25 april - Psalm 102:19-29

₁₉Meki wan sma skrifi en poti

gi den wan di o kon na wi baka,

gi a folku di no gebore ete,

fu den kan prijse MASRA.

₂₀Bika A ben luku fu a santa presi fu En na loktu,

MASRA ben luku fu heimel kon na grontapu.

₂₁A yere den dyeme fu den strafuman,

A ferlusu den wan di ben de fu dede.

₂₂Dan den sa taki fu a nen fu MASRA ini Sion,

èn prijse En ini Yerusalem,

₂₃te den folku nanga den kondre kon na wan,

fu anbegi MASRA.

₂₄A broko a krakti fu mi aladi mi yongu ete,

a syatu a libi fu mi.

₂₅Mi begi taki: Mi Gado, no meki mi libi afu fu a libi fu mi nomo,

Yu di e libi fu têgo.

₂₆Na Yu ben poti grontapu tnapu, bun langa kba,

heimel na a wroko fu Yu anu.

₂₇Den sa psa gwe, ma Yu e tan.

Den sa kon owru, leki fa krosi e owru.

Yu o kenki den leki fa sma e kenki krosi,

den no o de fu si moro.

₂₈Ma Yu e tan a srefi,

wan kba no e kon na den yari fu Yu.

₂₉Den pikin fu den knekti fu Yu sa libi dyaso

sondro fu ogri miti den,

den pikin fu den srefi Yu o kibri.