18 januari - 1 Korintiërs 11:17-34

₁₇Fu a sani san mi o taigi un now, mi no kan prijse unu srefsrefi. Den konmakandra fu unu no e meki un kon moro bun, ma den e meki un kon moro ogri. ₁₈Na a fosi presi mi yere taki te un e kon makandra leki gemeente prati fasi e de na un mindri. Èn mi e bribi wan pisi fu a tori disi. ₁₉Bika prati fasi mus de na un mindri, fu wi kan si suma na den trutru bribiwan. ₂₀Te un kon makandra un no e kon fu nyan na a tafra fu Masra. ₂₁Bika te un e nyan, dan ala sma e teki a nyanyan san ensrefi tyari kon. Son sma e tan nanga angri, trawan e drungu. ₂₂Na oso un no abi pe un ben kan nyan dringi? Na lespeki un no abi gi a gemeente fu Gado? Un e meki den sma di no abi noti kisi syen. San mi mus taigi unu? Un wani fu mi prijse unu fu disi? Mi no man prijse unu srefsrefi fu a sani disi.

₂₃Bika na san mi ben kisi fu Masra, na dati mi gi unu baka, taki a neti di den seri Masra Yesus, A teki wan brede, ₂₄A taki tangi, A broko en, dan A taki: “Disi na Mi skin, san Mi e gi fu un ede. Un mus tan du a sani disi fu memre Mi.” ₂₅Di den kba nyan, A teki a kan leki fa A ben du nanga a brede, dan A taki: “A kan disi na a nyun ferbontu san o stampu nanga a brudu fu Mi. Ala leisi te un e dringi fu en, un mus du en fu memre Mi.” ₂₆Bika ala leisi te un e nyan a brede disi èn dringi fu a kan, un e taki fu a dede fu Masra te leki A drai kon baka.

₂₇Dat' meki sma di e nyan a brede noso dringi fu a kan fu Masra tapu wan fasi di no fiti, e du wan sondu nanga a skin nanga a brudu fu Masra. ₂₈Ibri sma mus ondrosuku ensrefi, fosi a nyan a brede èn dringi fu a kan. ₂₉Bika a sma di e nyan èn dringi sondro fu poti prakseri na tapu a skin fu Masra, e tyari wan strafu kon na en tapu te a e nyan èn dringi. ₃₀Dat' meki someni sma na un mindri swaki, trawan e sikisiki, èn bun furu dede kba. ₃₁Ma efu wi ben ondrosuku wisrefi, dan wi no ben o kon ondro a krutu fu Gado. ₃₂Ma te Masra e krutu wi, A e du dati fu leri wi fa un mus libi, fu di A no wani strafu wi makandra nanga den grontapusma. ₃₃Fu dat'ede mi brada nanga sisa, te un kon fu nyan nanga makandra, un mus wakti na tapu makandra. ₃₄Efu wan sma abi angri, meki a nyan na oso. Dan den konmakandra fu unu no sa tyari wan strafu kon na un tapu.

Te mi kon na unu, mi sa seti den tra sani san mus seti ete.