1 Corinthians 2
Christ Wechi Pulusuk Po Yekale
1Utonpa yamùk, apyakù'nokon uyàssak Katù Maimu yekamase yau, eke ton nà mayin molopai eke ton usenupansak maimu yapulà uya pùn àpàkù'nokon. 2Masapùla wekkussak wechippù màlà yà'làlà ittutok uya pùla apyau'nokon wechi yau, tùse Jesus Christ molopai ipukapàttok pulusuk po neken kulu. 3Màlàpàk uyàssak apyakù'nokon yau, attu'mùla wechippù molopai upplànài'nùmùppù kulu wettalipa ke. 4Uselupatok molopai uyekale unekama wechi kappon pukketù nùkupù yawà pùn, tùse Katù winàpaino Wakù Akkwalù meluntàlù yenpoika pe iwekkussak màlà. 5Ailon tetok auya'nokon wechi kappon pukketù yau pe iwechi tukaik, tùse Katù meluntàlù yau làkku.
Katù Pukketù
6Walà tùse, ina uselupa, pukkeppe we'nà yekale pàk ichemokkasak kon kùlottau. Tuse, sàlà wolù winàpaino pukkek pàk pùla wapùla sàlà wolù yepulu ton pàk pùla. Pùsamlo mùkyamlo yà'là pùla nenayai'nannùk. 7Tùse ina uselupa nai'nùk Katù pukketù tùttusen pen pàk, pukkek tonantau iwessak lùppù. Katù uya tonanse ikupùppù. Sàlà kupùppù ya màlà pata wepyattà wapiya, yapulàtok kon pe. 8Ànù'là sàlà wolù yepulu ton uya sàlà ittupù pen màlà. Tok uya ittusak yau, Itepulu Jesus eke kulu pukapàtùppù tok uya pulusuk pona pen sàlà eppaino. 9Walà tùse, iwe'menukasak kasa iwechi,
“En uya là yensak pùla iwechi wapùla pana uya là yetasak pùla iwechi, ànù'là usenumekatok yau iwekonekasak pùla iwechi màlà, màlà Katù nùkonekappù mùkyamlo tù'nùnmannan ponaloppe ” te kasa. {Isa 64.4} 10Tùse Katù uya yenpoikappù màlà kùpàkù'nokon Takkwalù winà. Wakù Akkwalù mùkkàlà tamù'nawolon iwanài, i'napailon kulu nàlà Katù yeselu yamùk iwanài. 11Ànù'là uya tùulon kappon usenumenka ittu pen tùse, kappon yau nai'nùk màlà yakkwalù ichenumenkatok ittunài. Màlà kasa làma, Wakù Akkwalù neken mùkkàlà Katù usenumenkatok ittunài. 12Wolù winon akkwalù yeposak kùuya'nokon pen nai'nùk, tùse Akkwalù Katù winàpaino, Katù uya lepansakù'nokon nai'nùk ittutok kon pe.
13Sàlàichi màlà mayin ina nùselupayai'nùk kappon pukketù winà ina yenupappù lùppù pen. Tùse, Akkwalù winà ina usenupappù lùppù, Akkwalù winàpaino yamùk yekamatoppe ina uya mùkyamlo Akkwalù yesappe tùwessan pàk. 14Akkwalù pùn kappon mùkkàlà lepantok kon yamùk Katù Yakkwalù winàpaino yanùnnài pen, masapùla yà'là pe pùla màlà yamùk wechi tùpona pàk. Molopai màlà yamùk ittu ya pùla iwechi màlà masapùla Akkwalù winà neken tùttusan pe iwechi pàk. 15Kappon, Akkwalù yesappe nai'nùk mùkkàlà wakù pe tamù'nawolon yà'là yamùk wettok wechi ittunài. Tùse ànù'là uya mùkkàlà kappon pàk ikasa pùla messaik tetok pùla iwechi màlà.
16“Masapùla ànùk ken Itepulu usenumenkatok ittuka'nài, suwa ekkà tetoppe tùuya ipàk.” {Isa 40.13}
Tùse Christ usenumekatok yesappe we'nà'nokon man.
Patamuna New Testament Revised © United Bible Societies, 1973, 2019.
