Matthew 23

₁Màlàyau Jesus uya tukkan kon kappon yamùk, molopai ta'lon kon yelupappù. ₂“Enupannan Law pàk, molopai Pharisee yamùk kussak màlà Moses Law yekamannan pe,” teppù ya. ₃“Màlàpàk uchi tamù'nawolon tok nekama maimu yawàlà mettàik molopai mùkuttàik. Tùse tok yeselu kùkkuttàu, masapùla tùnekama kon ku'nàinan pen mùkyamlo. ₄Eme'neppe yaplu konekannan mùkyamlo molopai kappon yamùk mùpona yaulonnàinan, tùse tewinnà elekkwà temyatù kon ke yanùmù pàk alikyeppe tok wechi pen màlà màlà yamùk yaplu yalà pàk. ₅Tamù'nawolon ku'nàinan mùkyamlo kappon yamùk uya neken yentoppe. Eke pe Katù Maimu yen konekannan mùkyamlo tepiyeppà kon pàk molopai temekun kon pàk, molopai kusan pe tùpon kon yeppi yùpùlù ku'nàinan!” teppù Jesus uya. ₆“Wakù kulu patassek iwakùli ton mùkyamlo uta'lettàn yattai, molopai wakù kulu aponnok iwakùli ton wepili'nàtok itak tau. ₇Makiti tau ‘Wakù pe na' messan?’ te namantok pokonpe iwakùli ton mùkyamlo, molopai ‘Ticha’ tukaik kappon yamùk uya tesatù kon iwakùli ton. ₈Eyesatù kon uchi kùsettak ‘Ticha’ tukaik masapùla tamù'nawàlà echitonpa ton amyamlo molopai tewinan neken Eyenupanài' nokon yesak. ₉Molopai ànù'là kùsesattàu ‘Ukàipùnù’ tukaik sàlà non po, masapùla tewinan neken epùn pon Ikàipùnù ton amyamlo. ₁₀Wapùla ‘Anài'’ pe eyesatù kon kùsettak, masapùla tewinan neken mùkkàlà ayanài'nokon Christ. ₁₁Eke pe kulu àklottau'nokon nai'nùk wechi màlà ayapyoto kon pe. ₁₂Molopai ànù'là eke pe tùwekkussen yàssà'mùntanùpù màlà, molopai ànù'là àssà'mùla tùwessen ma màlà eke pe,” tukaik.

₁₃“Àsà pe kulu iwechi màlà àpona'nokon, Law pàk enupannan molopai Pharisee yamùk! Tùusennakasan amyamlo! Kappon yamùk wakkà'nàinan, itepulu pe we'nàtok epùn po mùlatta takkose. Màlà yak amyamlo utà pen màlà molopai tùulon kon utàtoppe tok kupù auya'nokon pùla man. ₁₄“Àsà pe kulu iwechi màlà àpona'nokon Law pàk enupannan molopai Pharisee yamùk! Tùusennakasan amyamlo! Itayappù iwelichak kon yemamin molopai tok patassek mokkannan. Molopai nàlà kusan pe tùwàpùlemasan amyamlo, kappon yamùk uya neken yentoppe. Sàlà wenai atalumattàtok kon wechi màlà àsà peiwa.

₁₅“Àsà pe kulu iwechi màlà àpona'nokon Law pàk enupannan molopai Pharisee yamùk! Tùusennakasan amyamlo! Tuna po tùutàsan amyamlo molopai tamù'nawolon pata yawà, tewin kappon lattàse ewinàkài'nokon. Molopai ilattàsak auya'nokon yau asakitekkwa apok patasek yak tùutàsen yeppe ikussak auya'nokon màlà, akasa'nokon.

₁₆“Àsà pe iwechi màlà àpona'nokon, enpùla echii'ma anàinan! Enupannan amyamlo, ‘Ànù'là uya suwa wechi màlà tesak Katù yùwùk winà yau, yà'là pe iwechi pen màlà, tùse watesak ya kolù Katù yùwùk tawon winà yau, mùkkàlà yachisak màlà ikupù uya màlà teppù ya lùppù uya,’ tukaik,” teppù Jesus uya. ₁₇“Enpùnon pakkoton! I'nai ken uchi màlà eke lùiwa, kolù ka' lù, wapùla Katù yùwùk kolù ku'nài esuken? ₁₈Enupannan nàlà amyamlo, ‘Ànù'là uya suwa wechi màlà tesak itùsak lùppù pottà yapon Katù yùwùk tawon yesek winà yau, ikupù uya teppù tùuya kupù ya kulu pen màlà, tùse ànù'là uya wa wechi màlà tesak tùpottàsen màlà ipottà yapon pon yesek winà yau mùkkàlà ikupù uya teppù tùuya kupùik!’ tukaik. ₁₉Enpùla messatàik! I'nai ken uchi màlà tùnamasen, lepantok ka' lù, wapùla itùsak lùppù pottà yapon Katù yùwùk tawon, esuken lepantok ku'nài? ₂₀Màlàpàk uchi kappon uya wa nen wechi màlà te lepantok pottà yapon yesek winà yau, wa nen wechi te ya màlà lepantok yapon yesek winà, molopai tamù'nawolon ipon lepantok kon yesek winà. ₂₁Molopai kappon uya wa nen wechi màlà te Katù yùwùk yesek winà yau, wate ya màlà Katù yùwùk yesek winà, molopai mùkkàlà itau tùwemassen Katù yesek winà. ₂₂Molopai kappon uya suwa nen wechi màlà te epùn yesek winà yau, wate ya màlà Katù yapon yesek winà molopai mùkkàlà ipo tùwessen yesek winà.

₂₃“Àsà pe kulu iwechi màlà àpona'nokon Law pàk enupannan, molopai Pharisee yamùk! Tùusennakasan amyamlo! Katù lepanàinan amyamlo tewin 10 pan itesappe ewettok kon yapai, kùyali kà'nùnpanàinan là mint, dill molopai cummin ke, tùse tùkussen kulu law yawon uya enupantok nulunpannan amyamlo, ikasa we'nàtok, usentuppantok molopai ailon pe we'nàtok. Sàlà yamùk kupù auya'nokon sàlà eppaino wapiyalok tùnulunpase pùla. ₂₄Enpùla echi'ma anàinan! Kanpitu kankannan amyamlo tasukase àwuku yapai, tùse eke camel yeuno'mannan!” teppù Jesus uya.

₂₅“Àsà pe iwechi màlà àpona'nokon Law pàk enupannan, molopai Pharisee yamùk! Tùusennakasan amyamlo! Àkokù kon molopai apalapiyi kon kukannan polopo, tùse yau useka'nonkantok molopai iwalàwannà iche we'nàtok kuttok ke iwanùsak man. ₂₆Enpùnon Pharisee yamùk! Yau làkku pùsau ikukatàk kon wapiya, molopai nen uchi polopo nàlà wakù pe iwechi màlà!” teppù Jesus uya.

₂₇“Àsà pe kulu iwechi màlà àpona'nokon Law pàk enupannan molopai Pharisee yamùk! Tùusennakasan amyamlo! Aimu'nan ke uluwaik kukasak usene wakù pe polopo walai non, tùse iwelichak kappon yamùk yàppùlùssan molopai ikà ke iwanùssak yekkwa ton. ₂₈Màlà kasa làma wakù pe tùusenpoikasan amyamlo kappon yamùk piyak, tùse ayau'nokon awanùssak kon man ikasa pe tukaik usennakantok ke molopai àli pe we'nàtok ke,” teppù Jesus uya.

₂₉“Àsà pe iwechi màlà àpona'nokon Law pàk enupannan molopai Pharisee yamùk! Tùusennakasan amyamlo! Wakù pe uluwaik konekannan amyamlo Katù Maimu yenpoikannan ponaloppe, molopai wakù pe iwemassak kon uluwachi yùpùlùttànnan. ₃₀Molopai, ‘Wema'nàsakù'nokon pena kùtamo kon weyu yattai yau, tok pokonpe Katù Maimu yenpoikannan wànàppù'nokon pen sàlà eppaino,’ te auya'nokon. ₃₁Màlàpàk uchi mùkyamlo Katù Maimu yenpoikannan wànnanùssan payan pe ewechi kon yekama auya'nokon màlà! ₃₂Ikuttàk kon uchi, molopai atamo kon nùpyattàppù àli yenuka'nùttàk kon! ₃₃Àkài yamùk, molopai àkài yamùk munkà! Yà'là kasa ken uchi ewepe kon apok patassek yak àutà kon winàpai pe mùttuyatàu? ₃₄Màlàpàk uchi Katù Maimu yenpoikannan teunossaik, molopai pukkek ton, molopai enupannan. Tok tonpa yamùk wànà auya'nokon màlà, tùulon kon pukapàtù auya'nokon pulusuk pona. tùulon kon ippoppàtù auya'nokon màlà ewepilittok kon itak tau, molopai tok yenpe auya'nokon màlà pata yapai tùulon pata yamùk yawàlà'ne. ₃₅Màlàpàk tamù'nawolon kon wakù ton kappon yamùk wànnannùssan talumattàtok uyàpù màlà àpona'nokon, Abel wànàppù motapai Zechariah, Berechiah mumu wànàppù motak. Ànwànàppù kon Katù yùwùk molopai itùsak lùppù pottàtok patassek yakkletau. ₃₆Ailon kulu sàlà, sàlà yamùk wenai talumattàntok uyàpù màlà kappon yamùk sàlà yattai nokon pona!” teppù Jesus uya.

₃₇“Jerusalem, Jerusalem! Katù Maimu yenpoikannan mùwàtantàu molopai Katù neunokossan imaimu yenpoikannan mùwàtantàu tàk ke! Yà'là kaichalà itekkwa ayawon kon enpilipai wechippù, kalicho uya tùmunkà yamùk pilipù tapàli yokoik kasa, tùse ikupù uya iche pùla ewechippù! ₃₈Màlàpàk nen uchi apatasek wà'nàmà màlà tùkken. ₃₉Sàlà motapai uyentu'ma auya'nokon pen màlà, ukayaik àpàkù'nokon, ‘Ipùlemasak mùkkàlà Itepulu yesek yau tùuyàssen,’ te auya'nokon ponalà,” teppù Jesus uya.