20 juli - Kolossenzen 1:24-2:5

₂₄Nownow mi breiti taki mi e nyan pina fu unu ede. Mi breiti tu tak' mi kan go doro fu nyan den pina san Kristus ben mus nyan ete gi En skin, dati na a gemeente. ₂₅Mi tron wan dinari fu a gemeente, fu di Gado fertrow mi fu du wan wroko fu yepi unu. Mi mus preiki a heri boskopu fu Gado gi unu. ₂₆A boskopu disi na a kibritori di no ben kon na krin gi no wan sma na ini ala den ten di psa. Ma now Gado meki a kon na krin gi den sma fu En. ₂₇Gado ben wani meki den kon sabi o bigi a switi fu a kibritori disi de, di e panya na mindri fu den sma di no de Dyu. A kibritori na taki Kristus e libi na ini wi, èn dati na wi howpu taki wi o teki prati ini a glori fu Gado. ₂₈Na fu Kristus wi e preiki. Nanga ala koni di wi abi wi e sori ibri sma tapu en fowtu, èn wi e gi den leri fu den sa de san den mus de na ini Kristus. ₂₉Na fu a sani disi mi e haswa ini hebi strei nanga a yepi fu Kristus di e wroko nanga En krakti na ini mi.

₁Bika mi feni en fanowdu fu un sabi o bigi a strei de san mi mus strei gi unu, gi den wan di de na Laodisea, nanga gi ala den trawan di noiti no si mi fesi. ₂Mi du dati fu gi den dek'ati èn fu tyari den kon na wan ini lobi, fu den sa kisi ala sabi nanga koni. Dan so den sa kon sabi Kristus, di de a kibritori fu Gado. ₃Na ini En ala den gudu fu koni nanga sabi kibri.

₄Mi e taigi unu a sani disi fu no wan sma no kon kori unu nanga moi wortu. ₅Bika awinsi mi srefi no drape, na ini mi prakseri mi de nanga unu. Èn mi breiti fu si taki ala sani e waka na unu soleki fa a musu, èn taki a bribi fu unu na ini Kristus tranga.