Isak nanga Rebeka
1Abraham ben kon grani srefsrefi kba èn MASRA ben blesi en ala fasi. 2Dan Abraham taigi a moro owru knekti fu en, di ben e sorgu gi ala sani di a ben abi, taki: “Poti yu anu ondro mi bowtu, 3dan yu e sweri gi mi na MASRA, a Gado fu heimel nanga grontapu, taki yu no sa teki wan uma gi mi manpikin dyaso na mindri den Kananitisma, pe mi e libi. 4Ma yu mus go na mi famiri ini a kondre pe mi gebore. Drape yu mus go teki wan frow gi mi manpikin Isak.” 5A knekti taigi Abraham taki: “Kande a frow no o wani kon nanga mi na a kondre disi. Yu wani dan taki mi tyari yu manpikin go na a kondre pe yu ben kmoto kon?” 6Ne Abraham piki en taki: “Mi e warskow yu fu yu no tyari mi manpikin go drape. 7MASRA, a Gado fu heimel, puru mi mindri den ososma fu mi nanga ini a kondre pe den famiri fu mi e tan. A sweri gi mi taki: ‘Mi o gi den bakapikin fu yu a kondre disi.’ A sa seni en engel go na yu fesi èn yu sa teki wan frow fu drape gi mi manpikin. 8Efu a frow no wan kon nanga yu, dan a sweri di yu meki gi mi e broko. Ma yu no mus tyari mi manpikin go drape.” 9Dan a knekti poti en anu ondro Abraham bowtu èn a sweri taki a ben o du san en basi aksi en.
10A teki tin kameel nanga ala sortu diri sani fu en basi, dan a hari go na a foto Aram-Naharaim pe Nakor, a brada fu Abraham, ben e libi. 11Di a doro na a foto, a meki den kameel kindi na wan watrapeti dorosei fu a foto. A ben de mofoneti, a ten sa den umasma e kon fu peti watra. 12Ne a knekti begi taki: “MASRA, Gado fu mi basi Abraham, sori mi basi Abraham sari-ati èn meki sani waka bun gi mi. 13Luku, mi tnapu dyaso na a watrapeti pe den umapikin fu a foto o kon fu peti watra. 14Meki a de so taki mi sa aksi wan umapikin taki: ‘Langa yu kroiki gi mi fu mi dringi pikinso watra.’ Efu na a umapikin dati yu ben teki gi yu knekti Isak, dan meki a piki taki: ‘Yu kan dringi èn mi sa gi den kameel fu yu fu dringi tu.’ Dan so mi sa sabi taki yu sori mi basi sari-ati.”
15A no ben kba taki srefi ete, di a si Rebeka e waka kon nanga en kroiki tapu en skowru. Rebeka ben de a umapikin fu Betuel. Betuel ben de a manpikin fu Milka nanga Nakor, a brada fu Abraham. 16Rebeka ben de wan trutru moi pikin. A ben de wan yongu uma, di no ben sribi nanga wan man ete. A saka go na a peti, a furu en kroiki, dan a kren kon baka na loktu. 17Dan a knekti waka miti en. A aksi en taki: “Mi e begi yu, meki mi dringi pikinso watra fu yu kroiki.” 18Ne Rebeka piki taki: “Yu kan dringi masra.” Dan a saka a kroiki es'esi fu en skowru fu meki a knekti dringi. 19Di a dringi nofo, Rebeka taigi en taki: “Mi sa go teki moro watra na a peti, fu den kameel dringi tu te a sari den.” 20A kanti a kroiki es'esi leigi ini a watrabaki, dan a drai go baka na a peti fu go teki watra gi den kameel, te leki den ben dringi nofo. 21A man ben e tan luku en sondro fu taki wan sani. A ben wan sabi efu MASRA ben meki sani waka bun gi en. 22Di den kameel ben dringi nofo, a man puru wan nosolinga fu sowan siksi gran gowtu nanga tu bui fu sowan siksitenti gran gowtu kon na doro. 23Dan a taki: “Taigi mi, suma na yu p'pa? Mi nanga den man fu mi o man psa a neti na yu p'pa oso?” 24Rebeka piki taki: “Mi na a pikin fu Betuel, a manpikin fu Milka nanga Nakor.” 25Rebeka taigi en moro fara taki: “Nofo grasi nanga nyanyan de gi den meti èn nofo presi de fu un psa a neti.” 26Dan a man kindi èn a anbegi MASRA. 27A taki: “Mi e blesi MASRA, a Gado fu mi basi Abraham. Yu tan sori mi basi sari-ati èn taki a kan fertrow na yu tapu. Èn mi fu mi sei, Yu tyari mi langalanga kon na a oso fu mi basi famiri.” 28Dan a pikin lon go es'esi na en m'ma oso, go ferteri san psa.
29Ne Laban, a brada fu Rebeka, libi a foto wantron, dan a lon go na a man na a peti. 30Bika di a si a linga nanga den bui na a anu fu en sisa, èn di a yere san en sisa Rebeka taki, a opo go na a man di ben tnapu na den kameel na a peti. 31Ne a taigi en taki: “Kon nanga mi. A blesi fu MASRA de na yu tapu. Fu sanede yu tnapu dyaso na dorosei? Ala sani seti kba na oso èn presi de gi den kameel.” 32Ne a man go nanga en na oso. Den puru den lai di den kameel ben e tyari, dan den poti grasi nanga nyanyan gi den. Den tyari watra tu fu wasi den futu fu a man nanga den knekti fu en. 33Ma di den poti nyanyan gi en, a man taki: “Nono, mi no o nyan fosi mi taki san tyari mi kon dyaso.” Ne Laban taigi en taki: “Taigi unu san yu abi fu taki.” 34A man taki: “Mi na a knekti fu Abraham. 35MASRA blesi a basi fu mi èn a kon gudu. A abi skapu, krabita nanga kaw, solfru nanga gowtu, uma nanga mansrafu, kameel nanga buriki. 36Sara, a frow fu mi basi, meki wan manpikin gi, en aladi a ben kon owru kba. So mi basi gi ala sani di a abi na a boi disi. 37Dan mi basi meki mi sweri taki: ‘Yu no sa teki wan uma gi mi manpikin dyaso na mindri den Kananitisma, pe mi e libi. 38Yu mus go pe mi p'pa ben e libi. Yu mus go na mi eigi famiri, go teki wan frow gi mi manpikin.’ 39Ma dan mi taigi en taki: Kande a frow no o wani kon nanga mi. 40A piki mi taki: ‘Mi libi gi MASRA leki fa en ben wani taki mi mus libi. A sa seni en engel go nanga yu. A sa meki sani waka bun gi yu, fu yu feni wan frow gi mi manpikin na mi famiri, na den eigi sma fu mi. 41Soso te yu go na den famiri fu mi èn den no wani meki a frow gwe nanga yu, dan sofasi wawan a sweri di yu meki sa broko.’ 42Di mi doro tide na a watrapeti, mi taki: MASRA, Gado fu mi basi Abraham, meki sani waka bun gi mi. 43Luku, mi tnapu na a watrapeti. Meki a de so, taki mi sa aksi wan yongu umapikin di kon fu kon peti watra, taki: Meki mi dringi pikinso watra fu yu kroiki. 44Efu na a umapikin di yu, MASRA, teki gi a manpikin fu mi basi, dan meki a piki taki: ‘Yu kan dringi èn mi sa gi den kameel fu yu fu dringi tu.’ 45Mi no ben kba taki wan bun fasi srefi ete di mi si Rebeka e kon nanga en kroiki tapu en skowru. A saka go na a peti dan a kisi watra. Ne mi aksi en taki: ‘Meki mi dringi pikinso.’ 46A saka en kroiki es'esi dan a taigi mi taki: ‘Yu kan dringi èn mi sa gi den kameel fu yu fu dringi tu.’ Ne mi dringi èn a gi den kameel fu dringi tu. 47Baka dati mi aksi en taki: ‘Taigi mi, suma na yu p'pa?’ A piki taki: ‘Mi na a pikin fu Betuel, a manpikin fu Milka nanga Nakor.’ Ne mi weri wan linga gi en na en noso nanga den bui na en anu. 48Dan mi kindi fu anbegi MASRA. Mi blesi MASRA, a Gado fu mi basi Abraham, di tyari mi tapu a yoisti pasi fu mi ben kan teki a umapikin fu mi basi en brada leki frow gi en manpikin.” 49A knekti taigi den moro fara taki: “Meki mi sabi efu un wan sori mi basi sari-ati èn taki a kan fertrow na un tapu. Efu a no de so, dan un taigi mi tu, fu mi sabi san mi mus du.” 50Ne Laban nanga Betuel piki taki: “Wi no abi noti fu taki. Na MASRA meki ala den sani disi psa. 51Luku Rebeka dyaso, teki en tyari go fu a tron a wefi fu a manpikin fu yu basi, leki fa MASRA taki.” 52Di a knekti fu Abraham yere san den taki, a boigi dan a taki MASRA tangi. 53Baka dati a puru solfru nanga gowtu sani nanga krosi kon na doro, dan a gi Rebeka. A gi a brada fu Rebeka nanga en m'ma diri kado tu. 54Dan en nanga den man fu en nyan, èn den psa a neti drape.
Di a opo a tamara mamanten a taigi den taki: “Meki mi drai go baka now na mi basi.” 55Ma Rebeka m'ma nanga en brada piki taki: “Meki a pikin tan ete wan tin dei so na unu. Baka dati a kan go.” 56A knekti piki den baka taki: “Na MASRA ben meki taki sani waka bun gi mi. Un no meki mi draidrai moro langa, ma meki mi drai go baka na mi basi.” 57Ne den taki: “Kon meki wi kari a pikin, dan wi aksi en sa a wani du.” 58So den seni kari Rebeka, dan den aksi en taki: “Yu wani gwe nanga a man disi?” Rebeka piki: “Iya” 59Dan den meki den sisa Rebeka nanga a uma di ben e sorgu gi en di a ben pikin, gwe nanga a knekti fu Abraham nanga den man fu en. 60Den blesi en, dan den taigi en taki: “Sisa, wi e howpu taki yu sa tron m'ma fu so furu bakapikin, taki den no den fu teri èn taki den sa teki den foto fu de feyanti fu den abra.” 61Dan Rebeka nanga den umaknekti di ben o gwe nanga en meki densrefi klari. Den kren sidon tapu den kameel dan den gwe nanga a man. Na so a knekti tyari Rebeka gwe.
62A pisten dati Isak ben go tan ini a Negebsabana na a peti Lakai-Roi. 63Wan mofoneti a ben e waka ini a gron e broko en ede nanga prakseri. Di a opo en ede a si wantu kameel e kon. 64Di Rebeka si Isak a saka fu a kameel. 65Dan a aksi a knekti taki: “Suma na a man di e waka ini a gron drape kon miti unu.” A knekti piki en taki: “Na mi basi.” Ne Rebeka tapu en fesi nanga wan krosi. 66A knekti ferteri Isak fa ala sani ben waka. 67Dan Isak teki Rebeka tyari go ini a tenti fu en m'ma Sara. Na so Rebeka tron a wefi fu Isak. Isak kon lobi Rebeka èn na so a feni trowstu baka a dede fu en m'ma.
