Dag 252 van 365- Spreuken 6-7 en 2 Korintiërs 2

₁Mi boi, efu yu tnapu dyaranti gi wan sma,

efu yu seki anu leki wan pramisi gi wan sma di yu no sabi,

₂efu yu fasi yusrefi nanga den sani di yu taki,

èn yu no man broko den pramisi di yu meki,

₃dan yu mus du disi, mi boi, fu kmoto na ini,

bika a trawan abi yu ini en makti.

Go es'esi, saka yusrefi gi en

èn begi en.

₄No lasi ten,

no go rostu,

₅ma kmopo ini en anu,

leki fa wan dia e kmopo ini a anu fu wan ontiman,

èn wan fowru ini a anu fu a sma di wan fanga en.

₆Yu lesiman, go luku den mira,

go luku fa den e wroko fu yu kan kon koni.

₇Den no abi fesiman,

den no abi tiriman, noso kownu,

₈ma ini dreiten den e tyari nyanyan kon na wan,

ini a ten fu koti nyanyan den e tyari nyanyan go poti na wan sei.

₉Ma yu, lesiman, olanga yu o tan didon?

Oten yu o opo kmopo fu yu bedi?

₁₀Sribi pikinso fu yu ete, dyonko pikinso ete,

didon fow yu anu fu yu tapu yu borsu.

₁₁Dan pina o teki yu es'esi,

leki fa wan abani e grabu wan sma sani teki dan a lon,

mofinafasi o kon na yu tapu,

leki wan fufuruman nanga fetisani ini en anu.

₁₂Wan sma di e go lontu e ferteri lei,

na wan sma di no bun fu noti,

na wan takru sma.

₁₃A e pingipingi en ai,

wrifiwrifi en futu,

èn sori nanga en finga.

₁₄En ati furu nanga bedrigi fasi,

a e sidon prakseri nomo fa a o du ogri

èn a e meki sma pori nanga trawan.

₁₅Dat' meki, wantronso, bigi ogri e miti en,

gawgaw a e de fu dede,

sondro fu a kon betre baka.

₁₆Siksi sani de di MASRA no lobi srefsrefi,

fu taki leti, seibi de leki wan trutru groskin sani gi En:

₁₇sma nanga heimemre, sma di e lei,

sma di e meki brudu lon fu soso,

₁₈sma di e sidon prakseri fu du ogri,

sma di gaw fu du ogri,

₁₉sma di e lei gi trawan fesi krutubakra,

nanga sma di e tyari prati mindri famiri.

₂₀Mi boi, kibri den rai di yu p'pa e gi yu,

no poti den sani na wan sei di yu m'ma e leri yu.

₂₁Tan memre den,

weri den leki wan keti na yu neki.

₂₂Meki den sori yu a pasi di yu mus waka,

meki den hori wakti gi yu te yu e sribi,

meki den gi yu rai te yu de na ai.

₂₃Bika den rai de leki wan lampu,

den sani di yu leri sa de leki wan leti gi yu.

Den warskow fu a fasi fa yu mus libi,

sa sori yu fa yu mus libi.

₂₄Den o kibri yu gi wan takru uma,

nanga gi den switi wortu fu a uma fu wan tra man.

₂₅No angri fu en fu di a moi so,

no meki a kori yu nanga den moi ai di a e meki.

₂₆Bika gi wan motyo yu no e pai moro leki wan brede,

ma gi wan uma di abi en masra yu kan pai nanga yu libi.

₂₇Efu yu leti faya ini yu saka,

yu heri krosi o teki faya.

₂₈Efu yu waka tapu faya krofaya,

yu futu o bron.

₂₉Na dati o psa nanga a sma di go na bedi nanga a uma fu wan tra man.

Yu no kan fasi a uma sondro fu yu kisi yu strafu.

₃₀Efu wan fufuruman fufuru wan sani fu di angri ben e kiri en,

dan sma no e si dati leki wan ogri sani.

₃₁Efu den kisi en, a mus gi seibi tron so furu baka fu san a ben teki,

awinsi a abi fu seri ala san a abi.

₃₂Ma wan man di e huru no abi ferstan,

a sma di e du a sani dati e broko ensrefi saka.

₃₃A o kisi fonfon nanga syen,

wan syen di e tan fu têgo.

₃₄Bika dyarusu e meki wan man kisi hebi atibron,

a no abi sari-ati te a e pai a tra man baka.

₃₅A no o teki a pai di yu mus gi en fu a ogri di yu du,

a no e teki noti awinsi o bigi a sani de.

₁Mi boi, tan prakseri den sani di mi e taigi yu,

èn kibri den rai di mi e gi yu.

₂Kibri den rai di mi e gi yu,

dan yu o libi langa.

Si den sani di mi e leri yu leki den moro diri sani di yu abi.

₃Weri den leki wan linga na yu finga,

tan memre den.

₄Taigi koni taki: “Yu na mi sisa”,

èn kari ferstan yu bun mati.

₅Den o kibri yu gi a uma fu wan tra man,

di wani kori yu nanga switi wortu.

₆Bika wan leisi mi ben tnapu na mi fensre,

mi ben e luku go na dorosei.

₇Mi ben si wan grupu yongu sma di no sabi furu.

Dan mi si wan yonkuman na den mindri di no ben abi ferstan srefsrefi.

₈A ben e waka ini a strati, krosbei fu a uku,

a ben e go na a sei fu a oso pe a uma e libi.

₉A ben de mofoneti, a son ben saka gwe kba,

neti ben e fadon, a ben e kon dungru kba.

₁₀Luku, a uma waka miti en,

a uma ben weri leki wan motyo,

a ben poti na en ede kba san a ben o du.

₁₁A opruru, a e du san a firi fu du,

èn a no e tan na oso.

₁₂Efu a no de na strati, dan a de na wowoyo,

ala uku a e tnapu e luru.

₁₃Dan a brasa a boi hori, èn a bosi en,

a luku en ini en ai dan a taigi en taki:

₁₄“Mi ben mus tyari wan freide-ofrandi,

èn mi tyari en tide.

₁₅Na dati meki mi kmopo na oso, fu ben kan miti yu,

mi ben luku fu yu èn mi feni yu.

₁₆Mi bradi krosi na tapu mi bedi kba,

linnen krosi fu Egipte nanga furu kloru.

₁₇Mi dropu switismeri tapu mi bedi,

mirre, aloe nanga kaneri.

₁₈Kon nanga mi, meki wi lasi un ede,

èn meki lobi te leki mamanten.

₁₉Bika a man nanga san mi e libi no de na oso,

a go na wan fara presi.

₂₀A tyari furu moni gwe nanga en,

baka tu wiki fosi a o kon baka.”

₂₁Na so a kisi a yonkuman nanga den sani di a taigi en,

a kori en nanga den switi wortu fu en.

₂₂Sondro fu prakseri a yonkuman go na en baka,

leki wan kaw di den e tyari go srakti,

leki wan man sondro ferstan di den bui fu tyari gwe,

₂₃te leki wan peiri boro en niri.

A de leki wan fowru di e frei go fasi ini wan net,

sondro fu a ferstan taki a o lasi en libi.

₂₄We dan, un boi, un mus arki mi,

un kaka un yesi gi den sani di mi e taigi unu.

₂₅Un no meki a kori unu fu un teki na en baka,

no go na en pasi.

₂₆Bika furu sma a gi mankeri kba,

den wan di a kiri no de fu teri.

₂₇A oso fu en na a pasi fu go na dedekondre,

drape yu e saka go ini den kamra fu dede.