Dag 9 van 365- Genesis 23-24 en Matteüs 7

₁Sara libi wan hondro tutenti-na-seibi yari. ₂A dede ini Kanaan, na ini a foto Kiryat-Arba, di den e kari Hebron tu. Dan Abraham row èn a krei fu a dede fu Sara. ₃Baka dati a opo fu pe a dedeskin ben de, dan a go na den Hetitisma. A taigi den taki: ₄“Mi na wan doroseisma na un mindri, di no abi wan pisi gron fu ensrefi dyaso. Un gi mi wan pisi gron fu misrefi, pe mi kan tyari a dedeskin go beri.” ₅Ne den Hetitisma pikin en taki: ₆“Masra, arki wi. Yu na wan edeman na wi mindri di Gado srefi poti. Yu kan kisi a moro moi grebi fu wi fu beri yu dede. No wan fu wi o hori yu, fu yu no beri yu dede na ini en grebi.” ₇Dan Abraham opo, a boigi gi den Hetitisma disi, di ben abi a gron, dan a taigi den taki: ₈“Efu un no abi trobi fu mi beri a dedeskin, dan mi e begi unu fu un arki mi. Un aksi Efron, a manpikin fu Sogar, tangitangi ₉fu a seri a bergi-olo fu Makpela gi mi, di didon na a kba fu a gron fu en. Na en abi en, èn mi wani fu pai en awinsi san a aksi mi dyaso na un fesi, fu mi kan abi wan eigi presi fu beri tu.” ₁₀Efron srefi ben sidon tu na mindri den tra Hetitiman. Ne a piki Abraham meki ala den Hetitisma di ben drape na a bigi doro fu a foto yere. A taki: ₁₁“Nono, Masra. Arki. Mi no o gi yu a bergi-olo wawan ma mi o gi yu a gron tu. Mi e gi den na yu, dyaso na fesi den kondreman fu mi. Yu kan tyari a dedeskin go beri.” ₁₂Dan Abraham boigi gi den man fu a kondre. ₁₃Ne a piki Efron meki ala den kondreman fu en yere taki: “Efu trutru yu wan du mi wan bun, dan yu mus arki mi. Mi wani pai yu fu a heri gron. Teki a moni san mi wani gi yu, dan mi kan tyari a dedeskin go beri drape.” ₁₄Efron piki Abraham taki: ₁₅“Masra, mi e begi, arki mi. San na wan pisi gron fu fo hondro solfrumoni gi mi nanga yu? Yu kan tyari a dedeskin go beri.” ₁₆Abraham arki san Efron taigi en. A wegi a moni di Efron taigi en na fesi den kondreman fu en dan a gi en a moni. Fo hondro solfru moni. A moni wegi na a fasi fa den ben e wegi moni a ten dati. ₁₇Na so a gron fu Efron di ben de ini Makpela na abrasei fu Mamre, a gron nanga a bergi-olo di ben drape, nanga ala bon di ben tnapu tapu a gron, ₁₈kon de fu Abraham. A kisi den na fesi fu ala den Hetitisma di ben drape na a bigi doro fu a foto. ₁₉Dan Abraham beri en frow Sara na ini a bergi-olo di ben de na a gron fu Makpela, abrasei fu Mamre, di den e kari Hebron na ini Kanaan tu. ₂₀Na so Abraham kon kisi a gron nanga a bergi-olo drape di ben de fu den Hetitisma. A tron a eigi berpe fu Abraham nanga en famiri.

₁Abraham ben kon grani srefsrefi kba èn MASRA ben blesi en ala fasi. ₂Dan Abraham taigi a moro owru knekti fu en, di ben e sorgu gi ala sani di a ben abi, taki: “Poti yu anu ondro mi bowtu, ₃dan yu e sweri gi mi na MASRA, a Gado fu heimel nanga grontapu, taki yu no sa teki wan uma gi mi manpikin dyaso na mindri den Kananitisma, pe mi e libi. ₄Ma yu mus go na mi famiri ini a kondre pe mi gebore. Drape yu mus go teki wan frow gi mi manpikin Isak.” ₅A knekti taigi Abraham taki: “Kande a frow no o wani kon nanga mi na a kondre disi. Yu wani dan taki mi tyari yu manpikin go na a kondre pe yu ben kmoto kon?” ₆Ne Abraham piki en taki: “Mi e warskow yu fu yu no tyari mi manpikin go drape. ₇MASRA, a Gado fu heimel, puru mi mindri den ososma fu mi nanga ini a kondre pe den famiri fu mi e tan. A sweri gi mi taki: ‘Mi o gi den bakapikin fu yu a kondre disi.’ A sa seni en engel go na yu fesi èn yu sa teki wan frow fu drape gi mi manpikin. ₈Efu a frow no wan kon nanga yu, dan a sweri di yu meki gi mi e broko. Ma yu no mus tyari mi manpikin go drape.” ₉Dan a knekti poti en anu ondro Abraham bowtu èn a sweri taki a ben o du san en basi aksi en.

₁₀A teki tin kameel nanga ala sortu diri sani fu en basi, dan a hari go na a foto Aram-Naharaim pe Nakor, a brada fu Abraham, ben e libi. ₁₁Di a doro na a foto, a meki den kameel kindi na wan watrapeti dorosei fu a foto. A ben de mofoneti, a ten sa den umasma e kon fu peti watra. ₁₂Ne a knekti begi taki: “MASRA, Gado fu mi basi Abraham, sori mi basi Abraham sari-ati èn meki sani waka bun gi mi. ₁₃Luku, mi tnapu dyaso na a watrapeti pe den umapikin fu a foto o kon fu peti watra. ₁₄Meki a de so taki mi sa aksi wan umapikin taki: ‘Langa yu kroiki gi mi fu mi dringi pikinso watra.’ Efu na a umapikin dati yu ben teki gi yu knekti Isak, dan meki a piki taki: ‘Yu kan dringi èn mi sa gi den kameel fu yu fu dringi tu.’ Dan so mi sa sabi taki yu sori mi basi sari-ati.”

₁₅A no ben kba taki srefi ete, di a si Rebeka e waka kon nanga en kroiki tapu en skowru. Rebeka ben de a umapikin fu Betuel. Betuel ben de a manpikin fu Milka nanga Nakor, a brada fu Abraham. ₁₆Rebeka ben de wan trutru moi pikin. A ben de wan yongu uma, di no ben sribi nanga wan man ete. A saka go na a peti, a furu en kroiki, dan a kren kon baka na loktu. ₁₇Dan a knekti waka miti en. A aksi en taki: “Mi e begi yu, meki mi dringi pikinso watra fu yu kroiki.” ₁₈Ne Rebeka piki taki: “Yu kan dringi masra.” Dan a saka a kroiki es'esi fu en skowru fu meki a knekti dringi. ₁₉Di a dringi nofo, Rebeka taigi en taki: “Mi sa go teki moro watra na a peti, fu den kameel dringi tu te a sari den.” ₂₀A kanti a kroiki es'esi leigi ini a watrabaki, dan a drai go baka na a peti fu go teki watra gi den kameel, te leki den ben dringi nofo. ₂₁A man ben e tan luku en sondro fu taki wan sani. A ben wan sabi efu MASRA ben meki sani waka bun gi en. ₂₂Di den kameel ben dringi nofo, a man puru wan nosolinga fu sowan siksi gran gowtu nanga tu bui fu sowan siksitenti gran gowtu kon na doro. ₂₃Dan a taki: “Taigi mi, suma na yu p'pa? Mi nanga den man fu mi o man psa a neti na yu p'pa oso?” ₂₄Rebeka piki taki: “Mi na a pikin fu Betuel, a manpikin fu Milka nanga Nakor.” ₂₅Rebeka taigi en moro fara taki: “Nofo grasi nanga nyanyan de gi den meti èn nofo presi de fu un psa a neti.” ₂₆Dan a man kindi èn a anbegi MASRA. ₂₇A taki: “Mi e blesi MASRA, a Gado fu mi basi Abraham. Yu tan sori mi basi sari-ati èn taki a kan fertrow na yu tapu. Èn mi fu mi sei, Yu tyari mi langalanga kon na a oso fu mi basi famiri.” ₂₈Dan a pikin lon go es'esi na en m'ma oso, go ferteri san psa.

₂₉Ne Laban, a brada fu Rebeka, libi a foto wantron, dan a lon go na a man na a peti. ₃₀Bika di a si a linga nanga den bui na a anu fu en sisa, èn di a yere san en sisa Rebeka taki, a opo go na a man di ben tnapu na den kameel na a peti. ₃₁Ne a taigi en taki: “Kon nanga mi. A blesi fu MASRA de na yu tapu. Fu sanede yu tnapu dyaso na dorosei? Ala sani seti kba na oso èn presi de gi den kameel.” ₃₂Ne a man go nanga en na oso. Den puru den lai di den kameel ben e tyari, dan den poti grasi nanga nyanyan gi den. Den tyari watra tu fu wasi den futu fu a man nanga den knekti fu en. ₃₃Ma di den poti nyanyan gi en, a man taki: “Nono, mi no o nyan fosi mi taki san tyari mi kon dyaso.” Ne Laban taigi en taki: “Taigi unu san yu abi fu taki.” ₃₄A man taki: “Mi na a knekti fu Abraham. ₃₅MASRA blesi a basi fu mi èn a kon gudu. A abi skapu, krabita nanga kaw, solfru nanga gowtu, uma nanga mansrafu, kameel nanga buriki. ₃₆Sara, a frow fu mi basi, meki wan manpikin gi, en aladi a ben kon owru kba. So mi basi gi ala sani di a abi na a boi disi. ₃₇Dan mi basi meki mi sweri taki: ‘Yu no sa teki wan uma gi mi manpikin dyaso na mindri den Kananitisma, pe mi e libi. ₃₈Yu mus go pe mi p'pa ben e libi. Yu mus go na mi eigi famiri, go teki wan frow gi mi manpikin.’ ₃₉Ma dan mi taigi en taki: Kande a frow no o wani kon nanga mi. ₄₀A piki mi taki: ‘Mi libi gi MASRA leki fa en ben wani taki mi mus libi. A sa seni en engel go nanga yu. A sa meki sani waka bun gi yu, fu yu feni wan frow gi mi manpikin na mi famiri, na den eigi sma fu mi. ₄₁Soso te yu go na den famiri fu mi èn den no wani meki a frow gwe nanga yu, dan sofasi wawan a sweri di yu meki sa broko.’ ₄₂Di mi doro tide na a watrapeti, mi taki: MASRA, Gado fu mi basi Abraham, meki sani waka bun gi mi. ₄₃Luku, mi tnapu na a watrapeti. Meki a de so, taki mi sa aksi wan yongu umapikin di kon fu kon peti watra, taki: Meki mi dringi pikinso watra fu yu kroiki. ₄₄Efu na a umapikin di yu, MASRA, teki gi a manpikin fu mi basi, dan meki a piki taki: ‘Yu kan dringi èn mi sa gi den kameel fu yu fu dringi tu.’ ₄₅Mi no ben kba taki wan bun fasi srefi ete di mi si Rebeka e kon nanga en kroiki tapu en skowru. A saka go na a peti dan a kisi watra. Ne mi aksi en taki: ‘Meki mi dringi pikinso.’ ₄₆A saka en kroiki es'esi dan a taigi mi taki: ‘Yu kan dringi èn mi sa gi den kameel fu yu fu dringi tu.’ Ne mi dringi èn a gi den kameel fu dringi tu. ₄₇Baka dati mi aksi en taki: ‘Taigi mi, suma na yu p'pa?’ A piki taki: ‘Mi na a pikin fu Betuel, a manpikin fu Milka nanga Nakor.’ Ne mi weri wan linga gi en na en noso nanga den bui na en anu. ₄₈Dan mi kindi fu anbegi MASRA. Mi blesi MASRA, a Gado fu mi basi Abraham, di tyari mi tapu a yoisti pasi fu mi ben kan teki a umapikin fu mi basi en brada leki frow gi en manpikin.” ₄₉A knekti taigi den moro fara taki: “Meki mi sabi efu un wan sori mi basi sari-ati èn taki a kan fertrow na un tapu. Efu a no de so, dan un taigi mi tu, fu mi sabi san mi mus du.” ₅₀Ne Laban nanga Betuel piki taki: “Wi no abi noti fu taki. Na MASRA meki ala den sani disi psa. ₅₁Luku Rebeka dyaso, teki en tyari go fu a tron a wefi fu a manpikin fu yu basi, leki fa MASRA taki.” ₅₂Di a knekti fu Abraham yere san den taki, a boigi dan a taki MASRA tangi. ₅₃Baka dati a puru solfru nanga gowtu sani nanga krosi kon na doro, dan a gi Rebeka. A gi a brada fu Rebeka nanga en m'ma diri kado tu. ₅₄Dan en nanga den man fu en nyan, èn den psa a neti drape.

Di a opo a tamara mamanten a taigi den taki: “Meki mi drai go baka now na mi basi.” ₅₅Ma Rebeka m'ma nanga en brada piki taki: “Meki a pikin tan ete wan tin dei so na unu. Baka dati a kan go.” ₅₆A knekti piki den baka taki: “Na MASRA ben meki taki sani waka bun gi mi. Un no meki mi draidrai moro langa, ma meki mi drai go baka na mi basi.” ₅₇Ne den taki: “Kon meki wi kari a pikin, dan wi aksi en sa a wani du.” ₅₈So den seni kari Rebeka, dan den aksi en taki: “Yu wani gwe nanga a man disi?” Rebeka piki: “Iya” ₅₉Dan den meki den sisa Rebeka nanga a uma di ben e sorgu gi en di a ben pikin, gwe nanga a knekti fu Abraham nanga den man fu en. ₆₀Den blesi en, dan den taigi en taki: “Sisa, wi e howpu taki yu sa tron m'ma fu so furu bakapikin, taki den no den fu teri èn taki den sa teki den foto fu de feyanti fu den abra.” ₆₁Dan Rebeka nanga den umaknekti di ben o gwe nanga en meki densrefi klari. Den kren sidon tapu den kameel dan den gwe nanga a man. Na so a knekti tyari Rebeka gwe.

₆₂A pisten dati Isak ben go tan ini a Negebsabana na a peti Lakai-Roi. ₆₃Wan mofoneti a ben e waka ini a gron e broko en ede nanga prakseri. Di a opo en ede a si wantu kameel e kon. ₆₄Di Rebeka si Isak a saka fu a kameel. ₆₅Dan a aksi a knekti taki: “Suma na a man di e waka ini a gron drape kon miti unu.” A knekti piki en taki: “Na mi basi.” Ne Rebeka tapu en fesi nanga wan krosi. ₆₆A knekti ferteri Isak fa ala sani ben waka. ₆₇Dan Isak teki Rebeka tyari go ini a tenti fu en m'ma Sara. Na so Rebeka tron a wefi fu Isak. Isak kon lobi Rebeka èn na so a feni trowstu baka a dede fu en m'ma.

₁“No krutu trawan, dan trawan no o krutu yu. ₂Bika tapu a srefi fasi fa yu e krutu trawan, den o krutu yu baka. Èn a srefi marki san yu e teki fu krutu trawan, den o teki fu krutu yu baka. ₃Fa yu kan si a fini pisi udu ini a ai fu yu brada, ma yu no e si a postu ini yu eigi ai? ₄Fa yu kan taigi yu brada taki: ‘Meki mi puru a fini pisi udu ini yu ai,’ aladi yu abi wan postu na ini yu eigi ai? ₅Yu hoigriman! Puru a postu ini yu eigi ai fosi, dan yu o man si krin fu kan puru a fini pisi udu ini a ai fu yu brada.

₆No gi dagu den santa sani fu Gado, bika den o drai kon priti yu. Èn no trowe parelkrara gi agu, bika na trapu nomo den o trapu den nanga den futu.”

₇“Begi, dan yu sa kisi. Suku, dan yu sa feni. Naki, dan doro sa opo gi yu. ₈Bika a sma di e begi, e kisi. A sma di e suku, e feni. Èn a sma di e naki, doro e opo gi en. ₉Suma sa gi en pikin wan ston, efu a pikin aksi en wan brede? ₁₀Noso wan sneki efu a aksi en wan fisi? ₁₁Efu yu leki sondusma, sabi fa fu gi yu pikin bun sani, fa fu yu P'pa na heimel dan? A sa gi moro bun sani na den sma di e aksi En fu dati. ₁₂Yu mus libi nanga trawan soleki fa yu wani taki trawan mus libi nanga yu. Bika na dati Moses nanga den profeiti ben leri unu.”

₁₃“Yu musu psa ini a smara doro. Bika a doro fu hel bigi èn a pasi fu en bradi. Furu sma e waka na en tapu. ₁₄Ma a doro pikin di e tyari yu go na a têgo libi, èn a pasi fu en smara. Wantu sma nomo e feni a pasi dati.”

₁₅“Yu mus luku bun nanga den sma di e du leki den na profeiti. Te den e kon na yu den e meki leki skapu, ma na inisei den de leki krasi tigri. ₁₆Ma yu kan sabi den na a fasi fa den e libi. Bika wan prasarabon no e gi droifi, èn wan makabon no e gi figa. ₁₇Wan bon di gesontu e gi bun froktu, ma wan bon di no gesontu no man gi bun froktu. ₁₈Wan bon di gesontu no man gi froktu di no bun, èn wan bon di no gesontu, no man gi bun froktu. ₁₉Ibri bon di no e gi bun froktu, den o kapu puru fringi go ini a faya. ₂₀Na so yu sa sabi den sma dati, na a fasi fa den e libi.”

₂₁“A no ala sma di e kari Mi: ‘Masra, Masra,’ sa kon na mindri den sma di Gado e tiri. Ma soso den sma di e du a wani fu Mi P'pa di de na heimel. ₂₂Tapu a dei di Gado o leisi strafu gi libisma, furu sma o taigi Mi taki: ‘Masra, Masra, a no ini Yu nen wi ben gi sma Yu boskopu? A no ini Yu nen wi ben yagi takruyeye puru na tapu sma? A no ini Yu nen, wi ben du furu bigi sani?’ ₂₃Ma Mi sa taigi den na ala sma fesi taki: Kmoto na Mi fesi, un takru-ati sma. Noiti Mi ben sabi unu!”

₂₄Yesus taigi den sma taki: “Ibri sma di yere san Mi taki, èn di e du so, sa de leki wan koniman di bow en oso tapu tranga gron. ₂₅Alen fadon, frudu kon, winti wai naki na a oso skin, ma a oso no fadon bika a ben bow tapu tranga gron. ₂₆Ma ala sma di yere Mi, ma den no e du san Mi taki, de leki wan donman di bow en oso tapu santi. ₂₇Di alen fadon, frudu kon, èn a winti wai naki na a oso skin, a oso fadon broko pis'pisi, èn noti fu en no tan.”

₂₈Di Yesus kba taki ala den sani disi, a bigi grupu sma no ben sabi san fu taki fu a leri fu En. ₂₉Bika A no ben e gi leri leki den sabiman fu Gado wèt, ma A ben e gi leri leki a sma di kon nanga a leri.