1 Corinthians 15

₁Utonpa yamùk eyenu kon anappontàpai wessaik Wakù Itekale unekamappù lùppù àpàkù'nokon pàk, ananùmùppù kon lùppù, molopai ailon tetok auya'nokon wettok meluntà pe ipàk. ₂Sàlàichi Wakù Itekale winà ewepùikattàsak kon màlà, itekale unekamappù lùppù pàk meluntà pe autachi kon yau, màlà kasa pùla iwechi yau iwoton pe pùla ailon tesak auya'nokon pe iwechi màlà.

₃Unanùmùppù tùlùppù uya apyakù'nokon, sàlà eke pe kulu nai'nùk. Christ welikùppù màlà àli pe we'nàtok yepeppe, Katù Maimu yau iwe'menukasak kasa. ₄Iwu'nattàppù màlà molopai iwuluukappù icholùwano wei yattai, Katù Maimu yau iwe'menukasaMatk kasa. ₅Ichenpoikappù màlà Cephas, Peter piyak, molopai nen uchi 12 pan kon yeunossak kon piyak. ₆Màlà tùpo, ichenpoikappù màlà 500 yentaino kon ta'lon kon piyak màlà yattai lùppù là. Tamù'nawàlà lùiwa nulà lùppù tok man, tùulon kon welikùppù là tùse. ₇Màlà tùpo ichenpoikappù màlà James piyak, molopai nen uchi tamù'nawolon kon yeunossak kon piyak.

₈Molopai àkàmlàk lùppù nen uchi upyak nàlà ichenpoikappù màlà, tùwentutok yattai pùla iwentusak lùppù kasa wechi tùse. ₉Masapùla yeunossak kon ma'lan kulu Iulà, molopai yeunossappe yesatù yeselùkek pùla wechi sàlà, masapùla Katù sochiyi talumattàppù uya màlà. ₁₀Tùse wakù pe Katù wettok winà wessai'nùppe wechi sàlà nai'nùk, molopai wakù pe iwettok wechippù yà'là woton pe pùla là pen màlà. Ànù'là yeunossak kon yentai lùiwa sa'man pe we'wotokomasak man, Iulà pen tùse, tùse wakù pe Katù wettok upàk we'wotokoma nai'nùk. ₁₁Yattai pùla làichi, Iulà pe iwechi wapùla mùkkyamlo pe iwechi yau, sàlàichi màlà ina nekama molopai ailon teppù auya'nokon nùppù.

₁₂Màlàpàk, Christ we'wuluukappù pe itekale yekamasak yau, yà'là pe ken uchi iwechi pàk tùulon kon uya iwelichak we'wuluuka pen màlà te nai'nùk? ₁₃Iwelichak lùppù we'wuluukatok pùla iwechi yau, Christ we'wuluukappù pe pùla iwechi màlà. ₁₄Molopai Christ wuluukappù pùla iwechi yau, ina nekama itekale wechi iwoton pe pùla pe iwechi màlà, molopai ailon tetok nàlà auya'nokon wechi. ₁₅Màlà yentai, Katù winàkàik ina ukaseitasappe iwechi màlà, masapùla ina uya Katù uya Christ wuluukappù teppù màlà. Tùse iwuluukappù ya pe pùla iwechi màlà, iwelichak kon wuluukasappe pùla iwechi yau. ₁₆Masapùla iwelichak kon wuluukasak pùla iwechi yau, Christ wuluukappù pe pùla nàlàichi iwechi màlà. ₁₇Molopai Christ wuluukappù pùla iwechi yau, ailon tetok auya'nokon wechi màlà yà'là pùla, molopai amakuyi kon yau lùppù ewechi kon pe iwechi. ₁₈Màlàyau nen uchi Christ yau iwelichak kon we'lachimasappe iwechi màlà. ₁₉Sàlà neken wema'nàtok ponaloppe enpen we'nà Christ pàk yau, entuppak kulu tùwessan pe we'nà'nokon màlà tamù'nawolon kon kappon yamùk yentai.

₂₀Tùse ailon pe nen wapiyaloppe Christ wuluukappù màlà weli'nàtok yapai, mùkyamlo iwe'nùnsak kon weli'nàtok yau we'wuluukatok ipàkàlà pe. ₂₁Masapùla weli'nàtok uyàpùppù kàyik winà kasa làma, weli'nàsak wuluukatok uyàpùppù màlà kàyik winà. ₂₂Masapùla Adam yau tamù'nawolon kon welikù kasa làma, Christ yau tamù'nawolon kon kupù màlà pàli'yau. ₂₃Tùse tamù'nawolon kon wechi echipàkàlà, Christ, tamù'nawolon kon wapiyalok, molopai nen uchi iyàpù yattai mùkyamlo iponalok kon. ₂₄Molopai nen uchi pata wenukattok uyàpù màlà, Katù Tùkàipùnù yemyak itepulu pe we'nàtok tùlù ya, tamù'nawolon epulu ton molopai apàikek ton molopai meluntà ton mattanùpùppù tùuya ye'mappùtak. ₂₅Masapùla itepulu pe iwechi màlà Katù uya tamù'nawàlà teyatonnon yentaika molopai tùtta yokkoik tok nonka ya ponalà. ₂₆Àkàmlà'no lùppù eyaton inmattanùpù woton màlà weli'nàtok. ₂₇Masapùla Katù uya, “tamù'nawolon tùsak màlà itta yokoik.” Tùse, “tamù'nawolon” tùsak yokoik te ya yau, ichittu màlà sàlà yau mùkkàlà Katù, iku'nàippù lùppù wechi yo'no pen màlà. ₂₈Màlàpàk uchi tamù'nawolon yepoi tùwettoppe tamù'nawolon yau, Katù uya tamù'nawolon nonkappù màlà to'nokoik, Imu, tamù'nawolon yepoi innonkappù wechi nàlà yo'no.

₂₉Màlàpàk yà'là pe ken mùkyamlo kappon yamùk wechi ichenpataukasak kon iwelichak kon ponaloppe? Iwelichak kon wuluukappù pùla iwechi yau, yà'là pe ken iwechi pàk tok ponaloppe kappon yamùk yenpatauka màlà? ₃₀Molopai ina nen uchi, yà'là pe ken iwechi pàk mei pùla mattantok kupù ina uya nai'nùk pata weyu kaichalà? ₃₁Utonpa yamùk, ailon pe weli'nàtok yemloto pon Iulà wei kaichalà! Utapulàtok àpàkànsau'nokon wema'nàtok Christ Jesus Kùyepulu kon yau ukussan. ₃₂Yà'là yepolo uya ken “elannek kamo yamùk” pokonpe wepanta'ma yau Ephesus po, kappon yeselu yau? Iwelichak wuluuka pùla iwechi yau,

₃₃Eyennaka kon kùsettak “Àli iwechiyakon pe we'nà màlà wakù eselu mattanù'nài.” ₃₄Ennappotàk kon wakù pe eusenumenkatok kon yak, molopai àli kuttok auya'nokon yeselu yeleutanùttàk kon. Sàlà te uya sàlà ewekuli'ma kon pa, masapùla molo man àkklottau'nokon tùulon kon Katù ittunnan pen.

₃₅Tùulon uya là yekamappo, “Atta ken uchi iwelichak kon wuluuka? Yà'là yekkwa ken itesappe tok wechi?” tukaik. ₃₆Pakko ton amyamlo! Kùyali yenappà pànsak auya'nokon yau, màlà tùwenuttasen pen tùwattatoppe, tùse iwelichak yau neken. ₃₇Àwàppàmà kon yau iteppe iwechi pànnàinan pen amyamlo, tùse itenappà neken, yattai pùla a'naik walai là wapùla tùulon pe là iwechi yau. ₃₈Tùse Katù mùkkàlà itesak (itek) tùnài iche tùwettok kasa, iponalà'ne itenappà lepa ya màlà iwalai itesak (itek)ke.

₃₉Masapùla tamùnawolon pun wechi ekkaichalà pen màlà, kappon yamùk wechi tewin ipun, kamo yamùk tùulon pe, tolon yamùk tùulon pe, molopai molok yamùk tùulon pe ipun.

₄₀Kau nàlà tùwemassan molo man molopai non po tùwemassan, kak yawon kon ponalok wakù pe we'nàtok wechi màlà tewin, molopai non pon kon ponalok wakù pe we'nàtok wechi tùulon pe. ₄₁Wei màlà wakù pe tùwettok yesak, kapùi tùulon pe wakù pe iwettok, molopai chilùkà yamùk tùulon pe wakù pe iwettok. Molopai chilùkà yamùk kùlottau lànen tùpatalo'nan wakù pe iwettok kon molo tùwessen.

₄₂Màlà kasaichi iwechi màlà iwelichak kon wuluukasak yau. Esak wu'nattàsak màlà tùukàtasen, iwuluukasak yau ikkàta pen màlà. ₄₃Tùwu'nattàsen pe iwechi màlà àli pe, tùwe'wuluukasen pe wakù pe. Tùwu'nattàsen pe iwechi attu'mùla, tùwe'wuluukasen pe meluntàk. ₄₄Tùwu'nattàsen pe iwechi màlà kappon pe, iwe'wuluuka akkwalù pe. Esak tùpun kenan wechi molo yau, esak nàlà akkwalù wechi màlà molo. ₄₅Màlà kasa iwe'menusak màlà, “Wapiyalok kàyik, Adam wenappù nulà tùwessen pe,” tawon, tùse àkàmlà'no Adam mùkkàlà Akkawalù, wema'nàtok tùnài. ₄₆Wapiya akkwalù uyàpùppù pen tùse itesak, molopai nen uchi akkwalù. ₄₇Wapiyalok kàyik konekappù màlà non ippunuppù yapai, ite'mappù pokon kàyik epùn winàpaino. ₄₈Tamù'nawolon kon kappon yamùk non pon kon wechi màlà mùkkàlà non yapai ikonekasak kasa, mùkkàlà epùn winàpai iyàssak lùppù kasa màlà tamù'nawolon kon epùn ponalok kon wechi. ₄₉Kappon yamùk non pon kon yeselu ku'nài nan kùmyamlo sàlà yattai, tùse màlà yattai nen uchi epùn yapai iyàssak lùppù kasa we'nà'nokon màlà.

₅₀Sàlà tekamayaik àpàku'nokon utonpa yamùk, pun molopai mùn uya Katù wettok itepulu pe yepolo pen màlà, molopai tùukàtasen uya tùukàtasen pen yepolo pùla iwechi màlà.

₅₁Sàlà ittusak pen yetatàk kon. Tamù'nawàlà weli'nà'nokon pen màlà, tùse tamù'nawàlà wemyakanman nokon màlà. ₅₂Asse'ne kulu pikiu te kasa, àkàmlà'no paka letù walai wai tàwù yau. Masapùla itàwù yau, iwelichak kon we'wuluuka màlà tùukàtasan pe pùla molopai tamù'nawàlà kùmyamlo wemyakanma màlà. ₅₃Masapùla tùukàtasen pe nai'nùk wemyakanma màlà tùukàtasen pen yak, molopai tùwelichen pe nai'nùk wemyakanma màlà tùwelichen pen yak. ₅₄Màlàpàk màlà kappon tùukàtasen pe nai'nùk wemyakanmasak tùukàtasen pen yak yau, molopai tùwelichen pe nai'nùk wemyakanmasak tùwelichen pen yak yau, imenukasak lùppù wekkupù ailon pe màlà, “Weli'nàtok mattanùssak man entaikantok yau.” tukaik.

₅₅“I'nailà entaikantok auya nai, Weli'nàtok? I'nailà chippontok auya nai, Weli'nàtok?” ₅₆Weli'nàtok uya chippontok màlà makui, molopai Law màlà makui meluntàlù ke lepanài. ₅₇Tùse Katù pàk tenki te sàlà! Kùlepanài'nokon mùkkàlà entaikantok ke Kùyepulu kon Jesus Christ yai.

₅₈Màlàpàk uchi, u'nùn ton utonpa yamùk, meluntà pe ettàk kon, katamatàu. Tamù'nawàlà tàwàlàlà Itepulu wotokoyi yak ettùtàk kon. Masapùla Itepulu yau àwotokoyi kon wechi iwoton pe pùla là pen màlà.