Luke 5

₁Tewin wei yattai Jesus wechippù satippe tuna Genesaret yena po, kappon yamùk wepilipùppù mei pùla ipyak Katù Maimu yetase. ₂Asa'là kanau yamùk yeneppù ya tuna yena po. Molok yachin nan uya inànsak, tok utàppù tùpunwe kon kukase. ₃Jesus wenukuppù kanau yakon yak. Simon kanwa pe iwechippù, molopai Jesus uya yekamappoppù kanau chitokka toppe ya miyaiwa tuna kak. Jesus wechippù kanau yau molopai kappon yamùk yenupappù ya.

₄Tùuselupakapù tùpo, Simon pàk, “Kanau ichitokkakà miya lùiwa ikupai tuna kak, molopai àpunwe kon inonkatàk kon tuna kak molok yachi toppe ya,” teppù ya. ₅“Uyepulu, sa'man pe ina ne'wotokomai ewalupàttawà molopai ànù'là yachi ina uya pùn. Tùse wa te auya yau, punwe yamùk yeulanka uya sàlà,” tukaik Simon uya yeikuppù. ₆Tok uya punwe yamùk yenu'mappù tuna kak molopai tukke kulu molok yamùk yachippù tok uya màlà uya tok punweyi kalakappù. ₇Màlàpàk tok uya tùtonpa kon yamùk, tùulon kanau yawon kon kà'mappù tok uyàttoppe tùpùikattàse'nokon. Tok uyàpùppù molopai asakklàma kanau yamùk yanùkkappù tok uya tok useulankaiwappù nen uchi. ₈Iwekkussak lùppù yensak tùuya yau, Simon Peter wenappù tese'mu yok Jesus yemloto po molopai, “Itàkà uwinàpai Uyepulu, masapùla Iulà mùkkàlà àli umakuyi yawon!” teppù ya. ₉Mùkkàlà molopai tamù'nawolon kon itonpa yamùk usenumenkappù kulu màlà tukke molok yamùk yachisak tùuya'nokon pàk. ₁₀Mùkyamlo lùssan wechippù màlà Simon wechi yakon non pe, James molopai John tawonnan Zebedee munkà yamùk. Jesus uya Simon pàk, “Kettalipatàu! Sàlà motapai kappon yamùk yachi auya'nokon màlà,” teppù. ₁₁Tok uya kanau yamùk pàlàkappù tuna yena pona, molopai tamù'nawolon nàmàppù tok uya molopai Jesus ya'là tok utàppù.

₁₂Tewin wei yattai Jesus wechippù pata yau kàyik welei pokon wettok imotau motau. Jesus yensak tùuya yau, iwàpàppù tenpata yok Jesus yemloto po, molopai ipawanattàppù ya, “Uyepulu, uyipittàpai ewechi yau, uyipittà nen auya!” tukaik. ₁₃Jesus uya temyatù yenkappù molopai yapàtùppù ya, “Eyipittàpai wessaik, echipittàkà,” teppù ya. Màlà yattai kulu welei uchipittàppù. ₁₄Jesus uya wateppù ipàk, “Ànù'là pàk sàlà kùsekamai tùse itàkà tossalà paatele piyak eyentoppe ya. Molopai tùtùsen mùtùlùik Moses uya wa teppù kasa kappon yamùk pàk euchipittàsak yekama pe,” tukaik. ₁₅Tùse Jesus yekale usetappù mailà eke peiwa molopai ilinà pe kappon yamùk uyàpùppù yetase, molopai echipittàse tepalan kon winàpai. ₁₆Tùse iitàpàtùppù tùkkenan pata yak àpùlemase.

₁₇Tewin wei yattai Jesus wechi enupan pàk tùse, Pharisee yamùk molopai Law pàk enupan nan wechippù chichiu pe mei kulu pùla, tamù'nawolon pata Galilee molopai Judea tawon yailà pai iyàssak kon, molopai Jerusalem poi iyàssak kon. Wakù Akkwalù meluntàlù wechippù molo Jesus piyàu e'nek ton ipittà toppe ya. ₁₈Tùulon kon kàyik yamùk uyàpùppù molopai tok uya iitokassak kàyik nepùppù itekwek po, molopai tok wechippù yalàiche tapùi tak inonkase Jesus yemloto pona. ₁₉Tok uya tapùi tak yewonùppù pùla iwechippù màlà masapùla ilinà pe kappon yamùk wechi pàk. Màlàpàk tok uya yalàppù tapùi ipu pona. Tok uya yakkokappù molopai tok uya inuttàppù itekwek po tukkan kon yakle tak Jesus yemloto pona. ₂₀Eke pe ailon tetok tok uya wechi yensak tùuya yau, Jesus uya kàyik pàk, “ Àli kuttok auya pàk usentupansak man utonpa,” teppù. ₂₁Law pàk enupannan molopai Pharisee yamùk tawonnan wepyattàppù tùuselupa kon pàk tùyiwalà'nokon. “Ànùk ken pùsàlà kàyik Katù winàkàik nùselupayai'nùk sàlà kasa? Ànù'là tùusentupasen pùn àli kuttok pàk, tùse Katù neken!” tukaik. ₂₂Jesus uya tok usenumenkatok ittuppù màlà molopai tok pàk, “Yà'là pe iwechi pàk màlà kasa eusenumenka kon?” teppù ya. ₂₃“Sa'man pe ma'le na', ‘Àli kuttok auya pàk usentupansak man,’ te nai, wapùla ka', ‘À'mùssakkakà molopai asakà,’ te lù? ₂₄Yekama uya màlà àpàkù'nokon Kàyik Mumu wechi, sàlà non po àli kuttok pàk usentuppantok yapàikkettù yesappe,” teppù ya. Màlàpàk iitokkassak kappon pàk, “Tekamayaik àpàk, ‘E'wuluukakà, ekkwek yanùnkà molopai emeikkà,’ ” teppù. ₂₅Màlà yattai kàyik we'wuluukappù tok yemloto po, tekkwek yanùmùppù ya, iwemeikuppù Katù yapulà pe. ₂₆Tamù'nawàlà tok usenumenkasak kulu wechippù màlà! Tùusenalippa kon kùlottau là, tok uya Katù yapulàppù màlà, “Enumenkanài nan yene' nokon nechii sàlà pe!” tukaik.

₂₇Màlà tùpo, Jesus utàppù polo pona molopai kàyik Levi itesek yeneppù ya chichiupe tùwe'wotokomatok patassek yau. Levi wechippù màlà pùlayatta pili'nài pe. Jesus uya ipàk, “Uya'là, àikkà,” teppù. ₂₈Levi we'wuluukappù, tamù'nawolon nàmàppù ya, molopai Jesus ya'là iitàppù.

₂₉Màlàyau eke uta'lettàntok konekappù ya tùwùk tau Jesus ponaloppe, molopai tukke pùlayatta pili'nài nan wechippù màlà molo, molopai tùulon kon kappon yamùk wechippù màlà chichiupe ipokonpe. ₃₀Tùulon kon Pharisee yamùk molopai Law pàk enupannan yamùk usàulàmappù Jesus ya'lon kon pàk. “Yà'là pe iwechi pàk auta'lettà kon màlà pùlayatta pili'nài nan pokonpe molopai àli ton pokonpe?” tukaik. ₃₁Jesus uya tok maimu yeikuppù, “Kappon yamùk e'nek ton pen mùkyamlo ipittànài iche tùwessan pen, tùse e'nek ton neken,” tukaik. ₃₂“Wakù ton kappon yamùk kà'mase uyàssak pen sàlà, tok welattà toppe àli kuttok winàpai Katù winàkàik, tùse àli ton làkku,” tukaik.

₃₃Tok uya Jesus pàk, “John ya'lon kon mùkyamlo tùuta'lettàik pùla tùwessan echipalà molopai tùwàpùlemassan, molopai Pharisee yamùk ya'lon kon mùkyamlo màlà lùppù ku'nài nan, tùse aya'lon kon mùkyamlo tùuta'lettàsan molopai tinchisen inchinài nan,” teppù. ₃₄Jesus uya yeikuppù, “Tùwàwàsan yattai ken na' tok tonpa yamùk wechi tùuta'lettàik pùla tùwàwàsen umoine wechi molo tùpyau'nokon tùse pe mekamayatàu? Kane! ₃₅Tùse pata weyu uyàpù màlà tùwàwàsen umoine wemokkatok tok winàpai yattai. Màlàyau làichi tùuta'lettàik pùla tok wechi màlà,” tukaik.

₃₆Jesus uya nàlà sàlà panton yekamappù tok pàk. “Ànù'là mùkkàlà emennak pon pùkkùlùppù kalakanài pen ipoippà pon pachi'ma toppe tùuya. Màlà kupù tùuya yau, emennak pon kalakappù ya sàlà eppaino, emennak kuyalikku pùkkùlùppù wechi màlà ipoippà meluntàlù kaichalà pùla imeluntàlù. ₃₇Molopai ànù'là uya emennak tinchisen yemaika penalok tùwayi, kamo pippà konekasak yak pen màlà. Màlà kussak ya yau, emennak uya wai i'mo màlà, tinchisen wekkwamù nen uchi màlà, molopai wai umattasak wechi màlà. ₃₈Kane! emennak tinchisen yemaika nen màlà emennak wai yak. ₃₉Ànù'là mùkkàlà ikonekasen ichelok pen. Wapiya ikonekasak inchi tùpo. Penalok màlà wakù iwa,” te ya.