Hebrews 12

₁Tukkan kon pùsamlo ennài nan kùwoi'nokon man. Màlàpàk tamù'nawolon kùwakkà'nài'nokon yenu'mapai'nokon. Màlà makui kùyachiyatài'nùk nàlà, molopai aitun pe utànpai'nokon pàlikantok pokonpe wapplùnnàtok kùyemloto kon po nai'nùk yak. ₂Jesus yenpai'nokon man. Mùkkàlà ailon tetok kùuya'nokon piyattànàippù molopai ikasa kulu iku'nài mùkkàlà. Masapùla mùkkàlà uya tùutauchinpatok yepolo tùuya ite'mappùtak ittu tùuya pàk, tùwelittok pàlikappù pulusuk pàk, wekuli'mantok pàk iichenumenka pùla. Molopai sàlà pe nen uchi chichiupe man Katù laitanù winà yapon piyau.

₃Masa esenumenkatàk kon ipàk, yà'là kasa là tewanma'làtok imakuyippù ton kappon yamùk uya pàlikappù ya! Màlàpàk uchi attu'mùla kenatàu molopai ke'nonkatàu. ₄Masapùla ewepanta'makon àli kuttok winàkàik yau àmùnù kon ikkwamù auya'nokon tepose ewepanta'ma kon pùn. ₅Molopai emeluntàpatok kon Katù uya tùmu yamùk pe eyesattok kon puttàka'nùssak auya'nokon man, “Umu itepulu uya atalumattàtok yannùnkà molopai attu'mùla kenai àyàulàma ya yau. ₆Masapùla Itepulu wechi màlà tù'nùn pe tùwessan talumattànài pe molopai tamù'nawàlà tùmu kasa tùnanùmù ton ippo'nài mùkkàlà,” tawon. ₇Atalumattàtok kon ipàlikatàk kon eyekamappotok kon kasa, màlà kasa Katù uya màlà tùmu kasa àkupù kon. Mule ken na' molo nai ikàipùnù nùtalumattà pen kulu? ₈Atalumattàsak kon tamù'nawolon kon imunkà yamùk pokonpe pùla iwechi yau, imunkà pe pùla ewechi kon màlà. Tùse yapàka yamùk pe làkku. ₉Kappon, kùkàipùnù kon yamùk mùkyamlo kùtalumattànnan molopai tok nama kùuya'nokon màlà. Màlà yentai nen uchi kùkàipùnù kon Katù yo'no we'nà nokon nechiik, mùkkàlà kùyakwalù kon Kàipùnù yo'no molopai wema'nàtok kon pe. ₁₀Kappon, kùkàipùnù kon yamùk wechippù kùtalumattànnan pe tachin pe kulu pùla, wakù pe iwechi pe ittu tùuya'nokon yawàlà. Tùse Katù uya màlà talumattàn wakù pe we'nàtok kon pe, wakù pe esuken tùwettok pùkkù pe we'nàtoppe. ₁₁I'nai yekkwa là talumattàntok màlà, yattai auchinpanài pen tùse wankono'manài. Tùse ite'mappùtak wakù ne'nài pe iwechi màlà. Ànù'là yenupasak lùppù màlà yekkwa yau uya màlà, màlà yepeppù, ikasa wema'nàtok molopai echitonpa pe we'nàtok yepolo.

₁₂Màlàpàk uchi solin pe attu'mùla nai'nùk eyemyatù kon, molopai attu'mùn eyese'mu kon imeluntàtanùttàkkon! ₁₃Itàtàk kon tossalon asanta tawà, molopai mùkyamlo sesen pan kon wena tu'ma toppe meluntà pe molopai tok uchipittà toppe.

₁₄Ànùttu kon ikuttàk echitonpa pe ewemapùkonpa tamù'nawolon kon kappon yamùk pokonpe, molopai wakù pe esuken wema'nàtok iche ettàk kon, masapùla ànù'là wakù pe esuken wema'nàtok yawolonnà pen uya Itepulu yene pen màlà. ₁₅Elannek peichi ettàk kon wakù pe Katù wettok winàpai ànù'là wennappo tukaik. Elannek pe ettàk kon wanittàpan wotton molopai tukkan kon yoi'ma woton maippanài watta tukaik. ₁₆Elannek pe ettàk kon ànù'là uya àli kupù tesak ke tukaik wapùla ànù'là wechi Katù pùn kasa tukaik. Esau kasa, mùkkàlà tùpatassek wapiya iwentusappe tùwechi nepolo chilanmanàippù, tewin itekkwa tùnassen kùyali yepeppe. ₁₇Màlà ye'mappùtak ku, tùkàipùnù uya pùlemantok enepopai tùponaloppe iwechippù tùse inulunpappù. Tùnkupùppù mùyakanmatok tùuya yawà yepolo ya pùla iwechippù, tenu palu ke kulu lànen iwaya tùse.

₁₈Sinai Tùpù walai pata, tappàssen pe molopai apok ke nùyassai'nùk walai motak àuyàssak kon pùla man. Ewalupà pe kulu molopai assetun pe tùwessen walai motak. ₁₉Molopai nàlà talipanài paaka letù lùppù walai tàwùppù eke pe, molopai mayin itekale pokon pan wechippù àsà pe kulu yattaino walai motak. Màlà yekkwa yattai Katù pawanattàppù kappon yamùk uya telupa kon ya enetatu'mapai pùla tùwechi kon pàk. ₂₀Masapùla, “Kamo uya là wùk yappàssak yau, tàk ke iwànà màlà telikkase,” tawon mayin ànpàlikapai pùla tok wechippù. ₂₁Màlà tok nene wechippù kulu màlà àsà pe, màlàyau Moses uya, “Wàpplànài'nùnyaik usenalippa ke!” teppù.

₂₂Tùse làkku, àuyàssak kon man Wùk Zion piyak tùwemassen Katù patassek pona, epùn yawon Jerusalem pona. Tukkan kon inchelù yamùk tùutauchinpaik tùwepilichan piyak àuyàssak kon màlà nai'nùk. ₂₃Molopai sochi, wapiya iwentusak lùppù Christ ponalok iwepilichak kon, pùn yau itesek imenukasak kon piyak. Katù piyak àuyàssak kon, tamù'nawolon kon Ittunài piyak, molopai wakù ton iwalai non kappon yamùk yakkwalù konekasak esuken piyak. ₂₄Jesus piyak àuyàssak kon man, emennak ikupù pàk tùwekkuttok ku'nài piyak. Molopai mùn yappasa'masak, wakù peiwa nùselupayai'nùk Abel mùnù yentai piyak.

₂₅Elannek pe ettàk kon, mùkkàlà nùselupayai'nùk nulunpa auya'nokon tukaik. Mùkyamlo telupatok kon yetannan nùssan pen wepe pùla iwessak non po tùse, yà'là kasa ken kùmàlà wechi màlà ma'le pe mùttuyatau, mùkkàlà kùyelupanài'nokon epùn winàpaino winàpai welattànsak nokon yau? ₂₆Màlà yattai imaimu uya non yattù'mappù màlà. Tùse sàlà pe suwa wechi tetok tùuya yau, “Tewin itekkwalok pe non neken pen nen uchi yattù'ma uya màlà tùse kak nàlà,” teppù ya. ₂₇Màlà “tewin itekkwalok” tetok uya yekama màlà tùutamasan yattù'ma pàk, màlà yamùk ikonekasak kon. Molopai tùutattù'masen pen wà'nàntoppe molo teya.

₂₈Màlàpàk uchi tenki tepai'nokon Katù pàk, masapùla tùutattù'masen pen Katù wettok itepulu pe yepolo'nokon pàk. Màlà yai Katù yapulàpai'nokon man iche iwettok yawàlà, namantok pokonpe molopai usenalipantok pokonpe. ₂₉Masapùla kùkatùyi kon kulu mùkkàlà mattanù'nài apok.