John 19

₁Pilate uya Jesus yalàppù molopai ippoppàttoppe ikupùppù màlà. ₂Sousa yamùk uya àmà'nà kapùppù alok pe molopai tok uya itùlùppù ippai pona. Molopai tok uya ipontàppù tùtalilen pon yak. ₃Molopai tok uyàpùppù ipyak, “Tachin pe emakkà Jew yamùk Kinù!” tei'ma. Molopai tok uya inta'moppù temyatù kon ke.

₄Pilate wepakkatu'mappù, “Yentàk kon, inepù uya sàlà apyakù'nokon, italumattàtok uya iwenai woton yeposak uya pùla iwechi ittu kon pa,” teppù ya tok pàk. ₅Jesus wepakkasak àmà'nà kassak yalùko pe, molopai tùtalilen pon yau yattai, Pilate uya, “Pùsàlàichi mùkkàlà kàyik!” teppù tok pàk. ₆Màlàyau paatele yamùk yepulu ton molopai achinnan uya Jesus yensak yau, tok wentaimeppù, “Ipukapàkkà pulusuk pona! Ipukapàkkà pulusuk pona!” tukaik. Màlàyau Pilate uya tok pàk, “Yatàk kon ipukapàsse, masapùla italumattàtok uya iwenai woton yeposak uya pùla man,” teppù. ₇Jew yamùk uya Pilate maimu yeikuppù, “Ina law molo man, màlà yau iwelikù màlà tesak ya man, masapùla Katù Mumu pe tukaik iwekkupù pàk,” teppù.

₈Sàlà yetasak tùuya yau, Pilate wettalipappù màlà yentak. ₉Màlàyau iwewontukkappù, molopai Jesus pàk, “I'nai motapai àuyàssak màlà?” teppù ya, tùse Jesus uya imaimu yeikuppù pen. ₁₀Màlàyau Pilate uya ipàk, “Uyelupapai pùla na' messan? Ittu na' auya pùla nai, ànonkatok uya wapùla àtùtok uya ewelittok yak yapàikketù yesappe wechi?” teppù. ₁₁Jesus uya imaimu yeikuppù, “Ayapàikketù pùla iwechi màlà uyepoi kau pai eyemyak itùsak pùla iwechi yau. Mùkkàlà utùnàippù apyak ittu màlà àli pe eke makui inkuppù pàk,” tukaik. ₁₂Màlà yetasak tùuya yau, Pilate wechippù ànnonkapai. Tùse Jew yamùk wentaimeppù, “Pùsàlà kàyik nonkasak auya yau, Caesar wechiyakon pe ewechi pen màlà. Ànù'là tùyiwalà kin pe tùwekkussen wechi màlà Caesar yeyaton pe!” tukaik. ₁₃Màlà yetasak tùuya yau Pilate uya Jesus nepùppù polopona, molopai iweleutappù ittunài yapon pona, pata Tàk Kassak tukaik tùttusen yau. (Hebrew maimu yau Gabbatha itesek.)

₁₄Inakattapailà'ne là wei wechippù Usentaka'nàppà pàk Uta'lettàntok wapiya. Pilate uya Jew yamùk pàk, “Yentàk kon, pùsàlà ichi ekinù kon,” teppù. ₁₅Tok wentaimeppù, “Yakà! Yakà! Pulusuk pona ipukapàtta!” tukaik. “Iulà uyaichi ekinù kon pukapàtù?” tukaik Pilate uya tok yekamappoppù. Eke kulu paatele yamùk yepulu ton uya imaimu yeikuppù, “Caesar neken nen mùkkàlà ina kinù!” tukaik. ₁₆Màlàyau Pilate uya Jesus tùlùpù tok yemyak, ipukapàttoppe pulusuk pona.

Màlàyau sousa yamùk uya Jesus yalàppù. ₁₇Jesus utàppù tùpulusukù yalàppù ya tùyiwalà, Puppà Yàppù lùppù Patassek yak. (Hebrew maimu yau “Golgotha” itesek.) ₁₈Molo tok uya ipukapàtùppù pulusuk pona. Asa'lon kon nàlà kàyik yamùk pukapàtùppù tok uya ipokonpe, sàwinà'ne molopai Jesus wechippù tok yakkletau. ₁₉Pilate uya, “Jesus Nazareth pon, Jew yamùk Kinù,” tukaik imenukasak lùppù tùlùppù pulusuk pona. ₂₀Sàlà inmenukappù yeneppù màlà tukkan kon Jew yamùk uya, masapùla Jesus pukapàtù patassek wechippù màlà mei pùla Jerusalem poi. Imenukasak wechippù Hebrew maimu yau, Rome pon kon maimu yau, molopai Greek maimu yau. ₂₁Màlàyau paatele yamùk yepulu ton uya Pilate pàk, ‘Jew yamùk Kinù,’ tukaik kù'menukai tùse ‘Pùsàlà mùkkàlà kàyik Jew yamùk kinù Iulà tawon,’ tukaik làkku,” teppù. ₂₂Pilate uya tok yeikuppù, “Yà'là tukaik là unmenukappù màlà, unmenukappù,” tukaik.

₂₃Màlàyau Jesus pukapàtù tùpo, sousa yamùk uya ipon yalàppù molopai tok uya ipantakapàtùppù tewinpàk tùkaichalà'nokon, asakùlà'nan kon uya. Molopai ipon yassan nùppù wà'nàmàppù. Sàlà wechippù màlà ichippànsak pe pùla, ikassak pe i'mù motapai iteppi motak. ₂₄Sousa yamùk uya, “Ikalapàtù pen sàlà, tùse tàk walai lùkkwà tenu'mapàsse wenkalunàpai ànù'là uya ipon yassan nùppù yepolo yentoppe,” teppù. Sàlà wekkupùppù màlà Katù Maimu yau iwe'menukasak kasa iwettoppe. “Tok uya upon pantakapàtùppù tùkklottau'nokon, molopai upon yassan nùppù yepolo ànù'là uya yentoppe tùuya'nokon tàk walai lùkkwà tenu'mapàsse tok wenkaluppù,” tawon. Sàlà yamùk kupùppù màlà sousa yamùk uya.

₂₅Molo Jesus pukapàttok ipona pulusuk piyau satippe ichan wechippù, molopai ichan yakon, Mary Clopas noppù, molopai Mary Magdalene. ₂₆Tùsan yensak tùuya molo yau molopai tùnenupappù tù'nùn pe kulu tùnkupù wechi satippe mei pùla yau, Jesus uya tùsan pàk, “Nossan, pùsà yenkà emle,” teppù. ₂₇Molopai tùnenupappù pàk, “Pùsà yenkà, asan,” teppù ya. Màlà motapai inenupappù uya ichan nùppù yalàppù tùwùk tak.

₂₈Sàlà tùpo Jesus uya tamù'nawolon wenukassak ittuppù màlà. Katù Maimu yau iwe'menukasak lùppù kasa iwekkuttoppe, “We'nakklipayaik,” teppù ya. ₂₉Molo pùsau yau so'li tinchisen wechippù màlà. Màlàyau tok uya kàtàkkwak walai kipùppù ikak, kusan kulak walai pàk tok uya itùlùppù molopai yenkappù tok uya Jesus yepi motak. ₃₀Malalà yonpa tùpo Jesus uya, “Eichilà nenukappàssan,” teppù. Molopai tùppai peimappù ya molopai iwelikùppù.

₃₁Eke, Wàlàkka'nàtok weyu ponaloppe wekonekatok yattai pe iwechi pàk, mùkyamlo kàyik yamùk yàkàpù wechi pulusuk pàk lùppù iche pùla Jew yamùk wechippù. Màlàpàk tok uya Pilate yekamappoppù, “Tàwà ka tok pichi yamùk yakitukka lù molopai tok yàkàpù yamùk nuttàpàtù?” tukaik. ₃₂Màlàyau sousa yamùk utàppù molopai tok uya wapiyalok kàyik pichi yamùk yakitukkappù molopai tùulon pichi yamùk tu'ma. Pùsamlo kàyik yamùk kaiwattàsak wechippù màlà pulusuk pàk Jesus piyau. ₃₃Tùse Jesus piyak tùuyàssak kon yau, iwelikkassak yepoloppù tok uya, màlàpàk ichi yamùk yakitukkappù tok uya pen. ₃₄Tùse tewinan nà sousa yamùk tonpa uya Jesus yassokkappù iwolo yai tùpple ke molopai màlà yai mùn, tuna tawon wekkwamùppù. ₃₅Mùkkàlà màlà yennàippù uya yekamappù molopai màlà ichelupatok lùppù wechi màlà ailon pe. Ailon pe yekama tùuya ittuppù ya màlà, molopai yekamappù ya màlà ailon te kon pa. ₃₆Sàlà yamùk wekkupùppù màlà Katù Maimu yau iwe'menukasak kasa iwettoppe. “Tewin nà yàppù ikkwàtù pen màlà,” tawon. ₃₇Molopai tu'ma Katù Maimu yau man, “Tok uya màlà yene mùkkàlà tùnassokkappù kon,” tawon.

₃₈Sàlà tùpo Joseph Arimathea pon uya Jesus yàkàpù yekamappoppù Pilate pàk. Pùsàlà Joseph wechippù màlà Jesus nenupa pe, tùse amak yai masapùla Jew yamùk yepulu yamùk pàk tùusenalippa pàk. Pilate uya, “Ewaik,” teppù, màlàyau iyàpùppù molopai Jesus yàkàpù yalàppù ya. ₃₉Nicodemus nàlà, wapiya ewalupàttau Jesus kakklanpanàippù lùppù utàppù màlà Joseph ya'là. Eke pe kulu myrrh yoi'masak aloe ke 75 pounds yailà'ne, yalàppù ya màlà. ₄₀Màlàyau tok uya Jesus yàkàpù yalàppù, molopai tok uya iwontàppù linen pùkkùlùppù ke myrrh molopai aloe pokonpe, Jew yamùk we'wu'nattàtok yeselu yawàlà. ₄₁Ipukapàtùppù pulusuk pona patassek lùppù yau molo umà wechippù. Molopai umà yau emennak uluwaik ànù'là yàkàpù nonkappù yak lùppù pen wechippù. ₄₂Màlàpàk Jew yamùk wàlàkkattok weyu wapiya iwechi pàk, molopai mei pùla molo uluwaik wechi pàk, màlà yak tok uya Jesus yàkàpù tùlùppù.