàk woton pe pùla, ànù'là wechi yekamaiche àpàkù'nokon tùse!’ ” tukaik.
42Paul molopai Barnabas tawonnan uya Jew yamùk wepilittok itak nàmà tùse, kappon yamùk uya tok kà'mappù tok wennapo toppe, ewanawolok Jew yamùk Wàlàkkattok weyu yattai, tok uya màlà yentak lùiwa sàlà yamùk yekama toppe tùpàkù'nokon 43Kappon yamùk uya iwepilichak kon nàmà tùpo, Paul molopai Barnabas wenaimappù màlà, Jew yamùk, molopai Gentile yamùk Jew yamùk usenupatok winàkàik iwelattàsak kon uya. Màlàyau tok uya tok yelupappù molopai tok meluntàpappù Katù wettok wakù pe yau tùwemassan pe tok wettoppe.
44Ewanawolok Jew yamùk Wàlàkkattok weyu yattai tamù'nawàlà lùiwa lànen, màlà pata yawon kon uyàpùppù màlà Itepulu Maimu yetase. 45Tukkan kon kappon yamùk yensak tùuya'nokon yau, Jew yamùk yepulu yamùk kùlùmàluppù. Tok usàulàmappù Paul nekama winàkàik molopai tok uya imottùnpappù. 46Tùse Paul molopai Barnabas uselupappù màlà yentak meluntà pe tùusenalippaik pùla. “Iche kulu we'nàtoppe iwechippù màlà Katù Maimu usekama àpàkù'nokon wapiya. Tùse inulunpasak auya'nokon pàk, molopai tàwàlàlà wema'nàtok yeponnan yeppe ewekkupù kon pùla iwechi pàk, ina uya ànàmà kon sàlà, molopai ina utà sàlà Jew yamùk pen piyak. 47Masapùla sàlà màlà Katù uya ina pàk.
‘Àkussak kon uya man Jew yamùk pen weyu pe, tamù'nawolon kon sàlà non pon kon wepùikattàtok nepù kon pa,’ ” teppù.
48Yetasak tùuya'nokon yau, Jew yamùk pen utauchinpappù màlà molopai Itepulu maimu yapulàppù tok uya; mùkyamlo tàwàlàlà wema'nàtok ponaloppe yanùnsak kon wenappù màlà ailon tawonnan pe.
49Katù Maimu utalenkappù màlà tamù'nawàlà pata yawàlà. 50Tùse Jew yamùk uya, kàyik yamùk pata yennàinan molopai tùnamasan nossan yamùk Jew yamùk pen, Katù namannan yaimelunpappù. Tok uya talumattàntok piyattàppù Paul molopai Barnabas tawonnan winàkàik molopai tok yenu'mappù tok uya tùpata kon yapai. 51Màlàpàk tok uya non tu'meppù tùtta kon poi tok yekamappo pe tok winàkàik molopai tok utàppù Iconium pona. 52Ailon tawonnan Antioch pon kon wanùssak wechippù màlà utauchinpantok ke molopai Wakù Akkwalù ke.
