1 Corinthians 14

₁Uchi'nùnmantok yeselu eyeselu kon pe nechii molopai Wakù Akkwalù winàpaino lepantok iche kulu ettàk kon, Katù Maimu yenpoikatok ike ke lepantok kulu làkku. ₂Mùkkàlà tùulon mayin yau tùuselupasen uselupa kappon yamùk pokonpe pen màlà tùse Katù pokonpe neken. Masapùla ànù'là uya yà'là te ya là ittu pen màlà. Tùttusen pen yekama ya màlà Wakù Akkwalù ke. ₃Tùse mùkkàlà Katù Maimu yenpoikanài uselupa màlà kappon yamùk pokonpe, tok lepa ya pùikak ke, meluntàtantok molopai ewan ipittàtok ke. ₄Mùkkàlà tùuselupasen tùulon mayin yau wepùikattà neken màlà, tùse mùkkàlà Katù Maimu yenpoikanài uya, tamù'nawàlà sochi tawon kon yamùk pùikattà màlà.

₅Tamù'nàwàlà messatài'nùk yawà euselupa kon tùulon mayin yau iche kasa wessaik, tùse làkku Katù Maimu yenpoika auya'nokon iche wessaik. Masapùla mùkkàlà Katù Maimu yenpoikanài wechi màlà eke peiwa, tùulon mayin yau tùuselupasen yentai lùiwa ànù'là wechi neken molo yà'là te ya yekamanài pe yau, tamù'nawàlà sochi tawon kon wepùikattà màlà. ₆Màlàpàk utonpa yamùk, apyakù'nokon uyàssak molopai tùulon mayin yau uselupa yau, yà'là ken wakù kupù uya màlà ewinàkàik nokon? Ipla, tùse Katù nenpoika yà'làlà nepù uya yau neken, wapùla pukkek, wapùla Katù Maimu wapùla enupantok.

₇Yà'làlà, yakkwalù pùn tùtàulùnpasen kamo yàppù yapai ikonekasak yekkwa wapùla tukkan itewa wai tàwù ikasa pùla yau, yà'là kasa ken ànù'là uya itàulùnpa nai'nùk tàwù ittu? ₈Molopai tu'ma paka letà walai tàwù ikasa pùla yau, ànùk we'letima ken tùwepanta'matoppe? ₉Màlà kasa làma ewechi kon màlà, euselupa kon mayin ànù'là nùttu pen yau yà'là kasa ken ànùk uya meselupayatài'nùk ipàk ittu? Yà'là woton pe pùla amaimu kon utà pe iwechi màlà assetun yau. ₁₀Ailon pe iwechi màlà tukkan tùpatalo'nan mayin yamùk wechi molo sàlà wolù yau, tùse ittutok ipàkàlà pùla là màlà yamùk wechi pen màlà. ₁₁Ànù'là uselupa ittu uya pùla wechi yau, tùuselupasen pona toto pe wechi màlà, molopai toto pe upona iwechi. ₁₂Màlà kasaichi ewechi kon màlà. Wakù Akkwalù uya lepantok iche kulu ewechi kon pàk, màlà yamùk pùikattànài pe nai'nannùk lepantok yapulàtàk kon sochi tawon kon meluntàtanùsse pe. ₁₃Màlà kasaichi iwechi pàk ànù'là tùulon mayin yau tùuselupasen wàpùlema màlà yà'là te là tùuya yekamatoppe tùuya. ₁₄Masapùla wàpùlema tùpatalon mayin yau yau, uyakkwalù wàpùlema màlà tùse usenumenkatok wechi ipùkkù pe pen màlà. ₁₅Màlàpàk yà'là kupù uya ken? Wàpùlema màlà uyakkwalù ke molopai usenumenkatok ke nàlà wàpùlema màlà, uselenpa màlà uyakkwalù ke molopai usenumenkatok ke nàlà uselenpa màlà. ₁₆Tenki te auya'nokon Katù pàk ayakkwalù kon ke yau, yà'là kasa ken ittu ya pùla nai'nùk uyàssak uya “Emen” te ittuima pùla, tenki tetok auya'nokon Katù pàk pàk? ₁₇Wakù pe lànen tenki tetok auya'nokon wechi tùse, tùulon kappon pùikattàsak ya pùla iwechi màlà.

₁₈Tenki ukayaik Katù pàk uselupa tùulon mayin yamùk yau eyentai'nokon pàk. ₁₉Tùse sochi tau wechi yau mùyak etoiken neken nà itesek eselupapai tùwessen Iulà tùttusen yau, tùulon kon yenupatoppe uya, tukkan kulu mayin tùttusen pen yau uselupa yentai.

₂₀Utonpa yamùk, mule yamùk lùkkwà mùkyamlo àli ittunnan pen. Tok kasa ettàk kon tùse eusenumenkatok kon yau tok kasa kettàu, tùse kàyippe ettàk kon eusenumenkatok kon yau. ₂₁Law yau iwe'menukasak màlà,

₂₂Màlàpàk uchi, uselupantok tùulon mayin yau wechi màlà ailon tawonnan ponaloppe pùla tùse ailon tawonnan pen uya yentok ipàkàlà pe, tùse Katù Maimu yenpoikatok wechi màlà ailon tawonnan ponaloppe, ailon tawonnan pen ponaloppe pùla.

₂₃Màlàyau tamù'nawàlà sochi tawon kon wepilichak tamùkke yau molopai tamù'nawolon kon uselupa tùulon mayin yau tùse ittunnan pen wapùla ailon tawonnan pen wewonsak yau, tok utayaupasak màlà nai'nùk te na' tok uya pen eppaino? ₂₄Tùse Katù Maimu yenpoika tamù'nawolon kon uya kùlottak ailon tawon pen wapùla ittunài pen wewonsak yau, tok uya àli kuttok ya yenpoika màlà molopai tamù'nawolon ineta winà màlà ittu. ₂₅Amappe ichenumenkatok nepù màlà ayupona, molopai tese'muyok iwena màlà Katù yemloto po, “Ailon pe Katù àkklottau'nokon man,” tei'ma.

₂₆Yà'là te uya ken sàlà, utonpa yamùk? Katù yapulàse ewepilichak kon yau, tamù'nawolon kon wechi telemu ke, wapùla enupantok yesappe, tenpoikasen yesappe, wapùla itekale tùulon mayin yau, wapùla yà'là tesak lùppù yekamatok yesappe. Tamù'nawàlà sàlà yamùk wechi màlà Katù ponalok kon meluntàlùtanù'nài pe tùkussen pe. ₂₇Ànù'là uselupa pe iwechi itekale tùulon mayin yau yau, àsà'lon kon wapùla àsolùwawon kon nùselupaik esse'mappù pàk, molopai tàwà ànù'là inekamappù lùppù uya yà'là te là yekamai. ₂₈Tùse yà'là teya là yekama woton ànù'là pùla iwechi yau tàwà eppana tok nechii sochi tau, tùse tùpokon pe neken nà nùselupaik molopai Katù pokonpe neken. ₂₉Asa'lon kon wapùla àsolùwawon kon Katù Maimu yenpoikannan tàwà nùselupai, tùulon kon uya ichelupatok yau iwalai wechi ittu tùse. ₃₀Tùse chichiu pe wepili'nàtok yau nai'nùk uya ànù'là pàk itekale yenpoikasak yau, mùkkàlà wapiya ichelupasak lùppù weleuta màlà. ₃₁Masapùla tamù'nawàlà là Katù Maimu yenpoika auya'nokon màlà, esse'mappù pàk, tamù'nawolon kon usenupatoppe molopai tok meluntàtanùttoppe ya. ₃₂Tentai pùla, ipàlikannan pe takkwalù kon ku'nài pe Katù Maimu yenpoikannan wechi màlà. ₃₃Masapùla Katù mùkkàlà utaimelunpantok Katùyi pen tùse tùwanmùla we'nàtok Katùyi.

Tamù'nawàlà sochi tawon kon kùlottau nossan yamùk eppana tùwessan. ₃₄Màlà kasa nossan yamùk eppana nechii sochi yamùk tau. Tok uselupatoppe tok kupù pen màlà tùse Law nekama yawàlà tok wechi màlà molopai itepulu yo'no. ₃₅Yà'là ànùttupai tùwechi kon yau, tàwà tùtayappù kon pàk tok nekamappoi tùpata kon po. Kuli'manài pe màlà nossan uselupa wechi sochi tau.

₃₆Katù Maimu uyàssak na' ewinàpai'nokon pe iwechi màlà? Wapùla amyamlo neken wechi ka' màlà inepolossan pe lù? ₃₇Ànù'là Katù winàpaino itekale yenpoikanài pe tùwechi wapùla Wakù Akkwalù yesappe tùuchittusen wechi yau, tàwà nùttui sàlà tùmenukayai'nùk apyakù'nokon wechi Itepulu winàpaino imaimu yawàlà we'nàtok pe. ₃₈Tùse ànù'là uya sàlà yeta pùla iwechi yau, imaimu yeta pen nàlà màlà.

₃₉Màlàpàk uchi, utonpa yamùk, eyewan kon itùtàk kon Katù Maimu yenpoikatok pàk, tùse tùulon mayin yau uselupantok kùseleutanùttàu. ₄₀Tùse tàwà tamù'nawolon nekkupùi wakù pe molopai utaimelunpantok pùla.