Bruya ini Yerusalem
1Fu tru, yere, Masra, MASRA fu ala sani,
sa puru fu Yerusalem nanga Yuda
ala sani nanga ala sma tapu san den e fertrow:
nyanyan, watra,
2den dyadya fetiman, den srudati,
den krutubakra, den profeiti,
den lukuman, den fesiman,
3den ofisiri, den heihei man, den raiman,
den bonuman nanga den tofruman,
di sabi du den wroko fin'fini.
4Dan Mi o meki pikin boi tron den tiriman,
nyunyun pikin sa tiri den.
5Dan den sma fu a folku o bigin pina makandra,
a wan man sa pina a tra man,
a wan sma sa pina a tra sma,
yongu boi sa libi grofu nanga owrusma,
èn sma di no de not'noti sa du a srefi sani
nanga sma di fiti fu kisi lespeki.
6Dan wan man sa grabu en brada hori ini a oso fu den
èn taigi en taki:
“Yu abi wan langa dyakti ete, tron wi fesiman
èn tyari wan kba kon na a bruya disi.”
7Ma a dati sa piki en taki:
“Mi no o man de a dresiman fu unu,
mi no abi nyanyan noso langa dyakti ini mi oso tu,
yu no kan poti mi leki fesiman fu a pipel.”
8Bika Yerusalem misi futu, Yuda fadon,
bika nanga den taki èn nanga den du den e kaka den futu gi MASRA,
èn den e afrontu a glori fu En.
9Den lobi fu teki a sei fu sma te krutu e koti,
ma dati de leki wan ketoigi di no de na den sei.
Sondro syen den e prodo nanga den sondu fu den, leki Sodom.
Ma a kba gi den,
bika na densrefi den e du ogri.
10Taki fu a sma di bun ini Gado ai taki:
A sa go bun nanga en
a sa nyan den froktu fu den sani di a du.
11Ma den ogri-ati sma mus luku bun,
a no o go bun nanga den,
den o kisi strafu fu den sani di den e du.
12Pikin sa meki a libi tranga gi Mi folku,
èn umasma sa tiri den.
Pipel fu Mi, den edeman fu unu e kori unu,
den e tyari unu tapu a kruktu pasi.
13MASRA teki En presi fu koti krutu,
A tnapu klar'klari fu leisi strafu gi folku.
14Na fu a sani disi MASRA tyari den fesiman
nanga den tiriman fu a folku go na krutu:
Na unu, iya na unu pori a droifidyari,
èn den sani di sma fufuru fu den mofinawan
de fu feni ini den oso fu unu.
15Fa un kan prefuru fu trapu Mi pipel
èn fu waka so abra den mofinawan?
Na so Masra, MASRA fu ala sani, taki.
Wan warskow gi den uma fu Yerusalem
16MASRA tak' moro fara: den umasma fu Sion abi bigifasi. Den e kaka den borsu te den e waka, èn den e freiri nanga den ai. Den e meki den gowtu sani di den e weri na den futu meki babari te den e waka a moi waka fu den. 17Fu dat'ede MASRA sa meki den kisi kraskrasi na den ede èn poti den syenpresi na doro. 18A ten dati MASRA sa puru ala den sani nanga san den e prodo: den keti di den e weri na den futu, den banti di den e weri na den fes'ede, den gowtu munkenki, 19den langa yesilinga, den braselet, den duku nanga san den tapu den fesi, 20den duku nanga san den e tai den ede, den futuketi, den banti nanga san den e tai den krosi, den batra nanga switismeri, den leilei di den e poti na den skin, 21den fingalinga, den linga di den e weri na den noso, 22den moi langa dorokrosi fu den, den langa dyakti, den duku di den e weri na tapu den skowru, den tas, 23den doi krosi nanga den linnen krosi di den e weri, den moi banti di den e tai lontu den ede, nanga den duku di den e weri lontu den neki. 24Dan wan tingi smeri o de prefu a switismeri fu den, wan titei prefu a banti nanga san den e tai den krosi, pir'ede prefu moi frekti wiwiri, lowkrosi prefu moi langa krosi èn wan bron marki o pori ala a moi fu den.
25Deigri sa kiri den mansma fu yu, Yerusalem,
den dyadya fetiman fu yu sa dede ini a feti.
26Den bigi doro fu a foto sa sari èn den sa low,
èn Yerusalem o saka sidon na gron,
leki wan uma di lasi ala sani.
