16 januari - Spreuken 2:1-22

₁Mi boi, efu yu sa leri fu den sani di mi e taigi yu,

èn kibri den rai di mi e gi yu,

₂efu yu kaka yu yesi gi a koni fu mi,

èn meki ala muiti fu ferstan sani krin,

₃iya, efu yu sa aksi fu man ferstan sani,

kari trangatranga fu kisi wan krin ferstan,

₄efu yu sa suku en leki solfru,

noso leki fa sma e suku gudu,

₅dan yu o ferstan san a wani taki fu lespeki MASRA,

èn yu o leri sabi suma Gado de.

₆Bika na Gado e gi koni.

Den sani di A e taki e gi sabi nanga ferstan.

₇A e sorgu tak' den wan di e libi leki fa a fiti e feni yepi,

èn A e kibri den wan tapu san sma no man sori finga.

₈A e luku taki sani e du tapu wan leti fasi,

èn A e kibri den wan di e tan waka na En baka.

₉Dan yu o ferstan san a wani taki

fu du a wani fu Gado,

fu libi bun èn fu libi krin.

Ala ten yu o sabi a yoisti sani tu di yu mus du.

₁₀Bika yu o kon koni ini denki,

èn a sabi fu yu o gi yu prisiri.

₁₁Yu o sabi fu teki den yoisti besroiti,

koni o kibri yu,

₁₂fu yu no go du ogri.

A o kibri yu gi den man di e lei,

₁₃gi den man di gwe libi a leti pasi,

fu go waka wan takru pasi now,

₁₄gi den man di e prisiri te den e du ogri,

èn di e firi bun te den e kori sma.

₁₅Den e waka tapu kruktu pasi,

den kmoto fu a leti pasi.

₁₆A o kibri yu tu gi a uma fu wan tra man,

di wani kori yu nanga switi wortu.

₁₇A uma di gwe libi a trowmasra fu en,

a masra nanga san a ben trow yonguyongu,

èn di fergiti den pramisi di a ben meki fesi en Gado.

₁₈Efu yu e go na en oso, na yu dede yu e go teki.

A pasi fu en e tyari yu go na dedekondre.

₁₉No wan man di go na en, e drai kon baka,

den no e kmopo drape libilibi.

₂₀Dat' meki yu mus waka a pasi fu den bun sma,

èn tan libi leki den sma di bun ini Gado ai.

₂₁Bika na den sma di e libi leki fa a fiti o libi ini a kondre,

na den wan tapu san sma no man sori finga o tan na ini.

₂₂Ma Gado o wai den ogri-ati sma puru fu a kondre,

èn A o yagi den sma gwe di no tan waka na En baka.