1 Corinthians 13

₁Kappon yamùk molopai inchelù yamùk maimu yau lànen tùuselupasen pe wechi tùse, uchi'nùnmantok pùla wechi yau, sanpula tàwù kasa uselupatok wechi màlà molopai sanpana tàwù kasa. ₂Lepantok, Katù Maimu yenpoikanài yesappe wechi yau, tamù'nawolon pukkeppe we'nàtok yesappe molopai tùttusan pen yamùk là ittu uya, tamù'nawolon ailon tetok yesappe wechi, wùk yamùk yamatoppe uya, tùse uchi'nùnmantok pùla wechi yau, yà'làlà pùla wechi màlà. ₃Tamù'nawàlà lànen itesappe wettok tùlù uya entuppa'no kon yemyak. Molopai wettùlù upottàtoppe. Tùse uchi'nùnmantok pùla wechi yau, yà'làlà yepolo uya pen màlà.

₄Uchi'nùnmantok màlà pàlikanài, molopai tùusentuppasen. Tùkùlùmàlunsen pen màlà wapùla ànù'là yentai tùwekkussen pen wapùla tùutapulàsen pen. ₅Àli pe tùuselupasen pen màlà, wapùla tùpàk neken tùusenumenkasen pen, wapùla asse'ne tùwessakolopasen pen, iwalai pen kussak tùwinàkàik lùppù pàk tùusenumenkasen pen. ₆Uchi'nùnmantok màlà àli pàk tùutauchinpasen pen, tùse ailon pàk tùutauchinpasen. ₇Tamù'nawolon pàlikanài, ailon tawon tàwàlàlà, enpen tùwessen tàwàlàlà, tùweleutasen pen.

₈Uchi'nùnmantok màlà tùwenukassen pen. Tùse lepanatok Katù Maimu yenpoikatok yau, tùwenukassan màlà, lepantok tùulon mayin yau uselupantok yau, ichetatukka pen màlà. I'nailàlà ittutok ike wechi, wechi molo yau ippla tùwenasen màlà. ₉Masapùla ipùkkù pe neken ittu'nokon man molopai ipùkkù pe Katù Maimu yenpoika. ₁₀Ikasa tùwessen wechi molo yau ipùkkùlùppù pe nai'nùk pùla iwena màlà.

₁₁Mule pe wechi yau, uselupappù mule kasa, usenumenkappù mule kasa, uyeselu wechippù mule yeselu kasa, tùse kàyippe wenasak yau mule yeselu yamùk nonkappù uya uyappowinàkàik. ₁₂Sàlà pe yene'nokon nai'nùk katuppluk pe wanamali yau akkwalùppù yene kasa, tùse yene'nokon nen uchi màlà itenpatak. Sàlà pe tùttuyai'nùk ipùkkù pe neken ittu uya màlà tamù'nawàlà nen uchi, tamù'nawàlà uyittu nai'nùk kasa.

₁₃Molopai sàlà pe sàlà yamùk àsolùwawon molo man, ailon tetok, enpen we'nàtok, molopai uchi'nùnmantok. Tùse sàlà yamùk yentaino kulu màlà uchi'nùnmantok.