Dag 298 van 365- Jeremia 6-8 en 1 Timoteüs 5

₁MASRA taki nanga Yeremia, A taigi en taki: ₂“Go tnapu na a doro fu a oso fu MASRA. Preiki a boskopu disi taki: Pipel fu Yuda, un di e waka na den doro disi fu go anbegi MASRA. Un arki a boskopu fu MASRA: ₃Na disi MASRA fu ala sani, a Gado fu Israel, e taki: Un libi wan moro betre libi, dan Mi o meki un tan libi ini a kondre disi. ₄Un no kori unsrefi nanga a sani di un e taki tak': ‘Na a oso fu MASRA de dyaso, na a oso fu MASRA de dyaso, na a oso fu MASRA de dyaso.’ ₅Nono, ma na libi un mus libi na tapu wan moro betre fasi, na libi un mus libi bun nanga unsrefi. ₆Un mus tapu fu pina den doroseisma, den pikin di no abi p'pa nanga m'ma moro, nanga den uma di masra dede kba. Un mus tapu fu kiri sma di no du noti dyaso ini a kondre. Un mus tapu tu fu anbegi tra gado, bika dati o meki un broko un neki. ₇Efu un du san Mi taki, Mi o meki un tan libi ini a kondre disi di Mi ben gi den afo fu unu fu têgo. ₈Yere, un e fertrow tapu den wortu nanga san un e kori unsrefi, ma dati no o yepi unu. ₉Un e fufuru, un e kiri, un e huru, un e sweri aladi na lei un e lei. Un e bron wierook gi Baal èn un e waka baka tra gado di un no ben sabi bifo. ₁₀Dan un abi a dek'ati, aladi un e du den groskin sani dati, fu kon na Mi fesi ini a oso disi, a oso di ben meki fu Mi ede, èn taki: Noti kan miti unu. ₁₁Un no mus si a oso disi, a oso di ben meki fu Mi ede, leki wan presi pe un kan kon kibri un ede baka te un du un ogri. Un yere, Mi e si heri bun san un e du, na so MASRA taki.

₁₂Un go na Silo go luku, a fosi presi pe Mi meki sma anbegi Mi, dan un o si san Mi du nanga a presi dati, fu den sondu di Mi pipel Israel du. ₁₃We dan, Mi taki dorodoro nanga unu, MASRA e taki, ma un no arki, Mi kari un, ma un no piki, èn un e tan du den sortu sani dati. ₁₄Dat' meki Mi o du nanga a oso disi, a oso di ben meki fu Mi ede, a oso tapu san un poti un fertrow, a srefi sani san Mi du nanga Silo. Mi o du a srefi sani tu nanga a kondre disi di Mi ben gi na den afo fu unu nanga na unu. ₁₅Èn Mi o puru unu na Mi fesi, leki fa Mi ben puru den famiri fu unu, a pipel fu Israel, na Mi fesi.

₁₆Yeremia, arki Mi. No begi moro gi a pipel disi. No krei èn no begi Mi moro gi den. No meki muiti fu taki moro gi den, bika Mi no o arki yu. ₁₇Na si yu no e si san den e du ini den foto fu Yuda nanga na tapu den strati fu Yerusalem? ₁₈Den pikin e piki a udu, den papa e leti a faya èn den uma e masi a blon fu meki kuku leki wan ofrandi gi a gado fu den di den e kari: a Uma di de kownu na heimel. Den e kanti win leki ofrandi gi tra gado fu du Mi wan hati sani. ₁₉Ma a no Mi den e du wan hati sani, na so MASRA taki. Na densrefi den e du, na densrefi den e gi syen. ₂₀Dat' meki na disi Masra MASRA e taki: Yere, a faya atibron fu Mi e kon bogobogo abra a presi disi. A e kon tapu libisma nanga meti, a e kon tapu den bon ini a wei nanga tapu ala san prani. A atibron fu Mi o de leki faya di no wan sma man kiri.

₂₁Na disi MASRA fu ala sani, a Gado fu Israel, e taki: unsrefi kan nyan den meti di un bron leki ofrandi gi Mi nanga den meti di un e srakti leki ofrandi gi Mi. ₂₂Bika di Mi puru den afo fu unu na Egipte Mi no taki noti nanga den noso komanderi den fa den mus bron ofrandi noso srakti meti leki ofrandi gi Mi. ₂₃San Mi ben komanderi den na disi: ‘Un arki san Mi e taigi unu, dan Mi sa de a Gado fu unu èn unu sa de a folku fu Mi. Un libi leki fa Mi e sori unu, dan A sa go bun nanga unu.’ ₂₄Ma den no arki, den no du san Mi taigi den. Ma den du san a takru ati fu den ben gi den fu du. Prefu den waka na Mi baka, den drai gwe fu Mi. ₂₅Sensi a dei di den afo fu unu ben hari kmopo ini Egipte, te kon miti a dei fu tide, Mi seni den knekti fu Mi, den profeiti, dorodoro kon na unu. ₂₆Ma no wan sma arki Mi, no wan sma du san Mi taki. Èn unu, den yesi fu unu tranga moro di fu den afo fu unu.

₂₇Yeremia, awinsi yu taigi den ala den sani disi den no o arki yu èn awinsi yu o kari den, den no o piki. ₂₈Dan yu mus taigi den taki: Un na wan folku di no wani arki san MASRA, a Gado fu unu, e taki, noso te A e sori un tapu un fowtu. No wan wortu di e kmopo ini un mofo de fu fertrow moro.

₃₀Den sma fu Yuda du sani di no bun ini Mi ai, na so MASRA taki. Den doti a oso di ben meki fu Mi ede, fu di den poti den groskin sani fu den na ini. ₃₁Ini a Hinomdal den bow a altari Tofet. Den bow en fu bron den manpikin nanga umapikin fu den leki ofrandi. Ma a no Mi komanderi den fu den du a sani dati, noiti so wan sani kon ini Mi prakseri fu meki den du. ₃₂Dat' meki yere, den dei e kon, na so MASRA taki, dati sma no sa kari drape Tofet moro noso Hinomdal, ma sma o kari en: Dal pe den e kiri sma ogri-ati fasi. Sma o beri dede drape te leki presi no de moro. ₃₃Dan fowru di e frei na loktu nanga krasimeti o nyan den dedeskin fu a pipel disi, èn sma no o yagi den. ₃₄Mi o meki sma tapu fu singi prisiri singi ini den foto fu Yuda nanga tapu den strati fu Yerusalem. Trowman nanga trowmisi no o singi èn prisiri moro, bika a kondre tron wan broko pranasi.

₁A ten dati, na so MASRA taki, a feyanti sa puru den bonyo fu den kownu fu Yuda na ini den grebi, owktu di fu den man di ben e yepi tiri a kondre, di fu den priester, di fu den profeiti nanga di fu den sma fu Yerusalem. ₂Dan den o bradi den gi a son, gi a mun nanga gi ala den stari na heimel. Na den sani dati den ben lobi èn na den den ben dini. Na den baka den ben waka, na den den ben suku rai èn na gi den den ben boigi. Sma no o tyari den bonyo kon na wan baka fu beri den. Den o tan didon tapu den pranigron leki mest. ₃Èn den wan di o tan na libi fu a ogri-ati pipel disi, den di Mi o panya go na difrenti kondre, den o angri fu dede moro leki fu tan na libi, Na so MASRA fu ala sani, e taki.

₁Yu no mus taki grofu nanga wan owru man. Efu yu mus pir'ai gi en, du en leki en na yu eigi p'pa. Taki nanga den yongu man leki den na brada fu yu, ₂nanga den moro owru uma leki den na yu eigi m'ma, èn nanga den yongu uma leki den na yu eigi s'sa, sondro fu abi tra prakseri.

₃A gemeente mus sorgu gi den uma di masra dede kba, efu den no abi no wan tra sma fu sorgu gi den. ₄Ma efu wan uma di masra dede kba abi pikin noso granpikin, dan den dati mus leri na a fosi presi fu du san Gado wani ini den eigi famiri. Den mus sorgu gi den bigisma fu den, fu san den bigisma ben du gi den na fesi, bika Gado lobi a sani disi. ₅Wan uma di masra dede kba èn di trutru no abi no wan sma fu sorgu en, e luku na Gado fu sorgu en. Dei nanga neti a e tan begi fu Gado yepi en. ₆Ma efu a e libi fu meki soso prisiri, dan a dede kba aladi a e libi ete. ₇Yu mus komanderi den sma den sani disi, fu den uma di masra dede kba, no kisi pori nen. ₈Ma efu wan sma no e sorgu gi en famiri, spesrutu gi en ososma, a no e hori ensrefi na a bribi èn a ogri moro wan sma di no drai libi.

₉Wan uma di masra dede kba mus abi siksitenti yari fosi yu skrifi en nen leki wan sma di mus kisi yepi. A mus de so tu taki a no ben e waka gi en masra. ₁₀Sma mus sabi en leki wan uma di ben e du bun. Sobun den mus man taki tak' a ben kweki den pikin fu en bun èn tak' en doro ben opo gi ala sma. Moro fara taki a ben dini den sma fu Gado nanga sakafasi èn taki a ben yepi sma di ben de na nowtu. Sobun a ben de klar'klari fu du ala sortu bun wroko. ₁₁Ma yu no mus skrifi den nen fu den yongu uma di masra dede kba leki sma di mus kisi yepi. Bika baka wan pisten den o wani trow baka, bika a angri fu de nanga wan masra o kon bigi moro leki a angri fu dini Kristus. ₁₂Na so sma o taki na den tapu fu di den no hori densrefi na a pramisi san den ben meki fosi. ₁₃Boiti dati, fu di den no abi noti fu du, den o kon lobi fu waka oso fu oso. Ma dati a no ala, den o taki sma sani, den o diki ini sma tori, èn den o taki sani di no fiti. ₁₄Dat' meki mi wani taki den yongu uma di masra dede kba, mus trow baka. Den mus kisi pikin èn den mus sorgu bun gi den oso. Na so den sma di e feti wi, no o kisi a okasi fu taki ogri fu wi. ₁₅Bika wantu fu den kmopo fu a bun pasi kba e du san Satan wani.

₁₆Efu wan uma di de wan bribisma abi famiri di masra dede kba, a mus sorgu gi den. A no mus libi a sorgu gi a gemeente. Dan a gemeente sa man sorgu gi den uma di trutru no abi no wan sma fu sorgu den.

₁₇A gemeente mus lespeki èn sorgu den fesiman di e du den wroko bun, spesrutu den wan di e preiki èn di e gi leri. ₁₈Bika a Santa Buku e taki: “Yu no mus tai a mofo fu wan kaw san e masi a graan fu puru a buba.” A taki moro fara taki: “A fiti fu wan wrokoman kisi en pai.” ₁₉Efu wan sma tyari wan kragi kon fu wan fesiman fu a gemeente, yu no mus teki en solanga tu noso dri kotoigi taki tak' a de so. ₂₀Efu wan fu den e sondu, yu mus warskow en na fesi a gemeente, fu den trawan sa frede fu sondu. ₂₁Na fesi Gado nanga Kristus Yesus nanga den santa engel, mi e taigi yu krin taki yu mus fu du den sani disi san mi taki. Yu no mus abi a prakseri na fesi kba taki wan sma fowtu, èn no teki a sei fu no wan sma. ₂₂Yu no mus gaw fu poti yu anu tapu wan sma. Yu no mus teki prati ini a sondu fu tra sma. Hori yusrefi krin. ₂₃Yu mus dringi pikinso win gi yu bere nanga den siki di e trobi yu ala yuru. No dringi soso watra. ₂₄Nownow kba den sondu fu son sma de krin fu si bifo den kisi den strafu srefi. Ma den sondu fu trawan o kon na krin bakaten. ₂₅Na a srefi te wan sma e du bun. A de krin fu si gi ala sma. Èn awinsi a no de fu si ete, wan dei a o kon na krin.