Romans 7

₁Mùttuyatàik kulu utonpa yamùk uselupa sàlà pe masapùla law yeselu ittunnan amyamlo. Law yeselu wechi kappon yepulu pe màlà iwemapù pàkàlà neken.

₂Iwemali'masak ulichan mùkkàlà yentok ipàkàlà ke lepanài. Iwemali'masak ulichan mùkkàlà law yeselu winà tùnmali'mappù itayappù pe tùwessen tùwemapù yawàlà. Tùse itayappù welichak yau, law yeselu uya yachichak itayappù pàkànsau pen nen uchi màlà. ₃Màlàpàk uchi, tùulon kàyik pokonpe iwemapù tùtayappù welichak pùla tùse yau, “Mùkàlà wechi tùwemali'mappù ipokonpe pen pokonpe màlà. Àli ku'nài mùkkàlà,” te màlà. Tùse itayappù welichak yau, yachinài pùla iwechi màlà màlàpàk àli kupù ya pen, tùulon kàyik pokonpe iwemali'masak yau. ₄Màlà kasa nàlà iwechi màlà àpàkù'nokon, utonpa yamùk. Ewelichak nàlà màlà Law winàpai, masapùla Christ yesak pùkù pe ewechi kon pàk. Molopai nen uchi sàlà pe iponaloppe ewechi kon màlà, mùkkàlà iwuluukasak lùppù weli'nàtok yapai ponaloppe wema'nàtok kon pe tapulàsen pe Katù ponaloppe. ₅Masapùla wema'nà'nokon kùyeselu kon kùyau'nokon nai'nùk yawàlà yau, àli ànkupai we'nàtok yenpakasak Law uya wechippù màlà tùwe'wotokoma pàk kùyesak kon yau, molopai weli'nàtok nepùppù ya. ₆Sàlà pe kùnonkasak Law uya man, masapùla weli'nàsakù'nokon màlà kùyachinàippù'nokon winàpai, yachichak kon patikichi tak kasa kùku'nàippù winàpai. màlàpàk imenukasak lùppù Law yeselu yawàlà tùwessan pe we'nà pen sàlà , tùse emennak Law Wakù Akkwalù yeselu yawàlà tùwessan.

₇Yà'là te'nokon ken uchi? Law wechi màlà àli pe te'nokon ka'lù? Kanekku! Tùse law màlà àli ittutoppe uya uku'nàippù. Masapùla tùulon yemamin iche we'nàtok wechi ikasa pùla ituppù uya pen sàlà eppaino, law uya, “Tùulon yemamin iche kechii!” tesak pùla iwechi yau. {Ex 20.17 Deu 5.21} ₈Tùse makui uya màlà Law yapulàppù tamù'nawàlà yà'là yekkwa ton nà, utonpa yemamim iche wettok yenpakappù uyau. Masapùla Law pùla iwechi yau makui wechi màlà imeluntàlù pùla. ₉Nulà wechippù màlà pena Law ittu uya pùla iwechi yau. Tùse iyàssak yau makui wennappù molopai welikùppù. ₁₀Molopai yeneppù uya màlà wema'nàtok ne'nài pe ikussak, uya weli'nàtok nepùppù màlà upona. ₁₁Masapùla makui uya uyennakatok tùuya yattai woton yepoloppù màlà molopai uyennakappù ya tùwe'wotokoma’ Law winà, iwinà àli uya uwànàppù.

₁₂Màlàpàk Law màlà wakù, molopai imaimu màlà tùnamasen, iwalai, molopai nàlà esukenan. ₁₃Sàlà uya ken na' wakù pe nai'nùk uya welittok nepùppù màlà upona te màlà? Kanekku! Makui nen màlà weli'nàtok ne'nàippù, wakù pe nai'nùk yapulà tùuya winà, weli'nàtok nepùppù ya màlà uwinàkàik i'nai kasa kulu là makui yeselu wechi usentoppe ichenpoikatoppe. Màlàpàk Law winà, àli usene màlà àli pe kulu.

₁₄Itu'nokon man Law wechi Katù winàpaino pe. Tùse kappon Iulà ichilanmasak àli yapyoto pe. ₁₅Unkupù ittu uya pùla iwechi màlà, masapùla ànkuppai wettok kupù uya pùla iwechipàk. Tùse làkku uyewanma pe unkupù kupù uya. ₁₆Ànkuppai pùla wettok kupù uya yau, sàlà uya yekama màlà upàk law winàpaino wechi ikasa. ₁₇Màlàpàk Iulà kulu pen mùkkàlà sàlà yamùk kussai'nùk. Tùse uyàliyi làkku màlà uyau nemassai'nùk. ₁₈Tùttuyaik wakù wechi là uyau pùla sa'ne iwechi, kappon pe wechi yeselu pàk uselupa. Masapùla wakù ànkuppai we'nàtok wechi lànen uyau tùse, ikupù uya yeselùkek pùla. ₁₉Wakù ànkuppai wettok ku'nài pen Iulà. Tùse làkku àli ku'nài Iulà ànkuppai pùla wettok. ₂₀Ànkuppai pùla wettok kupù uya yau, sàlà uya yekama màlà Iulà wechi iku'nài pe pùla.Tùse makui làkku màlà iku'nài, màlà uyau nai'nùk.

₂₁Màlàpàk sàlà yeselu wechi tùwe'wotokoma pàk tenyaik. Wakù ànkuppai wechi yau, àli kupù uya. ₂₂Tamù'nawàlà uyewan ke uwakùli pe Law, Katù winàpaino ku'nài Iula. ₂₃Tùse tùpatalon yeselu we'wotokoma uyau tenyaik. Sàlà yeselu nepanta'mayai'nùk usenumenkatok yeselu winàkàik. Sàlà eselu àli yapyoto pe uyau ne'wotokomayai'nùk. ₂₄Tùusewankono'masen sa'ne Iulà kappon! Ànùk uya ken upùikattà sàlà uyesak uyayai'nùk weli'nàtok yak winàpai? ₂₅Tenki ukayaik Katù pàk Kùyepulu Jesus Christ yai!

Màlàpàk Katù maimu yawàlà eppai wessaik usenumenkatok yau, tùse kappon pe wettok yeselu ke àli maimu yawàlà wechi.