14 juni - Spreuken 8:22-36

₂₂MASRA meki mi fosi ala sani,

di A ben bigin meki sani, A meki mi fosi.

₂₃A meki mi sensi na a bigin,

fosi wan sani ben meki,

fosi grontapu srefi ben meki.

₂₄Di mi gebore, se no ben de ete,

no wan watrabron nanga watra ben de ete.

₂₅Mi gebore di bergi no ben de na den presi ete,

di pikin bergi no ben de ete.

₂₆A ten dati grontapu nanga den wei no ben meki ete,

sosrefi a doti fu grontapu.

₂₇Di A ben e poti a heimel na en presi,

di A ben e poti pe a se nanga loktu ben o miti,

mi ben drape.

₂₈Di A ben e fasi den wolku poti na loktu,

èn di A ben e meki a watra pusu kon na loktu di ben o furu den se,

₂₉di A ben e poti o fara a se kan go,

èn komanderi a watra fu a no lon abra,

di A ben poti a fundamenti fu grontapu,

₃₀mi ben de na En leki wan pikin di A e korikori,

ibri dei baka A ben e prisiri srefsrefi nanga mi,

èn misrefi ben e prisiri nanga En ala ten.

₃₁Mi ben breiti nanga a grontapu fu En,

èn mi ben e prisiri nanga den libisma.

₃₂We dan, un boi, dat' meki un mus arki mi,

bika den sma di e libi leki fa mi wani,

na blesi sma.

₃₃Un arki den warskow fu mi,

fu un kan kon koni.

Un no si en leki noti.

₃₄A sma di e arki mi na wan blesi sma,

a sma di e tnapu ala dei na mi oso,

èn di e wakti na mi doro.

₃₅Bika a sma di feni mi, feni libi,

MASRA e sori en a bunfasi fu En.

₃₆Ma a sma di e tan libi en sondu libi,

sowan sma e gi ensrefi mankeri.

Ala sma di no lobi mi, lobi den dede.