Galatians 1

_1-2Sàlà màlà Paul molopai tamù'nawolon kon kùtonpa kon yamùk ailon tawonnan winàpaino. Paul teunossen, yeunottok uyàpùppù màlà kappon winàpai wapùla kappon winà pùla. Tùse Jesus Christ molopai Katù kùkàipùnù kon winàpai, mùkkàlà iwelichak yau iwuluukanàippù.

₃Tàwà Katù kùkàipùnù molopai Itepulu Jesus Christ elepai'nokon wakù pe we'nàtok molopai echitonpa pe we'nàtok ke.

₄Christ wettùlùppù màlà tùmàlà pe kùmakuyi kon ponaloppe kùpùikattàtoppe tùuya sàlà italumayippù pata weyu winàpai, kùkatùyi kon molopai kùkàipùnù kon wettok iche yawàlà. ₅Tàwà Katù piyau apulàntok nechii tàwàlàlà molopai tàwàlàlà! Emen.

₆Uyenumenkasak kulu auya'nokon man! Masapùla tachin pe pùla mùkkàlà Christ wettok wakù pe winà àkà'manàippù'nokon nonka auya'nokon pàk, molopai ewelattà kon pàk tùulon itekale pàkàlà. ₇Itekale pen kulu màlà. Tùse tùulon kon kappon yamùk utaimelunpantok yak àtùyatàu molopai Christ yekale mùyakanmaiche tok man. ₈Tùse ina là, wapùla epùn poino là inchelù uya itekale yekama tùpatalà, ina nekamappù àpàkù'nokon kasa pùla yau tàwà ipa'nùssak pe nechii tàwàlàlà. ₉Wapiya ina uya wa teppù molopai sàlà pe tu'ma wa ukayaik. Ànù'là uya tùpatalon itekale ananùmùppù kon walai pen yekama yau, tàwà ipa'nùssak pe nechii tàwàlàlà.

₁₀Kappon yamùk yapulàtok nepùiche na' wessan, wapùla Katù? Wapùla kappon yamùk yauchinpaiche na' wessan? Kappon yamùk yauchinpaiche lùppù wechi yau, Christ yapyoto pe wechi pen màlà.

₁₁Ittu auya'nokon iche wessaik utonpa yamùk, Wakù Itekale tekamatainùk àpàkù'nokon màlà kappon nùkonekappù pen. ₁₂Ànù'là kappon winàpai yepolo uya pùn, wapùla ànù'là uya ipàk uyenupa pùn. Tùse, Jesus Christ uya yenpoikasak yanùmùppù uya.

₁₃Wapiya yà'là kasa là wemapùppù yetappù auya'nokon man Jew yamùk uya enupantok yawàlà wechi yau, tùusentuppaik pùla Katù sochiyi talumattàppù uya molopai imattanùpùiche wechippù. ₁₄Jew yamùk uya enupantok yawàlà wechippù tukkan kon uwalainon yentai. Ina tamo yamùk yeselu lùppù kupùppù uya eke pe.

₁₅Tùse Katù uya, wakù pe tùwettok yau, uyanùmùppù màlà wentu wapiya, molopai iitauchinpasak wechippù ₁₆Tùmu yenpoika pàk uyau, tekale yekama toppe uya Jew yamùk pen pàk, ànù'là yekamapposak uya pùla man sàlà pàk. ₁₇Wapùla utà pùn Jerusalem pona mùkyamlo yeunossak kon uwapiya yense. Tùse utàppù asse'ne Arabia pona, molopai nen uchi wennappoppù Damascus pona. ₁₈Àsolùwau kilichimochi tùpo utàppù màlà Jerusalem pona, Cephas, Peter tukaik tesassen pokonpe essepose, molopai uko'mamùppù ipyau 15 pe wei. ₁₉Tùulon kon yeunossak kon yene uya pùn tùse James neken, Itepulu yakon.

₂₀Sàlà tùmenukayai'nùk màlà ailon. Katù yemloto po kasei pe wechi pen màlà.

₂₁Màlà tùpo utàppù Syria molopai Cilicia pona. ₂₂Christ yawon kon sochi yamùk tawon kon Judea pon uya uyittu pùla iwechippù. ₂₃Tok uya neken yekama yetappù, “Kàyik kùtalumattànàippù'nokon nen uchi ailon tetok itekale yekamayan, màlà imattanùpùiche tùwechippù lùppù!” tukaik. ₂₄Màlàpàk tok uya Katù yapulàppù upàkànsau.