Luke 2

₁Màlà yattai Ceasar Augustus uya tùmaimu yeunokoppù màlà tamù'nawolon kon uya tesek kon menuka toppe. ₂Wapiyalok esek yamùk menukatok wekkupùppù màlà Quirinius itesek, wechi itepulu pe Syria po yattai. ₃Tamù'nawolon kon utàppù màlà tesek kon menukase tùpatassek kon yak.

₄Joseph utàppù màlà Nazareth, Galilee pon poi Judea pona, pata Bethlehem pona, Kin David pata lùppù yak. Joseph utàppù màlà masapùla David pa pe tùwechi pàk. ₅Iitàppù màlà tesek menukase Mary pokonpe, imali'ma ya màlà teppù lùppù pokonpe, molopai monok pe iwechippù màlà. ₆Molo Bethlehem po tok wechi tùse, Mary wentutok yattai pe iwechippù. ₇Màlàyau wapiyalok walawok tùmle ke iwentuppù paka yamùk yùwùk tau, masapùla patassek pùla iwechi pàk. Molopai iwontappù ya pon pùkkùlùppù ke. Inonkappù ya paka yamùk yeipa yen yak.

₈Molo kalinilu yamùk mainanpan nan tonpa yamùk wechippù màlà sàlà pata pùkkù yau, tùwe'nùnse pùla kalinilu yamùk yene pàk tùwessan ewalupàttau. ₉Itepulu inchelùyi, usenpoikappù màlà tok piyak molopai Itepulu yakkwayi ulenpamùppù tok woi. Tok wettalipappù màlà. ₁₀Tùse inchelù uya tok pàk, “Kettalipatàu! Masapùla wakù Itekale nessak uya sàlà àponalok kon pe. Eke pe utauchinpantok nepù woton tamù'nawolon kon kappon yamùk piyak. ₁₁Sàlà yewalupàyi tau David pata po Eyepulu kon wentusak man, Christ itesek, Itepulu mùkkàlà! ₁₂Sàlà uya yekama màlà àpàkù'nokon. Mule yepolo auya'nokon màlà iwontàsak pon pùkkùlùppù ke molopai aitou pe paka yamùk yeipa yen yau,” teppù.

₁₃Asse'ne tewinanpa tukkan kon inchelù yamùk usenpoikappù màlà pùsàlà inchelù piyak tùuselenpai'ma'nokon Katù yapulà pe. ₁₄“Katù epùn pon, yapulà pai! Molopai kappon yamùk uyauchinpan nan non pon kon ponaloppe wàlàkka'nàtok nechii!” tukaik.

₁₅Inchelù yamùk wennapoppù epùn pona patappù yau, kalinilu yamùk mainanpan nan uya, “Utànpai'nokon Bethlehem pona, sàlà iwekkussak lùppù Itepulu nekamapàssai'nùk yense,” teppù. ₁₆Màlàyau tùusemittàpaik tok utàppù. Tok uya Mary molopai Joseph tawonnan yepoloppù. Mule nàlà yeneppù tok uya aitou pe paka yamùk yeipa yen yau. ₁₇Yensak tùuya'nokon yau, kalinilu yamùk mainanpan nan uya, mule yekale inchelù nekamappù tùpàkù'nokon yekamappù tamù'nawolon kon pàk. ₁₈Molopai mùkyamlo yetan nan nùssan usenumenkappù kulu màlà tok nekamappù pàk. ₁₉Tùse Mary uya sàlà yamùk kupùppù tewan yau, molopai ichenumenkappù kulu ipàk eke pe. ₂₀Kalinilu yamùk mainanpan nan wennapoppù màlà Katù yapulà pe eke pe, tamù'nawolon tùnetappù kon molopai tùnenepù kon pàk. Inchelù uya yekamappù kasa kulu iwechippù màlà.

₂₁8 pe wei tùpo, Jew yamùk usattàtok yattai iwechi yau, yesettàppù màlà Jesus tukaik, esek inchelù uya ilepappù lùppù monok pe Mary wena wapiya lùppù ke.

₂₂Joseph molopai Mary tawonnan wekolùkatok yattai uyàpùppù, Law Moses winàpaino yawàlà. Màlàpàk tok uya mule yalàppù màlà Jerusalem pona Itepulu Katù yemyak itùse. ₂₃Sàlàichi màlà iwe'menukasak lùppù, Itepulu winàpaino Law yau. “Tamù'nawàlà wapiyalok pe iwentusak lùppù walawok tùlù màlà Itepulu yemyak,” tawon. {EXO 32.2} ₂₄Tok utàppù nàlà màlà tùntùlù kon tùse, Itepulu winàpaino Law yawàlà, “Asa'là wakokkwa wapùla là asa'là weluchi walai non, ” tawonnan.

₂₅Màlà yattai molo kàyik wechippù tùwemassen Jerusalem po, Simeon itesek. Mùkkàlà wechippù màlà wakù pe molopai Katù namanài pe, molopai Israel wepùikattà màmuku pàk iwechippù. Wakù Akkwalù wechippù màlà ipyau. ₂₆Màlàyau ipàk, “Ewelikù pen màlà yeunoko tùuya tetok Itepulu uya, Christ, yene auya ponalà,” teppù ya. _27-28Wakù Akkwalù uya Simeon yalàppù Katù Yùwùk tak. Mule Jesus nessak ichan yamùk uya Katù Yùwùk tak, Law wettok ikupù iche kusse yau. Simeon uya mule yekkwatùppù tenak, molopai tenki teppù ya Katù pàk. ₂₉“Uyepulu, ‘Ikupù uya,’ teppù lùppù auya, kussak auya man, molopai tàwàichi ayapyoto nùtài wàlàkka'nàtok yau. _30-31Masapùla uyenu ke wepùikattàntok ewinàpaino tenpàssaik, pùsàlà ànkonekappù tamù'nawolon kon yemloto po. ₃₂Eye'ma yekamatok auya Jew yamùk pen pàk weyu. Molopai àponalok kon Israel yamùk pona apulàntok ne'nài,” teppù ya.

₃₃Mule kàipùnù molopai ichan tawonnan usenumenkappù kulu màlà Simeon uselupappù ipàk lùppù pàk. ₃₄Simeon uya tok pùlemappù, molopai ichan, Mary pàk. “Pùsàlà mule yanùnsak Katù uya màlà, tukkan kon Israel pon kon wettalumattà toppe, tùulon kon wepùikattà toppe, molopai yentok ipàkàlà pe iwinàkàik usàulàman toppe. ₃₅Molopai màlà pàkàlà tok usenumenkatok tewan kon yau, yenpoika ya màlà. Molopai usewankono'mantok yàkek kasupala walai uya eyewan yassokka màlà,” teppù ya.

₃₆Molo nossan, Katù Maimu yenpoikanài wechippù màlà Anna itesek, Phanuel yenchi, Asher kok. Kokko pe kulu iwechippù màlà, tùtayappù ke iwechippù màlà 7 pe neken kilichimochi. ₃₇Tùtayappù welikù tùpo iiko'mamùppù tachin pe, 84 pe ikilichimochiyi wechippù. Katù yùwùk nàmàppù ya pen, wei kaichalà, ewalupàttawà, tùwàpùlema pàk iwechippù tùuta'lettàik pùla. ₃₈Màlà yattai làmà iwelepamùppù màlà, tenki teppù ya Katù pàk, molopai iichelupappù mule pàk Jerusalem wemokkatok màmuku pàk tùwessan yelupappù ya.

₃₉Tamù'nawolon Itepulu winàpaino Law wettok ikupù iche yenuka'nùssak tùuya'nokon yau, tok wennapoppù Galilee pon, tùpata kon Nazareth pona. ₄₀Mule usemokkappù, meluntà pe iwenappù. Pukkek pe tùwettok ke iwanùssak wechippù, molopai Katù uya ipùlemappù eke pe.

₄₁Kilichimochi kaichalà Jesus yan yamùk utàpàtùppù màlà Jerusalem pona Entaka'nàppà yattai Uta'lettàntok yense. ₄₂12 pe ikilimochiyi Jesus wechi yattai tok utàppù uta'lettàntok yense tùwessek kon kasa. ₄₃Uta'lettàntok weyu wenukassak yau tok wemeiku tùse Jesus wà'nàmàppù Jerusalem po. Ichan yamùk uya iwà'nàmàppù ittuppù pen màlà. ₄₄Tukkan kon kappon yamùk kùlottau iwechi pe tok uya yekamappù. Màlàpàk tok utàppù tewin wei ipla, màlà tùpo nen uchi tok iwappù, tùtonpa kon yamùk molopai tùwechi yakon non kùlottau. ₄₅Tok uya yepolo pùla iwechippù. Màlàpàk tok wennapoppù màlà iwase Jerusalem pona. ₄₆Icholùwano wei yattai tok uya Jesus yepoloppù Katù Yùwùk tau, chichiu pe enupannan pokonpe, tok yeta pàk molopai tok yekamappopàtù pàk. ₄₇Tamù'nawolon kon yetan nan usenumenkappù kulu màlà ittu ya molopai ikasa mayin yeippàtù ya pàk. ₄₈Ichan yamùk usenumenkappù màlà yensak tùuya'nokon yau. Màlàyau ichan uya, “Umle, yà'là peichi iwechi pàk sàlà mùkupùi ina winàkaik? Àkàipùnù molopai Iulà sa'ne tawonnan nen mà nùtaimelunpatai eyiwa pàk tà,” teppù ipàk. ₄₉Tok maimu yeikuppù ya, “Yà'là pe ken iwechi pàk kùyiwayatàu? Ukàipùnù yùwùk tau ken na' wettok ittu auya'nokon pùla nai?” tukaik. ₅₀Tùse tok uya watesak ya lùppù tùpàkù'nokon ittu pùla iwechippù.

₅₁Màlàyau Jesus wennapoppù tok ya'là Nazareth pona. Màlà motau tok maimu yawàlà iwechippù. Ichan uya tamù'nawàlà sàlà yamùk kupùppù tewan yau. ₅₂Màlàyau Jesus usemokappù pukkek pe, Katù yewan yailà iwechippù. molopai kappon yamùk yewan yailà nàlà.