1Wan koni uma e hori en ososma na wan,
ma wan don uma e broko en eigi oso.
2A sma di e libi leki fa a fiti, abi lespeki gi MASRA,
ma a sma di e waka tapu kruktu pasi, no wani sabi not'noti fu En.
3Don sma e taki sani di de leki wan fonfontiki gi den eigi heimemre,
ma den sani di koni sma e taki e kibri den.
4Pe bulu no de fu drai a doti, maksin e tan leigi,
ma pe tranga bulu de pranigron e gi furu nyanyan.
5Wan ketoigi di de fu fertrow no e lei,
ma wan di no de fu fertrow e taki soso lei.
6Wan sma di e meki spotu noiti no o feni koni,
ma sabi makriki fu feni gi wan sma di abi ferstan.
7Tan fara fu don sma,
bika yu no o leri noti fu den.
8A koni fu wan koni sma e meki a sabi sortu pasi a mus waka,
ma a donfasi fu don sma e meki den kori densrefi.
9Don sma e meki spotu nanga sondu,
ma sma di e libi leki fa a fiti abi prisiri nanga makandra.
10Wan sma no man firi o dipi a sari fu wan trawan de,
noso o bigi a prisiri fu en de.
11A oso fu ogri-ati sma sa broko,
ma a sa go bun nanga a oso fu sma di e libi leki fa a fiti.
12Son leisi sma e prakseri taki den e waka tapu a leti pasi,
ma a kbapisi fu a pasi dati na dede.
13Srefi efu wan sma e lafu en ati kan firi sari,
èn baka a prisiri a sari de ete.
14Wan sma di e waka kruktu pasi o kisi a pai fu den sani di a e du,
ma wan bun sma sa kisi wan moro betre pai.
15Wan sma di no abi ferstan e bribi ala sani,
ma wan sma di koni, e prakseri fosi.
16Wan koni sma e luku bun èn a no e du ogri,
wan don sma no e du nomo leki noti no man psa nanga en.
17A sma di ati e bron esi, e du don,
èn sma no sa lobi a man di e sidon prakseri fa fu du ogri.
18Den sma di no abi ferstan o kon moro don,
ma wan koni sma o kisi moro sabi.
19Takru-ati sma o abi fu saka den srefi gi bun sma,
den ogri-ati sma sa naki na a doro fu den sma di bun ini Gado ai.
20Efu yu na wan pôtisma den mati fu yu srefi no lobi yu,
ma wan guduman abi furu mati.
21A sma di e si wan trawan leki noti, e sondu,
ma a sma di e yepi pôtisma na wan blesi sma.
22Sma di e sidon prakseri fa den o du ogri, e kmoto fu a bun pasi,
ma sma sa lobi yu di e du bun, èn den sa fertrow yu.
23Ala muiti di wan sma e meki abi en pai,
ma wan sma di e tak'taki nomo, o pina.
24A grani di koni e gi na gudu,
a grani fu don sma na moro donfasi.
25Wan ketoigi di de fu fertrow kan meki sma tan na libi,
ma wan di e lei na wan bedrigiman.
26A sma di e lespeki MASRA no e frede noti,
srefi gi den pikin fu en Gado de wan kibripe.
27Lespeki gi MASRA na wan bron fu libi,
a e puru yu ini den sani di dede ben seti fu fanga yu.
28Wan bigi folku e gi wan kownu grani,
a makti fu wan kownu sondro knekti sa kon es'esi na wan kba.
29Wan sma nanga furu ferstan no e kisi atibron es'esi,
ma wan sma di ati e teki faya es'esi e sori moro nanga moro fa a don.
30Efu noti no e trobi wan sma, a o de gesontu,
ma dyarusu de leki wan takru siki di e nyan en fu inisei.
31A sma di e pina wan pôtisma, e afrontu a Wan di meki en,
ma a sma di e sorgu gi wan mofinawan, e gi En grani.
32Wan ogri-ati sma e broko den eigi neki nanga a ogri di a e du,
ma a sma di bun ini Gado ai e feni wan kibripresi te a dede.
33Koni e libi ini a ati fu a sma nanga ferstan,
srefi den sma sondro ferstan sabi dati.
34Fu du a wani fu Gado e gi wan folku grani,
ma sondu na wan syen gi iniwan folku.
35Wan kownu e sori en bunfasi na wan knekti nanga ferstan,
ma en ati o bron tapu wan knekti di e gi en syen.
