Psalm 5

₂MASRA, arki te mi e begi,

luku te mi e dyeme.

₃Mi Gado nanga mi Kownu,

arki te mi e bari suku yepi,

bika na gi Yu mi e tyari mi begi.

₄MASRA, mamanten Yu e yere mi sten,

fruku mamanten mi e poti den tori fu mi na Yu fesi,

dan mi e wakti tapu a piki di Yu o piki mi.

₅Yu na wan Gado di no e prisiri nanga kruktudu,

no wan ogri-ati sma kan tan na Yu.

₆Sma di abi bigifasi no man kon pe Yu de.

Ala den sma di e du ogri,

Yu no lobi srefsrefi.

₇Yu e wai ala den sma puru na pasi di e lei.

MASRA no mus abi not'noti fu kiriman nanga bedrigiman.

₈Ma na a bigi lobi fu Yu,

meki taki mi kan go ini a oso fu Yu,

mi kan boigi nanga lespeki ini a santa tempel gi Yu.

₉MASRA, Yu di e du sani nanga leti,

tiri mi, fu den feyanti fu mi ede,

grati a pasi gi mi fu mi kan du Yu wani.

₁₀Bika noti san kmoto ini den mofo de fu fertrow,

soso kiri de ini den ati,

den mofo e tyari sma go na den grebi,

nanga den switi taki fu den.

₁₁Gado, meki den butu,

meki den ogri di den ben seti fu du psa nanga den srefi.

Puru den ini a libi makandra, fu den furu kruktudu fu den,

bika den no wani du san Yu e taki.

₁₂Ma ala den sma di e kibri na Yu o breiti,

ala ten den o prisiri fu di Yu e kibri den,

den di lobi a nen fu Yu o prisiri gi Yu.

₁₃MASRA, Yu e blesi den wan di bun ini Yu ai,

nanga lobi Yu e kibri den leki wan schild.