1Agripa taigi Paulus taki: “Yu abi a okasi now fu sori taki yu no fowtu.”
Ne Paulus opo en anu dan a taki: 2“Kownu Agripa, mi breiti taki mi kan tnapu tide na yu fesi fu sori taki no wan fu den sani tru fu san den Dyusma e kragi mi. 3Bika yu sabi ala den gwenti fu den Dyusma nanga den sani pe den no man feni densrefi. Fu dat'ede mi e begi yu fu arki mi nanga pasensi.
4Ala den Dyusma sabi fa mi ben libi na mindri fu mi eigi pipel di mi ben yongu, nanga fa mi ben libi ini Yerusalem. 5Den sabi mi bun langa kba. Efu den wani, den srefi kan taki tak' mi ben de fu a grupu fu den Fariseiman. Fu ala den Dyusma, den man dati e hori a wèt tapu a moro tranga fasi. 6Now mi e tnapu dya na fesi krutu fu di mi abi a howpu taki Gado o du san a pramisi den afo fu wi. 7Den twarfu lo fu wi pipel e tan dini Gado dei nanga neti fu di den e howpu a srefi sani tu. Mi kownu, na fu a howpu disi den Dyusma tyari mi kon kragi. 8Fu sanede un no man bribi taki Gado kan meki dedesma kon na libi baka?
9Mi fu mi sei ben prakseri taki mi mus meki ala muiti fu feti Yesus fu Nasaret. 10Na dati mi ben du tu ini Yerusalem. Nanga a makti di mi ben kisi fu den prenspari priester, mi poti furu fu den sma fu Gado na straf'oso. Èn te den ben kiri den, mi ben taki tak' a bun. 11Ini ala den kerki mi ben e fon den bribisma. Tapu sowan fasi mi ben e pruberi fu meki den drai den baka gi Yesus. Nanga bigi atibron mi ben de na den baka fu du den ogri te na den dorosei foto srefi. 12Na dati mi ben e du tu a leisi di mi go na Damaskus. Den prenspari priester ben seni mi go èn den ben gi mi a makti fu grabu den bribisma. 13Mi kownu, di mi ben de na pasi, bigibigi dei, mi si wan faya di ben krin moro a son. A fadon fu heimel kon na tapu mi nanga den sma di ben de nanga mi. 14Wi alamala fadon na gron. Dan mi yere wan sten aksi mi na ini Hebrewtongo taki: ‘Saul, Saul, fu sanede yu de na Mi baka fu du Mi ogri? Na yusrefi yu e du nanga a kaka di yu e tan kaka yu futu.’ 15Dan mi aksi taki: ‘Masra, suma na Yu?’ Masra piki mi taki: ‘Mi na Yesus, di yu e du ogri. 16Ma opo tnapu na tapu yu futu, bika Mi sori Misrefi na yu fu di Mi teki yu leki Mi wrokoman. Yu mus ferteri sma den sani san yu si tide èn san Mi o sori yu ete. 17Mi sa puru yu na anu fu den Dyusma nanga den sma di no de Dyu, pe Mi o seni yu go. 18Yu sa opo den ai, fu den drai den libi kmopo fu a dungru kon ini a leti, èn fu kmopo ondro a makti fu Satan kon na Gado. Dan den sa kisi pardon fu den sondu, èn den o kon mindri den sma fu Gado fu di den bribi ini Mi.’
