Hebar log 4
Parmeswar ke sjaantie okar djaatie khaatien
1Parmeswar waada karies raha kie oe hamlogke sjaantie dei. Aur ie waada abbe talak hamlogke khaat hai. Ohie se bahoet batjaaike rahiehe kie koi na sotj sake kie hamlog patjhariela. 2Djaise hamlogke baap-daada log ie khoes khabar soenies raha, oisane hamlog bhie soenlie rahielie. Bakie oelog soenke na bieswaas karies. Ohie se oesabke khaatien oman faida na raha. 3Bakie hamlog okar waada me bieswaas kariela, ohie se Parmeswar hamlogke aapan sjaantie deiga. Aur be-bieswaasie logan ke biese me oe bolies hai:
„Ham goessaaike kasam khailie hai kie:
‘Hamaar sjaantie oelogke kabhie na mieliega.’ ”
Djab Parmeswar doenia ke soeroe me aapan sab kaam poera karies raha, tab okar sjaantie iensaan logan khaatien bhie raha. 4Okar poestak me doenia ke soeroe ke satwa dien ke biese me liekhal hai kie:
„Parmeswar satwa dien par aapan sab kaam poera karke soestaais.”
5Aur bhie liekhal hai kie:
„Oesabke hamaar sjaantie kabhie na mieliega.”
6Dje pahiele ie khoes khabar soenke na bieswaas karies, oe okar sjaantie na paais. Tabbo koi koi ke abbe Parmeswar ke sjaantie mieliega. 7Ohie se dher dien baad Parmeswar raadja Daawied ke ek giet me „‘aadj ke dien”’ ke biese me gawaais hai kie:
„Djab toelog aadj Parmeswar ke aawaadj soeniehe, tab aapan man kathor na kariehe.”
8Djab Josoewa Israel ke djaatie log ke Parmeswar ke sjaantie me ledjaat, tab Pawietr Aatma baad me ek doesar dien thoro „‘aadj ke dien”’ bolaawat?
9Aise hamlog dekh sakiela kie Parmeswar ke djaatie log khaatien ek dien poera sjaantie aaiga. 10Dje Parmeswar ke sjaantie paais hai, oe okar ghat aapan kaam poera karke bhie soesta hai. 11Ohie se hamlogke tjaahie kausies kare ke okar sjaantie paawe ke, nahie to hamahoelog me koi hamlogke baap-daada ner Parmeswar ke baat tjhorke ose doer hoi djaai. 12Parmeswar ke baat djienda hai aur oman bahoet saktie hai. Oe ek doeno bagal tjokh talwaar se auro tjokh hai. Aur ek iensaan ke andar me aisan ghoes dja hai kie oe okar djiew aur aatma, okar haddie-goeddie, aur okar sotj-bietjaar alag-alag kar dewe hai. 13Parmeswar ke aakhie ke saamne sab tjiedj khoelal hai. Okar khaatien koetjh na tjhiepal hai. Aur hamlogke oke lekha dewe ke parie.
Jiesoe sab se barka Agwa hai
14Hamlogke sab se barka Agwa Parmeswar ke Beta Jiesoe hai. Oe swarag ke dwaara oeppar gail hai. Aur hamlogke tjaahie ie baat pakarle rahe ke. 15Oe khoeb thiek se samdjhe hai kie hamlog kamdjor baatie. Oe hamlogke ner sab tjiedj me adjmaawal gail hai aur oe ekko paap na karies hai. 16Parmeswar hamlogke bhalaai kare hai. Ohie khaatien aaw, hamlog be-dar se ose sab koetjh maangie dja, djeme oe hamlogke daaja kare aur haath lagaawe djab hamlogke djaroerie rahie.
© 2010, Wycliffe Bible Translators, Inc. All rights reserved.
