Yob 38

₂“Suma e teki a prefuru fu krutu a besroiti fu Mi,

sondro fu sabi san a e taki?

₃Meki yu srefi klari,

bika Mi o aksi yu wantu sani

èn yu mus piki Mi.

₄Fa Mi du seti a fundamenti fu grontapu?

Taigi Mi, bika yu sabi dipidipi sani.

₅Suma poti o bigi grontapu mus de?

Suma hari a markititei na en abra?

Taigi Mi, bika yu sabi!

₆Tapu san den bigi postu e rostu di hori en?

Suma poti a moro prenspari ston fu a fundamenti?

₇Di dati ben e psa,

den mamantenstari ben e singi makandra,

èn den engel ben e prisiri.

₈Suma poti doro gi a se,

di a ben e broko kon na doro fu dipi ondro grontapu?

₉Na Mi lontu en nanga wolku

èn lontu en nanga dungru.

₁₀Na Mi tapu en lontu,

sroto en baka doro nanga greni.

₁₁Na Mi ben taigi en taki: Te dyaso, no moro fara,

te nanga a syoro disi den bigi skwala fu yu kan kon!

₁₂Sensi di yu de na libi,

oten yu komanderi a dei tak' a mus broko,

wan nyun dei tak' a mus bigin,

₁₃fu kan grabu grontapu na den kba pisi fu en,

èn seki den ogri-ati sma puru na en tapu?

₁₄A krin fu dei e sori a moi fu grontapu,

a e meki a gersi wan krosi nanga furu kloru.

₁₅Ma a leti dati krin tumsi gi den sma di e du ogri,

a e meki tak' den no man du den pori wroko fu den.

₁₆Yu go kba na a presi pe a se watra e kon na doro?

Yu go koiri kba na a dipi fu a se fu ondrosuku en?

₁₇Wan sma sori yu den doro fu dedekondre kba?

Yu si den doro fu a dipi dungru presi dati kba?

₁₈Yu sa man ferstan o bigi grontapu de?

Taigi Mi, efu yu sabi ala den sani disi!

₁₉Pe a pasi de fu go pe a faya e libi?

A tanpresi fu dungru, pe a de?

₂₀Efu yu sabi,

yu kan sori den pe den mus go du den wroko

èn pe den mus drai go baka.

₂₁Yu sa sabi, bika na a ten dati yu gebore,

na bun furu yari yu de na grontapu kba!

₂₂Yu go kba pe Mi kibri a sneeuw poti?

Yu si den maksin kba pe a pis'pisi ijs e tan?

₂₃Mi kibri den poti drape gi ten fu benawtu,

gi ten te bigi feti e feti.

₂₄Pe a pasi de fu go pe Mi e meki a faya e koti,

noso pe a winti fu zuidsei e wai kmopo?

₂₅Suma e meki wan pasi gi a sibibusi

nanga gi a faya di e koti?

₂₆Suma e meki a alen fadon pe sma no e libi,

ini a dreisabana pe sma no de srefsrefi?

₂₇Suma e meki den sortu presi dati

abi nofo watra fu meki grasi kan pusu ede

es'esi kon na loktu?

₂₈Taigi Mi, a alen abi wan p'pa?

Na wan man meki den dropu fu a dow

leki fa a e meki wan pikin?

₂₉Fu a bere fu sortu m'ma ijs e kon gebore?

Sortu uma e meki a bun kowru winti fu heimel

kon gebore?

₃₀Na a winti dati e meki den bigi watra

kon tranga leki ston,

na en e meki a heri se tron ijs.

₃₁Yu man tai a grupu stari fu zuidsei kon na wan,

noso lusu den titei di tai a grupu

di de na mindrisei na heimel?

₃₂Yu kan meki den stari sori densrefi na tapu a yoisti ten,

noso tiri den stari na noordsei

di den e kari a Bigi Beer nanga a Pikin Beer?

₃₃Yu sa man sabi den wèt

di e tiri den sani dati na a heimel,

èn yu kan meki den wèt dati wroko na grontapu?

₃₄Yu man opo yu sten fu komanderi den wolku,

fu den meki bogobogo alen fadon na yu tapu?

₃₅Efu yu kari a faya di e koti na loktu,

a sa kon èn aksi yu taki:

‘Pe yu wani fu un koti?’

₃₆Suma gi a Ibis a koni fu sabi oten

a Nijl-liba o lon abra,

nanga a kakafowru fu sabi oten alen o kon?

₃₇Suma sa man teri den wolku,

èn suma sa man drai den fu meki a watra fadon

di de na den ini,

₃₈a watra di e meki a doti kon tranga leki isri

èn di e meki pis'pisi doti fasi na wan?