Ala folku sa tron sma fu Gado
1Na so MASRA taki:
Un tan du sani tapu wan leti fasi,
èn un libi leki fa a fiti.
Bika a ferlusu di Mi o tyari de klar'klari fu kon,
èn her' esi a o de fu si fa Mi e du sani nanga leti.
2A libisma di e du den sani dati,
di e hori tranga na den,
na wan blesi sma.
Sowan sma e hori a sabatdei, a no e pori en,
èn a no e du no wan ogri nanga en anu.
3A doroseisma di e dini MASRA now no mus prakseri taki:
“A no abi misi tak' MASRA o hori mi aparti fu a pipel fu En.”
Den eunuch no abi fu prakseri tu taki:
“Luku mi, mi na wan bon di drei gwe.”
4Bika disi MASRA e taki:
Den eunuch di e hori a sabatdei fu Mi,
den di e teki a besroiti fu du Mi wani,
èn di e hori densrefi na a ferbontu fu Mi,
5den man dati Mi e gi wan moro betre sani,
leki manpikin nanga umapikin.
Mi e gi den wan nen ini a oso fu Mi,
nanga wan marki na tapu den skotu fu en,
di o meki sma memre den.
Mi e gi den wan nen di o tan fu têgo,
wan nen di sma no o fergiti.
6Den doroseisma di e dini MASRA now,
di lobi a nen fu MASRA,
èn di tron knekti fu En,
iniwan fu den di e hori a sabatdei, di no e pori en,
èn di e hori tranga na a ferbontu fu Mi,
7na den Mi e tyari go tapu a santa bergi fu Mi.
Mi e gi den prisiri ini a oso fu Mi pe begi e begi.
Den meti di den e bron leki ofrandi gi Mi tapu a altari,
nanga den meti di den e srakti leki ofrandi gi Mi,
Mi o teki nanga prisiri.
Bika a oso fu Mi mus de wan begi oso gi ala folku.
8Na so Masra MASRA taki,
En di e tyari den Israelitisma kon na wan,
di feyanti ben tyari gwe nanga tranga:
Mi o tyari tra sma kon na wan,
makandra nanga den di kon na wan kba.
