17 oktober - Psalm 62

₂Fu tru, na Gado wawan a sili fu mi e feni bro,

na En e ferlusu mi.

₃Fu tru, na En na a Trangawan pe mi e kibri,

na En e ferlusu mi,

a tranga kibripresi fu mi,

mi no sa seki.

₄Olanga un o tan naki a wan sma nomo?

A de leki wan skotu di e kanti,

leki wan bergi di e broko fadon.

₅Fu tru, den e kruderi fu puru mi fu a hei presi fu mi,

den lobi ferteri lei fu mi,

den e blesi nanga den mofo,

ma den e fluku na den inisei. sela

₆Fu tru mi sili, suku bro na Gado,

bika na fu En mi e ferwakti ala sani.

₇Fu tru, na En na a Trangawan pe mi e kibri,

na En e ferlusu mi,

a tranga kibripresi fu mi,

mi no sa seki.

₈Na Gado e ferlusu mi, na En e gi mi grani,

a Trangawan pe mi e kibri,

na Gado na mi kibripresi.

₉Mi pipel, poti yu fertrow na En tapu, fu alaten,

loktu yu ati na En,

Gado na wi kibripresi. sela

₁₀Fu tru, libisma no de noti moro leki wan bro,

guduwan nanga pôtiwan no de noti moro leki wan lei,

te den go na tapu wan wegi, a wegi e opo den go na loktu,

makandra den lekti moro winti.

₁₁No teki sma sani nanga tranga,

no fufuru sma sani teki,

Awinsi yu e kon gudu moro nanga moro,

yu no mus bow tapu gudu.

₁₂Moro leki wan leisi mi yere Gado taki a sani disi:

“Na Gado abi ala krakti.”

₁₃Iya Masra, na Yu abi bigi lobi,

bika Yu e pai ibri sma fu den sani di a du.