2 Korinte 9

₁A no de fanowdu fu mi e skrifi unu fu a sani di un e du gi den sma fu Gado. ₂Bika mi sabi taki un de klar'klari fu yepi trawan. Dat' meki mi meki bigi gi unu na den bribisma fu Masedonia. Mi taigi den taki: “Sensi a yari di psa den sma fu Akaya de klar'klari fu yepi.” A angri san un ben abi fu yepi ben gi trawan lostu fu du en tu. ₃So mi seni den brada disi kon fu sori taki wi no meki bigi fu soso ini a tori disi, ma taki un tnapu klar'klari leki fa mi ben taki. ₄Bika a no mus de so taki efu sma fu Masedonia kon nanga mi, dan un no klari ete. Dan wi o firi syen fu di wi ben e ferwakti taki un ben kba. Ma mi no e taki fa unu o firi unsrefi. ₅Dat' meki mi ben feni en bun fu begi den brada fu kon na unu fosi mi kon. Dan den kan yepi unu fu poti a moni klari san un ben pramisi. Dan a o de klari leki wan sani san unu srefi gi. A no o gersi wan sani san mi ben mus dwengi unu fu gi.

₆Sabi taki: A sma di no e sai furu no o koti furu tu. Ma a sma di e sai furu o koti furu. ₇Ibri sma mus gi san de na tapu en ati fu gi. A no mus kisi konsensi fonfon bakaten èn a no sma mus dwengi en fu gi. Bika Gado lobi a sma di e gi nanga prisiri. ₈Gado abi makti fu gi unu ala sani bogobogo san un abi fanowdu. Dan un o abi nofo fu ala sani, na ini ala fasi èn ala ten. Tapu sowan fasi un o abi moro leki nofo fu du tra sma wan bun, awinsi san a de. ₉A de soleki fa a skrifi taki: “A e prati furu sani, a e gi den pôtisma. A e tan du san bun ini Gado ai fu têgo.” ₁₀Na Gado e gi a gronman siri fu sai èn na En e gi sma brede fu nyan. Na En o gi un siri, A o meki a kon moro furu, èn A o meki taki den bun wroko san un e du, o gi bun froktu. ₁₁A o gi unu so furu na ala fasi taki ala ten un o prati furu gi trawan. Dan tra sma o taki Gado tangi fu san un gi den nanga yepi fu wi. ₁₂A moni san un e gi, no de gi den nowtu fu den sma fu Gado nomo. Ma a e meki taki furu sma e taki Gado tangi tu. ₁₃Bika a yepi san un e yepi den e meki den prijse Gado. Den e gi Gado grani taki unu e du san a bun nyunsu fu Kristus e leri unu, èn taki un e prati san un abi nanga den èn nanga ala den trawan. ₁₄Den e begi gi unu èn den e angri fu si unu, fu di Gado sori unu En bun-ati psa marki. ₁₅Meki wi taki Gado tangi fu a bun di A gi wi, di bigi moro leki mofo kan taki!