1 Corinthians 3

₁Utonpa yamùk, uselupa pùla iwechi màlà àpokonpe'nokon Akkwalù yesan pokonpe uselupa kasa, tùse kappon yeselu yau wema'nà kasa, mule yamùk lùkkwà Christ yau nai'nannùk kasa. ₂Manak ke elepatantàu Iulà, sa'man kùyali ke pùla, masapùla yanùmù auya'nokon yeselùkeppùla ewechi kon pàk. Walà tùse yanùmù auya'nokon yeselùkeppùla lùppù messatàik. ₃Wolù ponalok kon kasa lùppù. Masapùla àkùlùmàluntok kon molopai àusàlàmatok kon wechi àkklottau'nokon pàk. Màlà uya ken na' sàlà wolù yawon kappon yamùk pe ewechi kon ànkuppai ewettok kon yawàlà yekama pen màlà? ₄Masapùla tewinannà uya, “Paul ya'lon Iulà,” te molopai tùulon uya, “Apollos ya'lon Iulà,” te. Kappon yeselu neken ku'nài nan kasa na' ewelaika kon pen màlà?

₅Ànùk ken uchi mùkkàlà Apollos? Molopai ànùk ken mùkkàlà Paul? Katù yapyoto ton neken nen mùkyamlo, ene'nàippù kon iwinàkàik ailon te kon pa. Itepulu nùtùlùssan mùkyamlo iponalà iwotokoyi. ₆Itenappà pàmàppù uya màlà, Apollos uya ikipùppù, tùse Katù mùkkàlà iwattatoppe iku'nàippù. ₇Ipànnài molopai iki'nài tawonnan mùkyamlo yà'là ton kulu pen. Tùse Katù neken, mùkkàlà yà'làlà yek wattatoppe iku'nài. ₈Tùpatalà'ne là ipànnài molopai iki'nài tawonnan wechi pen nai'nùk. Molopai tok ye'matok wechi màlà tok kaichalà tewin pàk tok wotokoyi lùppù pàkàlà. ₉Masapùla ina mùkyamlo Katù we'wotokoma tonpa yamùk, amyamlo nen uchi Katù tumà. Katù yùwùk nàlà amyamlo. ₁₀Wakù pe Katù wettok uya ulepappù lùppù ike yapulà pe, ittunài kasa tamùsen yapon tùkonekatai molopai tùulon nen uchi màlà pona namùyan. Tùse yamùnnan tàwà tùttuik nechii yà'là kasa yamù tùuya'nokon yau. ₁₁Masapùla ànù'là uya tùulon tu'ma là yamùtok ipo nonkatok pùla iwechi màlà, mùkkàlà neken Jesus Christ itùkassak lùppù. ₁₂Anù'là kappon sàlà yamùtok ipo po yamùtoppe tùuya kolù, chilùpa, epekkek ton tàk, yei, wanak wapùla kumya yapulànài wechi yau, ₁₃iwotokoyi lùppù yenpoika màlà i'nai yekkwa pe là iwechi. Masapùla Wei uya inepù màlà akkwa yak. Apok ke yenpoika màlà, molopai apok uya màlà ittu i'nai kasa là tewin pàk kappon wotokoyi lùppù wechi. ₁₄Walùppù ànù'là namùppù wechi iyatùppù pùla yau, e'mantok yepolo ya màlà. ₁₅Tùse ànù'là wotokoyi uyassak yau iwe'lachima malà, tùse iwepùikattà màlà apok winàpai tùwepesen kasa.

₁₆Mùttuyatàu uchi amyamlo nàlà wechi Katù yùwùppe, molopai Katù Yakkwalù wemapù ayau'nokon? ₁₇Màlàpàk ànù'là uya Katù yùwùk mattanùpù yau, Katù uya imattanùpù màlà. Masapùla Katù yùwùk màlà esukenan molopai amyamlo nàlà mùkyamlo itùwùk.

₁₈Eyiwalà'nokon kesennakatau. Anù'là àkklottau'nokon nai'nùk uchittu pukkeppe sàlà wolù yeselu nùkupù winà yau, tàwà “pakko pe” nenai pukkeppe tùwenatoppe. ₁₉Masapùla pukkeppe sàlà wolù nùttu màlà yà'làlà pen Katù yenu yau. Iwe'menukasak, “Katù mùkkàlà, pukkek yachinài ittu tùuya pe tukaik iwettok yau,” tawon kasa. {Job 5.13} ₂₀Molopai tùulon tu'ma, “Itepulu Katù mùkkàlà pukkek usenumenkatok wechi yà'là pe pùla ittunài,” tawon. {Psa. 94.11} ₂₁Ànù'là uchi kùttapulàtak kappon yamùk nùkupù pàk. Masapùla tamù'nawolon màlà àponalok kon. ₂₂Paul wapùla Apollos wapùla Cephas, Peter tukaik tesassen wapùla sàlà wolù wapùla wema'nàtok wapùla weli'nàtok wapùla sàlà pe nai'nùk wapùla ewanawà nai'nùk, tamù'nawàlà sàlà yamùk màlà àponalok kon. ₂₃Molopai Christ ponalok kon amyamlo, molopai Christ mùkkàlà Katù ponalok.