Katù Molopai Inanùmùssan Tùponalok Kon Pe
1Wa ukayai'nùk màlà ailon. Kùlaik ponalok Iulà molopai kasei pe wechi pùla man. Wakù Akkwalù uya nàlà i'napailà usenumenkatok ittu nai'nùk kasei pe pùla wechi. 2Eke pe kulu usewankono'matok man molopai uyewan nùpokoitayan tàwàlàlà ichipittà yeselùkek pùla, utonpa yamùk pàkànsau. 3Tok pàkànsau sa'ne Katù uya pa'nù'nàtok yo'no wechi pe eppai man molopai Christ winàpai umattatoppe utonpa yamùk pùikattà ya yau, Israel yamùk upùkkù ton molopai umùnù ton. 4Katù nanùmùssan kan mùkyamlo tà tùmunkà yamùk pe molopai tapulàtok pùkkù pe tok kupùppù ya tùpokonpe. Ikupù tùuya tetok tùuya kupùppù ya màlà molopai Law, tùlùppù ya tok yemyak. Katù yapulàtok yesak ton mùkyamlo. Ikupù tùuya tetok Katù uya yanùmùppù tok uya màlà. 5Amoko yamùk inamasak kon nùssan payan yamùk mùkyamlo, molopai Kùlaik , kappon pe iwettok yau, mùkkàlà tok winàpaino. Tàwà uchi Katù tamù'nawolon yepoi itepulu pe nechii, yapulà nechii tàwàlàlà! Emen.
6Katù uya ikupù tùuya teppù lùppù kupù pùla man te ya pùla man, masapùla tamù'nawàlà là Israel winàpai iwesseposak kon pe kappon yamùk wechi, wechi Katù ponaloppe pen màlà. 7Molopai tamù'nawolon kon wechi là Abraham munkà yamùk pe, ipayan yamùk pe tùwechi kon pàk pen màlà. Masapùla Katù uya Abraham pàk, “Isaac munkà yamùk molopai ipayan yamùk neken ittu màlà apayan pe,” tesak pàk. {Gen21.12} 8Sàlà uya mà màlà Abraham munkà pe là iwentusappe tùwechi kon pàk Katù ponaloppe tok wechi yekama pen tà. Tùse mule yamùk iwentusak kon Katù uya ikupù tùuya teppù lùppù yo'no, mùkyamlo tanùnsan Abraham payan pe kulu. 9Masapùla Katù uya ikupù tùuya teppù lùppù wekupùppù sàlà mayin yau,“Iwalai wei yattai wennapo màlà molopai Sarah uya walawok muleppù yepolo màlà,” tawon. {Gen18.10, 14}
10Molopai sàlà neken pen. Masapùla Rebecca munkà asa'lon kon walawotichi kàipùnù wechippù mùkkàlà lùppù pe, kùtamo kon Isaac. 11-12Katù uya Rebecca yelupappù màlà pùsamlo mule yamùk pàk tok wentu wapiya. Katù uya yekamappù ipàk,
“Ilui wechi màlà takon yapyoto pe,” tukaik. {Gen 25.23}
Sàlà uyàpùppù màlà mule yamùk wentu wapiya, wakù là wapùla àli là yà'làlà kussak tok uya wapiya, Katù uya anùnnàtok wechi yà'làlà ikussak wakù wapùla àli là pàkàlà pùla yekamanài pe kulu, tùse teselu pàkàlà làkku. 13Iwe'menukasak Katù Maimu yau,
“Jacob kupùppù uya uwakùli pe tùse Esau kupùppù uya uyewanma pe, ” tukaik. {Gen 25.23}
14Yà'là te'nokon ken uchi? Katù wechi màlà ikasa pùla te ka'lù? Kanekku! 15Masapùla Moses pàk, “Usentuppa màlà esentuppapai wettok kon ipàk pàk, molopai ànpàlikapai wettok kon pàlika uya kulu màlà,” teppù ya. {Ex 33.19}
16Màlàpàk uchi kappon wettok iche wapùla inkupù pàkàlà iwechi pen màlà tùse Katù usentuppatok pàkàlà neken. 17Masapùla Katù Maimu uya Pharaoh pàk, “Sàlà pàkànsau àwuluukappù uya, umeluntàlù yenpoikatoppe uya ayai. Molopai uyesek yekamatoppe i'nailàlà kappon yamùk non polon kon kùlottawà,” te. {Ex 9.16} 18Màlàpàk uchi Katù tùusentuppasan ipàk esentuppapai tùwettok ipàk pàk, molopai sa'man pe itewan ànkuppai tùwettok ku'nài sa'man pe.
Katù We'naikatok Molopai Ichentuppatok
19Àtonpa kon uya là upàk, “Sàlà kasa iwechi yau, ata ken uchi Katù uya iwalai pen yepolo màlà kappon yau? Masapùla ànùk uya ken Katù yeselu nulunpa?” te màlà. 20Tùse ànùk ken uchi àmàlà, kappon, Katù Maimu yeippàtù pa? Àinà màlà tùka'nài là kappon, yekamappopà'nài pen, “Yà'là peichi iwechi pàk kùkattai sàlà kasa?” tawon pen. {Isa 45.9} 21Àinà ka'nài ku mùkkàlà àinà yapai wakù yà'làlà weyu yàttai neken tapulàsen pe ikonekanài tà molopai echipalà tapulàsen pe ikonekanài tùusenumenkatok yawà.
22Yattai pùla là Katù wechippù tùwe'naikatok molopai tùmeluntàlù enenpoikapai sàlà. Màlàyau mùkyamlo tùwe'naikatok ipàk ton pan kon pàlikappù ya, mùkyamlo tùntalumattà pan kon. 23Eke kulu tapulàtok enenpoikapai tùwechi ipàk tùusentuppapù ton pàk pàk, mùkyamlo inkonekassan pena tapulàtok yanùnnàinan pe tok wettoppe. 24Masapùla kùmyamlo uchi mùkyamlo inkà'massan, Jew yamùk kùlottapai neken pùla, tùse nàlà Jew yamùk pen kùlottapai. 25Wa teppù ya sàlà lùppù Hosea kaletayi yau.
“Kappon yamùk uponalok kon pe pùla iwessak kon nùssan yesatù uya màlà ‘Uponalok kon pe,’ tukkan kon kappon yamùk tùpatasek yawon kon unù'nùnmassan pen, yesatù uya màlà ‘U'nùn ton,’ pe. {Hos 2.23}
26Molopai,
‘Umunkà yamùk pen amyamlo,’ teppù tok pàk yau, tok yesatùppù màlà tùwelichen pen Katù munkà yamùk,” tukaik. {Hos 1.10} 27Molopai Isaiah uselupappù Israel yamùk pàk,
“Isreal yamùk wechi lànen wàssàk, palau yena pon kasa tùse, tukke pùla neken tok pùikattà màlà. 28Masapùla Itepulu Katù uya ase'ne kulu àsà pe talumattàntok nepù màlà non pon kon pona,” {Isa 10. 22, 23} teppù kasa. 29Isaiah uya pena,
“Itepulu Katù Mùkkàlà neken Meluntà uya kùpayan kon pùnùnmasak pùla iwechi yau, Sodom pon kon kappon yamùk molopai Gomorrah pon kon kappon yamùk kasa we'nàppà'nokon eppaino,” teppù kasa. {Isa 1.9}
Israel Molopai Wakù Itekale
30Yà'là te'nokon ken uchi? Jew yamùk pen ikasa tùwettùlùiche tùwessan Katù pokonpe pen, yanùmùppù màlà ikasa Katù pokonpe. Sàlà wekkussak wechippù màlà ailon tesak tok uya pàk. 31Yanùnsak kon kappon yamùk Israel yamùk Law yai ikasa tùtùlù kon woton Katù pokonpe iwanàinan uya, yepoloppù pùla tùse. 32Yà'là pe iwechi pàk? Masapùla tok nùkupùppù wechi ailon tetok pàkànsau pùla tùse wotoko pàkànsau pàk. Tok tùwettatai'masan “wettatai'mantok ipona tàk” pona 33Iwe'menukasak màlà pàk kasa,
“Yentàk kon, tàk tùlù uya sàlà Zion pona, kappon yamùk tatai'manài pe. Tàk, ipona tok wepippotok. Tùse mùkkàlà ailon tawon ipàk wekkuli'ma pen màlà,” tukaik kasa .{Isa 8.14, Isa 28.16}
